சிறப்பு செய்திகள்

கோவை ஸ்மார்ட் சிட்டி பணிகள், அமைச்சர் எஸ்.பி.வேலுமணி ஆய்வு : விரைந்து முடிக்க அதிகாரிகளுக்கு உத்தரவு

கோவை
கோவையில் ஸ்மார்ட் திட்ட பணிகளை ஆய்வு மேற்கொண்ட அமைச்சர் எஸ்.பி.வேலுமணி பணிகளை விரைந்து முடிக்க அதிகாரிகளுக்கு உத்தரவிட்டார்.

கோயம்புத்தூர் மாநகராட்சி பிராதான அலுவல கூட்டரங்கில், ஸ்மார்ட் சிட்டி திட்டத்தின்கீழ் நடைபெற்று வரும் வளர்ச்சிப் பணிகளின் முன்னேற்றம் குறித்து கழக அமைப்பு செயலாளரும், கோவை புறநகர் மாவட்ட கழக செயலாளரும், நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத்துறை அமைச்சருமான எஸ்.பி.வேலுமணி தலைமையில் அலுவல் ஆய்வுக் கூட்டம் நடைபெற்றது.

இக்கூட்டத்தில் அமைச்சர் எஸ்.பி.வேலுமணி பேசியதாவது:-

கோயம்புத்தூர் மாநகராட்சியில் ஸ்மார்ட் சிட்டி திட்டத்தின்கீழ் ரூ.989.80 கோடி மதிப்பில் பணிகள் சிறப்பாக மேற்கொள்ளப்பட்டு வருகிறது. வெள்ளலூர் பகுதியில் திடக்கழிவு மேலாண்மை பணிகள், கவுண்டம்பாளையம் பகுதியில் சூரியமின் சக்தி பணிகள், பசுமை பூங்காக்கள் அமைத்தல், பாதாள சாக்கடை அமைக்கும் திட்ட பணிகள், காற்றுத் தரம் கண்காணிக்கும் கருவி, உக்கடம் சூரியமின்சக்தி நிலையம் அமைத்தல் போன்ற பல்வேறு பணிகள் மற்றும் பெரியகுளம் வடகரை புனரமைத்தல், வாலாங்குளம் குறுக்கே நடைபாதை அமைத்தல் பணி, வாலாங்குளம் மேம்பாலத்தின் கீழ் மேம்பாட்டு செய்தல் பணி, பெரியகுளம் புனரமைப்பு மற்றும் மேம்பாட்டுப் பணிகள் போன்ற வளர்ச்சிப் பணிகளை விரைந்து முடிக்க வேண்டும்.

மேலும் செல்வசிந்தாமணிகுளம், கிருஷ்ணம்பதிகுளம், செல்வம்பதி, குமாரசாமி குளம், சிங்காநல்லூர் குளம், குறிச்சி குளம் ஆகிய 9 குளங்களில் மேம்பாட்டுப் பணிகளை விரைந்து முடிக்க வேண்டும், திவான் பகதூர் சாலை மாதிரி சாலை, அடுக்குமாடி வாகன நிறுத்துமிடம், உக்கடம் சூரியமின்சக்தி நிலையம், 24X7 குடிநீர் திட்டப் பணிகள், பாதாள சாக்கடை திட்ட பணிகள் மற்றும் வீடுகளுக்கு இணைப்பு வழங்குதல், வீடுவீடாக குப்பைகள் சேகரிக்க வாகனம் போன்ற அனைத்து பணிகளையும் தரமானதாகவும், விரைந்து முடிக்க வேண்டும்.

இவ்வாறு அமைச்சர் எஸ்.பி.வேலுமணி பேசினார்.

இக்கூட்டத்தில் மாவட்ட ஆட்சித்தலைவர் கு.ராசாமணி, மாநகராட்சி ஆணையாளர் மற்றும் தனிஅலுவலர் ஷ்ரவன்குமார் ஜடாவத், சட்டமன்ற உறுப்பினர்கள் பி.ஆர்.ஜி.அருண்குமார், அம்மன் கே.அர்ச்சுணன், மாநகராட்சி துணை ஆணையாளர் ச.பிரசன்னா ராமசாமி, மாநகர பொறியாளர் ஆ.லட்சுமணன், உதவி ஆணையாளர்கள், பொறியாளர்கள் மற்றும் அலுவலர்கள் கலந்துகொண்டனர்.