தற்போதைய செய்திகள்

தமிழ்நாடு நுகர்பொருள் வாணிப கழகத்தின் மண்டல பணியாளர் விளையாட்டு போட்டி – திருவாரூரில் அமைச்சர் ஆர்.காமராஜ் தொடங்கி வைத்தார்….

திருவாரூர்:-

தமிழ்நாடு நுகர்பொருள் வாணிபக் கழகத்தின் சார்பில் 20-வது அனைத்து மண்டல பணியாளர்களுக்கு இடையேயான மாநில அளவிலான விளையாட்டு போட்டி ெதாடக்கவிழா திருவாரூர் மாவட்ட உள்விளையாட்டு அரங்கில் நடைபெற்றது. இந்நிகழ்ச்சிக்கு தமிழ்நாடு நுகர்பொருள் வாணிபக் கழக நிர்வாக இயக்குநர் மு.சுதாதேவி தலைமை வகித்தார். மாவட்ட ஆட்சியர் த.ஆனந்த் முன்னிலை வகித்தார்.

உணவுத்துறை அமைச்சர் ஆர்..காமராஜ் விளையாட்டு போட்டியை தொடங்கி வைத்து பேசியதாவது:-

அனைத்து மண்டல பணியாளர்களுக்கிடையே ஒற்றுமை மற்றும் சகோதரத்துவத்தை ஊக்குவிக்கும் வகையிலும், பணியாளர்களின் மனவலிமையை அதிகரிக்கவும், மனஅழுத்தத்தை குறைக்கும் வகையிலும் இது போன்ற எந்த ஒரு பொது துறையிலும் இல்லாத வண்ணம் தமிழ்நாடு நுகர்பொருள் வாணிபக் கழகத்தின் சார்பில் விளையாட்டு போட்டிகள் நடத்தப்பட்டு வருகிறது.

அதுமட்டுமில்லாமல் தமிழகத்தில் 2 கோடி குடும்ப அட்டைதாரர்களுக்கு விலையில்லா அரிசி வழங்கும் வாய்ப்பை பெற்றுள்ள துறை தமிழ்நாடு நுகர்பெருள் வாணிப கழகம் மட்டுமே. அதேபோன்று இந்தியாவிலேயே ஒரே நேரத்தில் தேசிய உணவு பாதுகாப்பு திட்டத்தையும், விலையில்லா அரிசி வழங்கும் திட்டத்தையும் செயல்படுத்தி வருகிற அரசு புரட்சித்தலைவி அம்மா அவர்களின் அரசு.

தமிழ்நாடு நுகர்பொருள் வாணிப கழகத்தில் தற்போது நிரந்தர பணியாளர்களாக 7500 பணியாளர்கள் பணியாற்றி வருகின்றனர். இப்பணியாளர்களுக்கு கைப்பந்து, கால்பந்து, கபடி, பூப்பந்து இரட்டையர் மற்றும் ஐவர், இறகுபந்து ஒற்றையர் மற்றும் இரட்டையர், வலைபந்து ஒற்றையர் மற்றும் இரட்டையர் போட்டிகள் நடத்தப்படுகிறது. பெண் பணியாளர்களுக்கென வலைபந்து ஒற்றையர் மற்றும் இரட்டையர் போட்டியும், கடந்த 2018 ஆண்டு முதல் எறிபந்து போட்டியும் சேர்க்கப்பட்டு தொடர்ந்து நடத்தப்பட்டு வருகிறது. மாற்றுத்திறனாளிகளுக்கு தொலைதூர பந்து எறிதல் போட்டியும் நடத்தப்பட்டு வருகிறது.

தற்பொழுது நடைபெறும் 20-வது அனைத்து மண்டல விளையாட்டுப்போட்டி முதன்முறையாக திருவாரூர் மண்டலத்தில் நடைபெறுகிறது. இதில் கைப்பந்து, கபடி மற்றும் எறிபந்து போட்டிகளில் சுமார் 650 பணியாளர்கள் விளையாட உள்ளனர். அதனைத்தொடர்ந்து தூத்துக்குடி மண்டலத்தில் 31.08.2019 மற்றும் 1.09.2019 ஆகிய தினங்களில் பூப்பந்து இரட்டையர் மற்றும் ஐவர் இறகுபந்து, ஒற்றையர் மற்றும் இரட்டையர் போட்டிகளும்,

கோயம்புத்தூர் மண்டலத்தில் 14.09.2019 மற்றும் 15.09.2019 ஆகிய தினங்களில் கால்பந்து மற்றும் வலைபந்து ஒற்றையர் மற்றும் இரட்டையர் போட்டியும்,நிறைவாக பின்னொரு நாளில் காஞ்சிபுரம் மண்டலத்தில் தடகளப்போட்டிகள் மற்றும் வெற்றிபெறும் வீரர்கள், வீராங்கனைகளுக்கு பரிசு வழங்கப்பட உள்ளது. எனவே பணியாளர்கள் உடலையும், உள்ளத்தையும் தூய்மையாக வைத்துக்கொள்ள இதுபோன்ற விளையாட்டு போட்டிகளில் பங்கேற்று எல்லா காலத்திலும் உடல் தகுதியோடு இருக்க வேண்டும்.

இவ்வாறு அமைச்சர் ஆர்.காமராஜ் பேசினார்.

இந்நிகழ்ச்சியில் தமிழ்நாடு நுகர்பொருள வாணிப கழக பொது மேலாளர் க.சிவசௌந்திரவள்ளி, மாவட்ட வருவாய் அலுவலர் பொன்னம்மாள், நுகர்பொருள் வாணிக்கழக முதுநிலை மண்டல மேலாளர் ப.மணிவண்ணன், வருவாய் கோட்டாட்சியர் முருகதாஸ், மாவட்ட விளையாட்டு அலுவலர் மு.முருகுவேந்தன் மற்றும் அரசு அலுவலர்கள், முன்னாள் உள்ளாட்சி அமைப்பின் பிரதிநிதிகள் கலந்து கொண்டனர்.