தற்போதைய செய்திகள்

பேரறிஞர் அண்ணா கொள்கையை கடைபிடிக்கும் ஒரே இயக்கம் கழகம் – கொள்கை பரப்பு செயலாளர் டாக்டர் மு.தம்பிதுரை பேச்சு

காஞ்சிபுரம்

அண்ணாவின் கொள்கைகளை கடைபிடிக்கும் ஒரே இயக்கம் அ.தி.மு.க. தான் என்று கொள்கை பரப்பு செயலாளர் டாக்டர் மு.தம்பிதுரை கூறினார்.

காஞ்சிபுரம் கிழக்கு மாவட்டம் பல்லாவரத்தில் மொழிப்போர் தியாகிகளுக்கு வீரவணக்க நாள் பொதுக்கூட்டம் மாவட்ட மாணவர் அணிச் செயலாளர் ஜி.எம்.சாந்தகுமார் தலைமையில் நடைபெற்றது. கூட்டத்திற்கு பல்லாவரம் நகர கழகச் செயலாளர் ப.தன்சிங், ஒன்றிய கழகச் செயலாளர் என்.சி.கிருஷ்ணன் ஆகியோர் முன்னிலை வகித்தனர்.

கூட்டத்தில் ஆலந்தூர் பகுதிக் கழகச் செயலாளர் வி.என்.வி.வெங்கட்ராமன், தாம்பரம் நகரக் கழகச் செயலாளர் எம்.கூத்தன், கழக மாணவர் அணி துணைச் செயலாளர் கோவிலம்பாக்கம் சி.மணிமாறன், மாவட்ட இலக்கிய அணிச் செயலாளர் எல்லார் செழியன், கழக நிர்வாகிகள் பி.கே.பரசுராமன், கோபிநாதன், இரா.மோகன், செல்வராணிசுந்தர், பீர்க்கன்கரை சம்பத், பம்மல் இளங்கோவன், விஜராகவன், தொழிற்சங்கம் தனபால், வழக்கறிஞர் சதிஷ், பல்லாவரம் சதிஷ், தேன்ராஜ், ஆர்.அஸ்வின் உட்பட ஏராளமானோர் கலந்துகொண்டனர்.

இக்கூட்டத்தில் கழகத்தின் கொள்கை பரப்பு செயலாளர் டாக்டர் மு.தம்பிதுரை பேசியதாவது:-

மொழிப்பற்று இல்லாவிட்டால் நாம் வாழும் வாழ்க்கை அர்த்தமற்றதாகி விடும். ஒரு நாடு உருவாகிறது என்றால் அந்த நாட்டு மக்களின் மொழியை வைத்து தான் அந்த நாடே உருவாகிறது. தமிழ் மொழி, தமிழ் கலாச்சாரம் இல்லாவிட்டால் நாம் வாழ்ந்தும் பயன் இல்லை. மொழிக்காக ஏராளமானோர் தங்கள் இன்னுயிரை நீத்தனர். அந்த வகையில் கரூர் மாவட்டத்தைச் சேர்ந்த தியாகி விராலிமலை சண்முகம் பேரறிஞர் அண்ணாவிற்கு எழுதிய கடிதத்தில் “எனது உயிர் உலுத்தர் கூட்டத்தை அழிக்கும். உடல் உறங்கிய தமிழரை உணர்வு கொண்டு எழச் செய்யும்” என்று எழுதி உயிர் விட்டார்.

மேலும் தியாகி சண்முகம் தனது சகோதரருக்கு எழுதிய கடிதத்தில் “தமிழுக்கு நான் செய்ய வேண்டிய கடமையை செய்துவிட்டேன். எம்.ஜி.ஆர். மன்றத்தை நன்றாக வளர்ச்சியடைய செய்வாய். இதுதான் எனது கடைசி ஆசை” என உணர்ச்சிப்பட எழுதியிருந்தார். இதை எதற்கு சொல்கிறேன் என்றால் மொழிப்போர் தியாகிகளுக்கு அஞ்சலி செலுத்தும் உரிமை நமக்கே உண்டு.

மேலும் பேரறிஞர் அண்ணாவால் இந்த போராட்டத்தை நடத்தி வெற்றிக்காண முடியும் என சண்முகம் போன்ற தியாகிகள் நினைத்திருந்தனர். அதன் விளைவாகத்தான் பேரறிஞர் அண்ணா போராட்டத்தை நடத்தி வெற்றிக்கண்டார். புரட்சித் தலைவர் கழகத்தை தோற்றுவித்தவுடனே பேரறிஞர் அண்ணாவின் பெயரை இணைத்து “அனைத்திந்திய அண்ணா திராவிட முன்னேற்றக் கழகம்” என பெயர் சூட்டினார். இதன் மூலம் புரட்சித்தலைவர் தமிழ்மொழி மீது எந்த அளவிற்கு பற்று வைத்துள்ளார் என்பதனை நாம் அறிந்துகொள்ள முடிகிறது.

பேரறிஞர் அண்ணா நாடாளுமன்றத்தில் உரையாற்றுகையில் “தமிழ்மொழியை ஆட்சிமொழியாக்க வேண்டும்” என்று வலியுறுத்தினார். 1993ம் ஆண்டு கழக ஆட்சி நடைபெற்றுக் கொண்டிருந்த போது இதயதெய்வம் அம்மா அவர்கள் செயற்குழுவில் “இந்தியை எந்நாளும் நாம் ஏற்றுக் கொள்ள மாட்டோம். தமிழ்மொழியை ஆட்சி மொழியாக்க வேண்டும்” என்று தீர்மானம் கொண்டு வந்தார். பேரறிஞர் அண்ணாவின் கொள்கைகளை கடை பிடித்தது இதயதெய்வம் அம்மாவின் அவர்களின் ஆட்சி. ஆனால் தி.மு.க. அண்ணாவின் கொள்கைகளை மறந்து காற்றில் பறக்க விட்டு விட்டது.

இவ்வாறு கழகத்தின் கொள்கை பரப்புச் செயலாளர் டாக்டர் மு.தம்பிதுரை பேசினார்.