தற்போதைய செய்திகள்

கழகத்தின் வெற்றி தொடரும் – அமைச்சர் வெ.சரோஜா உறுதி

திருவண்ணாமலை

கழகத்தின் வெற்றி தொடரும் என்று அமைச்சர் வெ.சரோஜா உறுதிபட தெரிவித்தார்.

திருவண்ணாமலை வடக்கு மாவட்டம் செய்யாறை அடுத்த மாமண்டூரில் கழகம் சார்பில் மொழிப்போர் தியாகிகள் வீரவணக்கநாள் பொதுக்கூட்டம் நடைபெற்றது. கூட்டத்திற்கு மாவட்ட கழக செயலாளரும். செய்யாறு தொகுதி சட்டமன்ற உறுப்பினருமான தூசி கே.மோகன் தலைமை வகித்தார். சிறப்பு விருந்தினராக சமூக நலத்துறை அமைச்சர் வி.சரோஜா, முன்னாள் அமைச்சர் முக்கூர் என்.சுப்பிரமணியன் ஆகியோர் சிறப்புரையாற்றினர்.

இக்கூட்டத்தில் அமைச்சர் வெ.சரோஜா பேசியதாவது:-

தமிழகத்தில் 1965-ல் இந்தி மட்டுமே ஆட்சிமொழி என காங்கிரஸ் கட்சி அறிவித்தது. அப்போதிருந்த 36 கோடி பேரில் இரண்டரை கோடி பேர் இந்தி பேசினர். இதனால் மேலும் போராட்டம் வலுத்தது. அண்ணா தலைமையில் போராட்டம் வலு பெற்றது. இதில் பலர் தீக்குளித்து இறந்தனர்.

போராட்டம் வலுப்பெறவே இந்தியுடன் ஆங்கிலமும் ஆட்சி மொழியாக அறிவிக்கப்பட்டது. இவ்வாறு போராட்டங்கள் நடைபெற்றதில் உயிரிழந்தவர்களின் நினைவாக மொழிப்போர் தியாகிகள் கூட்டம் நடத்தப்படுகிறது. கழக ஆட்சியில் தமிழகம் முன்னேற்ற பாதையில் சென்று கொண்டிருக்கிறது.நடந்து முடிந்த உள்ளாட்சி தேர்தலில் கழகம் பெருவாரியான இடங்களில் வெற்றி பெற்றுள்ளது. வரும் மாநகராட்சி, நகராட்சி, பேரூராட்சி தேர்தலில் கழகத்தின் வெற்றி தொடரும்.

இவ்வாறு அமைச்சர் டாக்டர் வெ.சரோஜா பேசினார்.

இக்கூட்டத்தில் தலைமை கழக பேச்சாளர் இடிமுரசு ரவி, மாவட்ட மாணவரணி செயலாளர் சுரேஷ் நாராயணன், முன்னாள் எம்.எல்.ஏ.க்கள் ஜெயசுதா, அரங்கநாதன், ஒன்றிய செயலாளர்கள் செல்வராசன், பச்சியப்பன், ரவிச்சந்திரன், ஐடி விங் மாவட்ட செயலாளர் மணி, உள்பட பலர் கலந்து கொண்டனர்.