தற்போதைய செய்திகள்

தஞ்சை குடமுழுக்கு விழாவுக்கு 250 சிறப்பு பேருந்துகள் இயக்கம் – அமைச்சர் எம்.ஆர்.விஜயபாஸ்கர் தகவல்

சென்னை

தஞ்சை குடமுழுக்கு விழாவுக்கு 250 சிறப்பு பேருந்துகள் இயக்கப்படும் என்று போக்குவரத்துத்துறை அமைச்சர் எம்.ஆர்.விஜயபாஸ்கர் தெரிவித்தார்.

பேரறிஞர் அண்ணாவின் 51-வது நினைவு நாளை முன்னிட்டு சென்னை கோயம்பேட்டில் உள்ள அருள்மிகு குறுங்காளீஸ்வரர் திருக்கோயிலில் நடைபெற்ற பொது விருந்தில் போக்குவரத்துத்துறை அமைச்சர் எம்.ஆர்.விஜயபாஸ்கர் பங்கேற்றார். பின்னர் அவர் செய்தியாளர்களிடம் கூறியதாவது:-

உலகப் புகழ் பெற்ற தஞ்சை பிரகதீஸ்வரர் கோயில் குடமுழுக்கு விழாவிற்கு செல்கின்ற பக்தர்களின் வசதிக்காக தமிழகத்தின் அனைத்து முக்கிய ஊர்களிலிருந்தும் பொதுமக்கள் வந்து செல்ல வசதியாக போக்குவரத்துக் கழகங்கள் மூலம் 250 சிறப்பு பேருந்துகள் இயக்குவதற்கு ஏற்பாடு செய்திருக்கிறோம். இருந்தபோதிலும் மக்கள் கூட்டம் அதிகமாக இருந்தால் அந்தந்த பகுதியில் இருந்து தேவையான அளவிற்கு பேருந்துகளை இயக்கிட போக்குவரத்துத் துறை அதிகாரிகளுக்கு அறிவுறுத்தப்பட்டுள்ளது.

முதலமைச்சர் பயணிகள் பாதுகாப்பாகவும், சிரமமில்லாமலும் அந்த குடமுழுக்கு நிகழ்ச்சியில் கலந்து கொள்வதற்கு தேவையான ஏற்பாடுகளை செய்து கொடுக்க வேண்டும் என்று உத்தரவிட்டிருக்கிறார். அதன் அடிப்படையில் நாங்கள் முன்னெச்சரிக்கை ஏற்பாடுகளை சிறப்பாக செய்துள்ளோம்.

இவ்வாறு அமைச்சர் எம்.ஆர்.விஜயபாஸ்கர் கூறினார்.