தற்போதைய செய்திகள்

தேர்தலை நேர்மையாக நடத்த வேண்டும் – 27 மாவட்ட கலெக்டர்களுக்கு தேர்தல் ஆணையம் உத்தரவு

சென்னை

உள்ளாட்சி தேர்தலை நேர்மையாகவும், ஜனநாயக முறையிலும் நடத்த நடவடிக்கை எடுக்க வேண்டும் என்று மாவட்ட கலெக்டர்களுக்கு மாநில தேர்தல் ஆணையர் இரா.பழனிசாமி உத்தர விட்டுள்ளார்.

தேர்தல் ஏற்பாடுகள் தொடர்பாக தேர்தல் அதிகாரிகளான 27 மாவட்ட கலெக்டர்களுடன் தமிழ்நாடு மாநில தேர்தல் ஆணையர் இரா.பழனிசாமி ஆலோசனை நடத்தினார்.சென்னை கோயம்பேட்டில் உள்ள மாநில தேர்தல் ஆணையர் அலுவலகத்தில் இருந்து ‘வீடியோ கான்பரன்சிங்’ (காணொலி காட்சி) மூலம் இந்த ஆலோசனை கூட்டம் நடைபெற்றது.இந்த கூட்டத்தில் மாவட்ட கலெக்டர்களுக்கு மாநில தேர்தல் ஆணையர் இரா.பழனிசாமி வழங்கிய அறிவுரைகள் வருமாறு:-

* தேர்தல் நடத்தை விதிகளை உடனடியாக அமல்படுத்த வேண்டும்.

* பறக்கும்படை, இணையவழி கண்காணிப்பு, ‘வீடியோ’ ஒளிப்பதிவு செய்ய வேண்டும். நுண்பார்வை யாளர்கள் மூலமாக தேர்தல் நடத்தை விதிகளை நடைமுறைப்படுத்த வேண்டும்.

* மாவட்ட அளவில் தேர்தல் பொறுப்பு அலுவலர்களை நியமிக்க வேண்டும்.

* தேதிவாரியாக செயல்திட்டத்தை தயாரிக்க வேண்டும்.

* அனைத்துக்கட்சி கூட்டத்தினை மாவட்ட தேர்தல் அலுவலர், தேர்தல் அலுவலர் ஆகியோர் நடத்த வேண்டும்.

* வாக்குச்சாவடி அலுவலர்களை நியமனம் செய்து பயிற்சி அளிக்க வேண்டும்.

* துணை வாக்காளர் பட்டியலில் வாக்காளர்களை சேர்த்தல் மற்றும் நீக்குதல் நடவடிக்கைகளை மேற்கொள்ள வேண்டும்.

* கட்சி சார்ந்த தேர்தலுக்கான வாக்குச்சீட்டு அச்சிட அச்சகத்தை தேர்ந்தெடுக்க வேண்டும்.

* வாக்குச்சாவடி மற்றும் வாக்கு எண்ணிக்கை மையங்கள் அமைப்பதற்கான முன்னேற்பாடு பணிகளை மேற்கொள்ள வேண்டும்.

* வாக்குப்பெட்டி மற்றும் வாக்குச்சாவடிக்கான பொருட்களை கொண்டு சேர்த்து வாக்குப்பதிவுக்கு தயாராக வேண்டும்.

* பதற்றமான மற்றும் பிரச்சினைக்குரிய வாக்குச்சாவடிகளை கண்டறிந்து, போலீஸ் அதிகாரிகளுடன் ஆலோசனை நடத்த வேண்டும்.

* தமிழ்நாடு மாநில தேர்தல் ஆணையத்தின் இணையதளத்தில் வேட்புமனுத்தாக்கல் முதல் தேர்தல் முடிவு அறிவித்தல் வரையிலான புள்ளி விவரங்களை பதிவேற்றம் செய்ய வேண்டும்.

* வேட்பாளர் செலவினம் தொடர்பான விலைப்பட்டியலை நிர்ணயம் செய்ய வேண்டும்.

இந்த தகவல் தமிழ்நாடு மாநில தேர்தல் ஆணையம் வெளியிட்ட செய்திக்குறிப்பில் தெரிவிக்கப்பட்டுள்ளது.