நாகப்பட்டினம்

நாகூரில் 463 -ம் ஆண்டு கந்தூரி விழா – ஆயிரக்கணக்கானோர் திரண்டனர்

நாகப்பட்டினம்,

நாகப்பட்டினம் உலக புகழ் பெற்ற நாகூர் தர்காவின் 463ம் ஆண்டு கந்தூரி விழாவின் முக்கிய நிகழ்வான சந்தனக் கூடு ஊர்வலத்தில் பல்லாயிரக்கணக்கானோர் திரண்டனர்.

நாகூர் ஆண்டவர் என போற்றப்படும் செய்யது சாகுல் ஹமீது பாதுஷாவின் நினைவு தினம் ஒவ்வொரு ஆண்டும் கந்தூரி விழாவாக கொண்டாடப்பட்டு வருகிறது. அதன்படி இந்த ஆண்டு புகழ்பெற்ற நாகூர் தர்காவின் 463-ம் ஆண்டு கந்தூரி விழா கடந்த மாதம் ஜனவரி 26-ந்தேதி கொடியேற்றத்துடன் துவங்கியது. முன்னதாக நேற்றுமுன்தினம் இரவு சந்தனக்கூடு ஊர்வலம் நாகப்பட்டினத்திலிருந்து துவங்கியது.

மின்விளக்குகளால் அலங்கரிக்கப்பட்ட சந்தனக்கூடு, நாகப்பட்டினத்திலுள்ள முக்கிய வீதிகள் வழியாக கலைநிகழ்ச்சியுடன் தாரை தப்படைகள், பேண்டு வாத்தியங்கள் முழங்க இளைஞர்கள் சந்தனக்கூடு மற்றும் பல்வேறு வடிவில் வண்ண விளக்குகளால் அலங்கரித்து வந்த மனோராக்களை நடனமாடி வரவேற்றனர்.

அப்போது ஊர்வலத்தில் வழி நெடுகிலும் நின்றிருந்த ஆயிரக்கணக்கான இஸ்லாமியர்கள் சந்தனக்கூட்டின் மீது பூக்களை தூவியும் பல்வேறு வடிவில் வந்த மனோராக்களை கண்டும் மகிழ்ந்தனர். தொடர்ந்து சந்தனக்கூடு ஊர்வலமானது அதிகாலை 4 மணிக்கு நாகூரை வந்தடைந்தது. பின்னர், நாகூர் ஆண்டவர் சமாதியில் நடைபெற்ற சந்தனம் பூசும் வைபவத்தில் பல்லாயிரக்கணக்கானோர் கலந்து கொண்டனர்.