தற்போதைய செய்திகள்

கலப்படம் செய்வதை தடுக்க தனியார் பால் பரிசோதனை – அமைச்சர் கே.டி.ராஜேந்திர பாலாஜி பேட்டி

சென்னை

தனியார் பாலில் கலப்படம் இருக்கக்கூடாது என்பதை தொடர்ந்து கண்காணித்து வருகிறோம் என அமைச்சர் கே.டி.ராஜேந்திர பாலாஜி கூறினார்.

சென்னை தலைமை செயலகம் நாமக்கல் கவிஞர் மாளிகையில் உள்ள கூட்ட அரங்கில் பால்வளத்துறை தொடர்பான ஆய்வுக்கூட்டம் முதலமைச்சர் எடப்பாடி கே.பழனிசாமி தலைமையில் டைபெற்றது. இக்கூட்டத்தில் துணை முதலமைச்சர் ஓ.பன்னீர்செல்வம், பால்வளத்துறை அமைச்சர் கே.டி.ராஜேந்திர பாலாஜி மற்றும் அமைச்சர்கள், அதிகாரிகள் பங்கேற்றனர்.

கூட்டம் முடிந்த பின்னர் அமைச்சர் கே.டி.ராஜேந்திர பாலாஜி கூறியதாவது:-

கூட்டத்தில் பால்வளத்துறையின் வளர்ச்சி குறித்து ஆலோசிக்கப்பட்டது. இந்தியாவில் பால்வளத்துறையில் உயர்ந்த மாநிலமாக தமிழகத்தை மாற்ற வேண்டும், ஏற்றுமதி செய்யும் பாலின் அளவை அதிகரிக்க வேண்டும் என்று முதலமைச்சர் உத்தரவிட்டுள்ளார். மேலும் பாலில் கலப்படம் இருக்கக்கூடாது என்றும் முதலமைச்சர் கண்டிப்புடன் கூறினார்.

இவ்வாறு அமைச்சர் கே.டி.ராஜேந்திர பாலாஜி கூறினார்.

மேலும் தனியார் பாலில் உள்ள கலப்படம் குறித்து கேட்டபோது தனியார் பால் தொடர்ந்து கண்காணிக்கப்பட்டு வருகிறது. அனைத்து பாலும் பரிசோதிக்கப்படுகிறது என்றும் அமைச்சர் கே.டி.ராஜேந்திர பாலாஜி கூறினார்.