சிறப்பு செய்திகள்

வேங்கிக்கால் ஊராட்சியில் ரூ.3 கோடியில் அறிவியல் பூங்கா – அமைச்சர் எஸ்.பி.வேலுமணி திறந்து வைத்தார்

திருவண்ணாமலை:-

வேங்கிக்கால் ஊராட்சியில் ரூ.3 கோடி மதிப்பீட்டில் அறிவியல் பூங்காவை நகராட்சி நிர்வாகம், ஊரக வளர்ச்சி மற்றும்
சிறப்புத் திட்டங்கள் செயலாக்கத்துறை அமைச்சர் எஸ்.பி.வேலுமணி திறந்து வைத்தார்.

திருவண்ணாமலை மாவட்டம், திருவண்ணாமலை ஊராட்சி ஒன்றியம், வேங்கிக்கால் கிராம ஊராட்சி, மாவட்ட ஆட்சியரகம் எதிரில் அமைந்துள்ள ஏரிக்கரை அருகில் ஊரக வளர்ச்சி மற்றும் ஊராட்சித் துறை மூலமாக மாநில நிதிக்குழு, ஊராட்சி ஒன்றிய பொது நிதி, கனிமங்கள் மற்றும் சுரங்கங்கள் நல நிதி, சமூக பொறுப்பு நிதி ஆகிய திட்டங்களின் கீழ் 2019-2020ம் ஆண்டு ரூ.3 கோடி மதிப்பீட்டில் அமைக்கப்பட்டுள்ள புதிய அறிவியல் பூங்காவை பொதுமக்களின் பயன்பாட்டிற்காக நகராட்சி நிர்வாகம், ஊரக வளர்ச்சி மற்றும் சிறப்புத் திட்டங்கள் செயலாக்கத்துறை அமைச்சர் எஸ்.பி.வேலுமணி திறந்து வைத்து பார்வையிட்டார்.

இந்நிகழ்ச்சியில் இந்து சமய அறநிலையத்துறை அமைச்சர் சேவூர் எஸ்.இராமச்சந்திரன், மாவட்ட ஆட்சித்தலைவர் க.சு.கந்தசாமி, செய்யாறு தொகுதி சட்டமன்ற உறுப்பினர் தூசி கே.மோகன், திருவண்ணாமலை மாவட்ட பால் உற்பத்தியாளர்கள் கூட்டுறவு ஒன்றியத் தலைவர் அக்ரி எஸ்.எஸ்.கிருஷ்ணமூர்த்தி, மாவட்ட மத்திய கூட்டுறவு வங்கித் தலைவர் பெருமாள் நகர் கே.ராஜன், மாவட்ட ஊரக வளர்ச்சி முகமை திட்ட இயக்குநர் பா.ஜெயசுதா, முன்னாள் அமைச்சர் ராமச்சந்திரன், முன்னாள் நாடாளுமன்ற உறுப்பினர் ஆர்.வனரோஜா, முன்னாள் சட்டமன்ற உறுப்பினர் ஏ.கே.அரங்கநாதன், அரசு அலுவலர்கள், உள்ளாட்சிப் பிரதிநிதிகள், கூட்டுறவு சங்கங்களின் நிர்வாகிகள், பள்ளி மாணவ, மாணவிகள் மற்றும் பொதுமக்கள் கலந்து கொண்டனர்.

பின்னர் அமைச்சர் எஸ்.பி.வேலுமணி செய்தியாளர்களிடம் தெரிவித்ததாவது:-

திருவண்ணாமலை வேங்கிக்கால் பகுதியில் திறக்கப்பட்டுள்ள அறிவியல் பூங்கா சிறப்பான பூங்காவாக எங்கள் துறை மூலமாக அமைக்கப்பட்டுள்ளது. தமிழகத்தில் எங்கும் இந்த மாதிரியான அறிவியல் பூங்கா அமைக்கப்படவில்லை. இச்சிறப்பான அறிவியல் பூங்கா அமைவதற்கு காரணமாக இருந்த திருவண்ணாமலை மாவட்ட அமைச்சர், ஆட்சியர், ஊரக வளர்ச்சித் துறையினருக்கு வாழ்த்துக்களை தெரிவித்துக் கொள்கிறேன். குறிப்பாக மாவட்ட ஆட்சியரின் முயற்சியால் அற்புதமான அறிவியல் பூங்கா அமைக்கப்பட்டுள்ளது. தமிழகத்தில் பல்வேறு இடங்களில் பெரிய பூங்காக்கள் அதிக செலவில் அமைக்கப்பட்டிருந்தாலும், திருவண்ணாமலை வேங்கிக்காலில் அமைக்கப்பட்டுள்ள அறிவியல் பூங்கா ரூ.3 கோடி குறைந்த செலவில் அமைக்கப்பட்டிருந்தாலும் நிறைவாக இருந்தது.

மாணவர்களிடையே அறிவியல் குறித்த அடிப்படை அறிவினை முறை சாரா வகையில் ஏற்படுத்துவதே அறிவியல் பூங்காவின் முக்கிய நோக்கமாகும். மாணவர்கள் எளிதில் அணுகும் வகையில் அறிவியல் உபகரணங்கள் திறந்தவெளியில் அமைக்கப்பட்டு மாணவர்களிடையே அறிவியல் ஆர்வத்தை துண்டும் வகையில் திருவண்ணாமலை மாவட்டம் – திருவண்ணாமலை வட்டாரம் – வேங்கிக்கால் ஊராட்சியில் மாவட்ட ஆட்சியர் அலுவலக பெருந்திட்ட வளாகத்தின் எதிரே அறிவியல் பூங்கா அமைக்கப்பட்டுள்ளது. மாணவர்கள் கல்வி முறையில் அல்லாது விளையாட்டு முறையில் அறிவியல் சம்மந்தமான நுனுக்கமான விவரங்களை அறிந்துகொள்ள அறிவியல் பூங்கா பெரிதும் உதவுகிறது.

அறிவியல் பூங்காவில் எந்திர பொறியியல், ஒளி, ஒலி, வெப்பம், இயற்பியல், உயிரியல், வான்வெளியியல் சம்மந்தனமான அறிவியல் மாதிரி உபகரணங்கள் அமைக்கப்பட்டுள்ளது. மேலும், அறிவியல் பூங்காவில் சிறப்பு அம்சமாக அரைவட்ட திறந்தவெளி அரங்கம் அமைக்கப்பட்டுள்ளது. இந்த திறந்தவெளி அரைவட்ட அரங்கத்தில் அறிவியல் சம்மந்தமான பொழுது போக்கு நிகழ்ச்சிகள், அறிவியல் ஆர்வத்தை தூண்டும் வகையில் கருத்து பட்டறைகள், பேச்சுபோட்டி மற்றும் இதர கலைநிகழ்சிகள் நடத்திடவும் திட்டமிடப்பட்டுள்ளது. இந்நிகழ்வுகள் மாணவர்களிடையே அறிவியல் சம்மந்தமான விழிப்புணர்வினை ஏற்படுத்திட ஒரு காரணியாக அமையும். இதனை தவிர்த்து சிறார்கள், மாணவர்கள், மூத்தகுடிமக்கள் ஆகியோர் பயன்பெறும் வகையில் விளையாட்டு உபகரணங்கள், உடற்பயிற்சி உபகரணங்கள் மற்றும் நடைமேடை ஆகியன அமைக்கப்பட்டு தற்போது செயல்பாட்டுக்கு கொண்டு வரப்படுகிறது’

இவ்வாறு அமைச்சர் எஸ்.பி.வேலுமணி தெரிவித்தார்.

முன்னதாக அமைச்சர்கள் அறிவியல் பூங்காவை திறந்து வைத்து அங்கு அமைக்கப்பட்டிருந்த நடைபாதை, உடற்பயிற்சி உபகரணங்கள், குழந்தைகள் விளையாட்டு பொருட்கள், மாணவர்களுக்கான அறிவியல் சார்ந்த பொருட்கள் ஆகியவற்றை நேரில் பார்வையிட்டனர். அமைச்சர்கள் முன்னிலையில் பள்ளி மாணவர்களின் மல்லர் கம்பம் சாகச நிகழ்ச்சி நடத்திக் காண்பிக்கப்பட்டது. மேலும், அறிவியல் பூங்காவில் அமைந்துள்ள திறந்தவெளி அரங்கத்தில் நடைபெற்ற பள்ளி மாணவர்களின் வீணை இசைக் கச்சேரி, கோலாட்டம், விழிப்புணர்வு நடனம் ஆகிய நிழகச்சிகளை அமைச்சர்கள், பள்ளி மாணவர்களுடன் பார்த்து ரசித்து, பாராட்டு தெரிவித்தனர்.