தற்போதைய செய்திகள்

சொந்த கட்சிக்காரர்களை திமுகவினரே கொலை செய்கிறார்கள் – ஸ்டாலினுக்கு, அமைச்சர் ஆர்.பி.உதயகுமார் கடும் தாக்கு…

வேலூர்:-

தி.மு.க.வினரை, தி.மு.க.வினரே கொலை செய்கிறார்கள். அதை கண்டிக்க வக்கில்லாத ஸ்டாலின் தமிழகத்தின் சட்டம் ஒழுங்கை குறை கூறுவது வேடிக்கையாக உள்ளது என்று அமைச்சர் ஆர்.பி.உதயகுமார் கடுமையாக தாக்கி பேசினார்.

வேலூர் நாடாளுமன்ற தொகுதி கழக வேட்பாளர் ஏ.சி.சண்முகத்தை ஆதரித்து மதுரை புறநகர் மேற்கு மாவட்டக்கழகச் செயலாளரும், வருவாய்த்துறை அமைச்சருமான ஆர்.பி.உதயகுமார், ஆம்பூர் சட்டமன்ற தொகுதிக்குட்பட்ட மாதனூர் ஒன்றிய பகுதியில் கிராமம் கிராமமாக சென்று இரட்டைஇலை சின்னத்திற்கு வாக்கு சேகரித்தார்.

அப்போது அவருடன் கழக அமைப்புச் செயலாளர் முத்துராமலிங்கம், சட்டமன்ற உறுப்பினர்கள் மாணிக்கம், சரவணன், முன்னாள் மாவட்ட செயலாளர் ஜெயராமன், ஒன்றிய கழக செயலாளர் ரவிச்சந்திரன், அன்பழகன், ராமசாமி, மகாலிங்கம், செல்லப்பாண்டி ராஜா, மாவட்ட கழக துணைச் செயலாளர் ஐயப்பன், மாவட்ட இலக்கிய அணி செயலாளர் திருப்பதி உட்பட பலர் கலந்து கொண்டனர்.

இந்த வாக்குசேகரிப்பின்போது அமைச்சர் ஆர்.பி.உதயகுமார் பேசியதாவது:-

கழக வேட்பாளர் ஏ.சி.சண்முகம் ஏற்கனவே உங்களுக்கு நன்கு அறிமுகமானவர். இவர் இதற்கு முன் சட்டமன்ற உறுப்பினராகவும் நாடாளுமன்ற உறுப்பினராகவும் இருந்து உங்களுக்கு பணியாற்றியவர். ஆனால் திமுக சார்பில் போட்டியிடும் கதிர்ஆனந்த் இந்த தொகுதி மக்களுக்கு என்ன செய்தார். பலமுறை அமைச்சராக இருந்த துரைமுருகன், வேலூர் தொகுதியில் ஏதாவது திட்டத்தை கொண்டு வந்தது உண்டா?

திமுக வேட்பாளரை ஆதரித்து ஸ்டாலின் பிரச்சாரம் செய்த போது தமிழகத்தில் சட்டம் ஒழுங்கு சரியில்லை என்று கூறினார். மக்களே நீங்கள் நன்கு புரிந்து கொள்ள வேண்டும். சமீபத்தில் நிகழ்ந்த நெல்லை முன்னாள் மேயர் உமாமகேஸ்வரி கொலை வழக்கில் கைது செய்யப்பட்டிருப்பது தி.மு.க.வை சேர்ந்த சீனியம்மாள் மகன். ஆகவே தி.மு.க.வினரை, தி.மு.க.வினரே கொலை செய்துவிட்டு சட்டம் ஒழுங்கு சரியில்லை என்று கூறுவது மிகவும் வேடிக்கையாக இருக்கிறது. முதலில் தி.மு.க நிர்வாகிகள் எப்படி ஒழுக்கத்துடன் செயல்பட வேண்டும் என்று ஸ்டாலினுக்கு புத்தி புகட்ட வேண்டும்.

அதுமட்டுமல்லாது ஓசி பிரியாணி கேட்டு கடையை தாக்குவது, ஓசி பஜ்ஜி கேட்டு கடைக்காரை தாக்குவது, அழகு நிலையத்தில் உள்ள பெண்களை தாக்குவது, செல்போன் கடையில் கடை ஊழியர் தாக்குவது, இதுபோன்று பல்வேறு அராஜக செயலில் திமுகவினர் ஈடுபட்டு வருகின்றனர். சட்ட ஒழுங்கை பாழ்படுத்தி வரும் திமுகவினரை கண்டிக்காமல் தொடர்ந்து தமிழகத்தில் சட்டம் ஒழுங்கு கெட்டு விட்டது என்று ஸ்டாலின் கூறுவது மிக வெட்ககேடானது ஆகும். ஆனால் இன்றைக்கு அராஜக செயலில் ஈடுபட்டு வரும் தி.மு.க.வினரை கைது செய்து மக்களை நாங்கள் பாதுகாத்து வருகிறோம். ஆகவே மக்களாகிய நீங்கள் இந்த தேர்தலில் தி.மு.க.வுக்கு சரியான பாடத்தை புகட்டுங்கள். கழக வெற்றி வேட்பாளரை அமோக வெற்றிபெறச் செய்யுங்கள்.

இவ்வாறு அமைச்சர் ஆர்.பி.உதயகுமார் பேசினார்.