தற்போதைய செய்திகள்

தருமபுரி மாவட்டத்தில் 50 ஆயிரம் பேர் மனு – அமைச்சர் கே.பி.அன்பழகன் தகவல்…

தருமபுரி:-

தருமபுரி மாவட்டத்தில் நடைபெற்ற முதலமைச்சரின் சிறப்பு குறை தீர்க்கும் திட்ட முகாமில் இதுவரை 50 ஆயிரம் பேர் மனு செய்துள்ளதாக அமைச்சர் கே.பி.அன்பழகன் தெரிவித்தார்.

தருமபுரி மாவட்டம், காரிமங்கலம் வட்டம், பெரியாம்பட்டியில் முதலமைச்சரின் சிறப்பு குறை தீர்க்கும் திட்ட முகாம் மாவட்ட ஊரக வளர்ச்சி முகமை திட்ட இயக்குநர் காளிதாசன் தலைமையில் நடைபெற்றது. உயர்கல்வித்துறை அமைச்சர் கே.பி.அன்பழகன் கலந்து கொண்டு பொது மக்களிடமிருந்து கோரிக்கை மனுக்களை பெற்றுக்கொண்டு உரிய மேல்நடவடிக்கை மேற்கொள்ள சம்பந்தப்பட்ட அலுவலர்களுக்கு உத்தரவிட்டார்.

பின்னர் அமைச்சர் கே.பி.அன்பழகன் செய்தியாளர்களிடம் கூறியதாவது:-

மக்களை நாடி அரசு என்ற முனைப்போடு முன்னாள் முதலமைச்சர் புரட்சித்தலைவி அம்மா அவர்கள் அம்மா திட்டம் என்ற சிறப்பு திட்டத்தை செயல்படுத்தி வந்தார். இதன் அடிப்படையில் தற்போதைய முதல்வர் ஒவ்வொரு வருவாய் கிராம அளவிலும் அரசு அலுவலர்கள் சென்று மக்களிடம் குறைகளை கேட்கும் வகையில் முதலமைச்சரின் சிறப்பு முகாம்கள் தமிழகம் முழுவதும் தொடங்கப்பட்டு நடைபெற்று வருகிறது. மொத்தம் 8 நாட்கள் நடைபெறும் இந்த மக்கள் குறைதீர் திட்ட முகாம்களில் பெறப்படும் மனுக்கள் மீது 30 நாட்களுக்குள் தீர்வு ஏற்படும் வகையில் மாவட்ட நிர்வாகம் நடவடிக்கைகளை மேற்கொண்டு வருகிறது.

தருமபுரி மாவட்டத்தில் இந்த முகாமில் 30.08.2019 வரை 50 ஆயிரத்துக்கும் மேற்பட்ட மனுக்கள் பொதுமக்களிடமிருந்து பெறப்பட்டு உள்ளது. இந்த முகாம்களில் அதிக அளவில் வீட்டுமனை பட்டா, முதியோர் உதவித்தொகை கோரிக்கை மனுக்களாக உள்ளது. தமிழக அரசு அதிக அளவில் கடந்த மூன்று ஆண்டுகளில் வீட்டுமனை பட்டாக்களை வழங்கி வருகிறது. தருமபுரி மாவட்டத்தில் அனைத்து பகுதிகளிலும் மக்களின் கோரிக்கையை ஏற்று வீட்டுமனை பட்டாக்கள் வழங்கப்பட்டு வருகிறது.

தமிழகத்தில் நீர் மேலாண்மை திட்டங்களுக்கு அரசு முன்னுரிமை அளித்து செயல்படுத்தி வருகிறது. மக்களின் தேவைகளை அறிந்து அரசு பல்வேறு திட்டங்களை சிறப்பாக செயல்படுத்தி வருகிறது. பொதுமக்கள் முதலமைச்சரின் சிறப்பு குறைதீர் திட்டத்தின் மூலம் பயன்பெற வேண்டும். மேலும் அரசின் இந்த வாய்ப்பை அனைவரும் பயன்படுத்திக் கொள்ள வேண்டும்.

இவ்வாறு அமைச்சர் கே.பி.அன்பழகன் கூறினார்.

இந்நிகழ்ச்சியில் பாப்பிரெட்டிப்பட்டி சட்ட மன்ற உறுப்பினர் எ.கோவிந்தசாமி, மாவட்ட ஊரக வளர்ச்சி முகமை திட்ட இயக்குநர் காளிதாசன், தருமபுரி சார் ஆட்சியர் ம.ப.சிவன் அருள், பாலக்கோடு கூட்டுறவு சர்க்கரை ஆலைத்தலைவர் தொ.மு.நாகராஜன், வட்டாட்சியர்கள் கலைச்செல்வி, வெங்கடேஸ்வரன், முன்னாள் ஊராட்சி ஒன்றியக்குழுத் தலைவர் கோபால், மாவட்ட மத்திய கூட்டுறவு வங்கி இயக்குநர் சிவபிரகாசம் ஆகியோர் கலந்து கொண்டனர்.