தற்போதைய செய்திகள்

வேலூர் மாவட்ட குடிமராமத்து பணிக்கு ரூ.16.61 கோடி ஒதுக்கீடு – அமைச்சர் நிலோபர் கபீல் தகவல்…

வேலூர்:-

வேலூர் மாவட்ட குடிமராமத்து பணிகளுக்கு ரூ.16.61 கோடி ஒதுக்கீடு செய்யப்பட்டு உள்ளதாக அமைச்சர் நிலோபர் கபீல் தெரிவித்தார். வேலூர் மாவட்டம் வாணியம்பாடி சட்டமன்ற தொகுதி நாட்றம்பள்ளி ஒன்றியம் ராமநாயக்கன் பேட்டை ஐயனேரி ஏரியில் குடி மராமத்து பணி தொடக்க விழா மாவட்ட ஊரக வளர்ச்சி முகமை அலுவலர் பெரியசாமி தலைமையில் நடைபெற்றது. நிகழ்ச்சியில் தொழிலாளர் நலத்துறை அமைச்சர் டாக்டர் நிலோபர் கபீல் கலந்து கொண்டு பூமி பூஜை செய்து குடி மராமத்து பணிகளை தொடங்கி வைத்தார்.

அப்போது அமைச்சர் நிலோபர் கபீல் செய்தியாளர்களிடம் கூறியதாவது:-

வேலூர் மாவட்டத்தில் மாவட்ட ஊரக வளர்ச்சி மற்றும் ஊராட்சித்துறை மூலம் ரூ.16.61 கோடி நிதி ஒதுக்கீடு செய்யப்பட்டு ஏரி குளங்கள் தூர்வாரப்பட்டு போர்க்கால அடிப்படையில் பணிகள் நடைபெற்று வருகின்றன. வாணியம்பாடி தொகுதிக்குட்பட்ட பகுதிகளில் உள்ள ஏரி குளங்களில் தூர்வார ரூ 3 கோடி நிதி ஒதுக்கீடு செய்யப்பட்டு குடிமராமத்து பணிகள் மற்றும் சாலை வசதி திட்டங்கள் செயல் படுத்துபட்டு வருகிறது.

இவ்வாறு அமைச்சர் நிலோபர் கபீல் தெரிவித்தார்.

இதன்பின்னர் வாணியம்பாடி தொகுதிக்குட்பட்ட கிராமங்களிலுள்ள 9 ஏரிகள் 12 குளங்களில் 57 லட்சம் மதிப்பிலான தூர்வாரும் பணியினை தொழிலாளர் நலத்துறை அமைச்சர் நிலோபர் கபீல் தொடங்கி வைத்தார்.

பின்னர் கிராமப்புற மேம்பாடு திட்டத்தின் கீழ் ராமநாயக்கன் பேட்டை – மல்லகுன்டா வரையில் போடப்பட்டுள்ள ரூ.2 கோடியே 45 லட்சம் மதிப்பிலான தார்ச்சாலை திட்டத்தை ரிப்பன் வெட்டி தொடங்கி வைத்து அனைவருக்கும் இனிப்பு வழங்கினார். பிறகு அங்குள்ள முனியான் கொல்லை பகுதியில் பொதுமக்களின் குறைகளை கேட்டறிந்து பொதுமக்களின் சாலைவசதி ஏற்படுத்தித்தர நடவடிக்கை எடுப்பதாக உறுதி அளித்தார்.

நிகழ்ச்சியில் மாவட்ட ஊரக வளர்ச்சித்துறை அலுவலர் பெரியசாமி, நாட்றம்பள்ளி ஒன்றிய கழக செயலாளர் எம்.கே. ராஜா கூட்டுறவு சங்க தலைவர் பிரகாசம், ஒன்றிய கழக பொருளாளர் எல்லப்பன், ஒன்றிய அம்மா பேரவை செயலாளர் சதீஷ்குமார் தமிழ்செல்வன் உள்ளிட்ட பலர் கலந்து கொண்டனர்.