தற்போதைய செய்திகள்

கழகத்தை வீழ்த்த நினைக்கும் எதிர்க்கட்சிகளின் ஆசை நிறைவேறாது – அவைத்தலைவர் இ.மதுசூதனன் பேச்சு

சென்னை

கழகத்தை வீழ்த்த நினைக்கும் எதிர்க்கட்சிகளின் ஆசை நிறைவேறாது என்று அவைத்தலைவர் இ.மதுசூதனன் கூறினார்.

வடசென்னை வடக்கு கிழக்கு மாவட்ட கழக அம்மா பேரவை சார்பில் புரட்சித்தலைவி அம்மா அவர்களின் 72-வது பிறந்த நாள் விழாவை சிறப்பாக கொண்டாடுவது குறித்து நிர்வாகிகள் ஆலோசனை கூட்டம் அம்மா பேரவை மாவட்ட செயலாளர் ஏ.டேவிட்ஞானசேகரன், ஏற்பாட்டில் பெரம்பூர் பகுதி முத்தமிழ் நகரில் உள்ள தனியார் மண்டபத்தில் நடைபெற்றது. இதில் கழக அவைத்தலைவர் இ.மதுசூதனன், மாவட்ட செயலாளர் ஆர்.எஸ். ராஜேஷ், ஆகியோர் தலைமையேற்று நிர்வாகிகளுக்கு ஆலோசனைகளை வழங்கினர்.

இக்கூட்டத்தில் அவைத்தலைவர் இ.மதுசூதனன் பேசியதாவது:-

இந்த கட்சி வளருமா, அல்லது போய்விடுமா என பகல் கனவுகளை காணும் தி.மு.க. உள்ளிட்ட எதிர்க்கட்சிகளின் ஆசை ஒரு போதும் நிறைவேறாது. புரட்சித்தலைவரால் உருவாக்கப்பட்டு அம்மா அவர்களால் கட்டி காத்த அண்ணா தி.மு.க.வை எந்த கொம்பனாலும் வீழ்த்த முடியாது. யாரும் எவரும் உலகத்தில் நிரந்தரமாக இருக்க போவதில்லை. யார் இருந்தாலும் இல்லாவிட்டாலும் அண்ணா தி.மு.க. என்ற பேரியக்கம் மட்டும் இன்னும் நூறாண்டுகள் நீடித்து நிலைத்திருக்கும்.

கட்சி கொள்கைகளை கடைபிடித்து நெறிமுறைகளை உருவாக்கி புதிய இளம் தலைமுறையினரை கட்சியில் வரவழைத்து அவர்களுக்கு புரட்சித்தலைவர், மற்றும் புரட்சித்தலைவியின் வரலாற்றை கூறி வரும் காலங்களில் அவர்களின் புகழை வளர்க்க கழகத்தினர் பாடுபட வேண்டும்.

இளம் தலைமுறையினர் தெரிந்து கொள்ளும் வகையில் வருகின்ற அம்மா பிறந்த நாளில் மாவட்டத்திற்கு உட்பட்ட அனைத்து பகுதிகளில் உள்ள தெருக்களிலும் அம்மா அவர்களின் திருஉருவ படத்திற்கு மாலை அணிவித்து இனிப்புகள் மற்றும் அன்னதானம் வழங்கி எம்.ஜி.ஆர், அம்மா ஆகியோரின் புகழ் பாடும் பாடல்கள் ஆங்காங்கே ஒலிக்க வேண்டும்.
இவ்வாறு கழக அவைத்தலைவர் இ.மதுசூதனன் பேசினார்.

முன்னதாக மாவட்ட கழக செயலாளர் ஆர்.எஸ். ராஜேஷ், பேசியதாவது:-

ஒருங்கிணைந்த வடசென்னை வடக்கு கிழக்கு மாவட்டத்திற்கு உட்பட்ட பெரம்பூர் மற்றும் ஆர்.கே.நகர் பகுதியில் உள்ள வட்டங்களில் அம்மா அவர்களின் 72-வது பிறந்தநாளை சிறப்பாக கொண்டாடும் வகையில் பொதுமக்களுக்கு அன்னதானம், மற்றும் நலத்திட்ட உதவிகள், பள்ளி குழந்தைகளுக்கு கல்வி உபகரணங்கள், உள்ளிட்டவைகள் வழங்கப்பட வேண்டும்.

மேலும் புரட்சித்தலைவர் எம்.ஜி.ஆரால் உருவாக்கப்பட்டு பாதுகாக்கப்பட்ட கழகத்தை இந்தியாவின் மூன்றாவது பெரிய இயக்கமாக உருவாக்கி தந்த அவர்களின் புகழுக்கு நன்றி தெரிவிக்கும் வகையில் அனைத்து பாக பொறுப்பாளர்களையும் கவுரவித்து நல உதவிகளை வழங்கப்படும். மேலும் வரும் தேர்தல்களில் சிறப்பாக கட்சி பணியாற்ற புதிய பாகபொறுப்பாளர்கள் நியமனம் உள்ளிட்டவைகள் ஏற்படுத்தப்படும்.

அம்மாவின் வழியில் முதல்வர் எடப்பாடி கே.பழனிசாமி, துணை முதலமைச்சர் ஓ.பன்னீர்செல்வம், ஆகியோரது தலைமையிலான நல்லாட்சியில் நடைபெற்று வரும் தமிழக அரசை இன்று மக்கள் போற்றி வருகின்றனர். கடந்த ஆண்டு அம்மா பிறந்த நாளை சிறப்பாக கொண்டாடியது போன்று இந்த ஆண்டும் வெகு சிறப்பாக கொண்டாட வேண்டும்.
இவ்வாறு மாவட்ட கழக செயலாளர் ஆர்.எஸ்.ராஜேஷ் பேசினார்.