தற்போதைய செய்திகள்

தமிழகத்தில் தொழில் தொடங்க சிறு, குறு நிறுவனங்கள் முன்வர வேண்டும் – அமைச்சர் எம்.சி.சம்பத் அழைப்பு

சென்னை:-

தமிழ்நாட்டில் தொழில் தொடங்க சிறு, குறு மற்றும் பெரு நிறுவனங்கள் முன்வர வேண்டும் என்று அமைச்சர் எம்.சி.சம்பத் அழைப்பு விடுத்துள்ளார்.

தமிழ்நாட்டில் உள்ள சிறு, குறு, நடுத்தர நிறுவனங்கள் அரசு இ வலைதள சந்தையில் (ஜெம்) அதிக அளவில் ஈடுபட்டு பயனடைய வேண்டி ஜெம் சம்வாத் என்ற கலந்துரையாடல் நிகழ்ச்சி, சென்னை கலைவாணர் அரங்கத்தில் நேற்று காலை நடைபெற்றது. சிறு, குறு மற்றும் நடுத்தர தொழில்கள் நிறுவனங்கள் துறையினால் ஏற்பாடு செய்யப்பட்ட இந்நிகழ்ச்சிக்கு தொழில்துறை அமைச்சர் எம்.சி.சம்பத் தலைமையேற்று முன்னிலை உரை ஆற்றினார். ஊரகத் தொழில்துறை அமைச்சர் பா.பென்ஜமின் சிறப்புரையாற்றினார்.

தமிழகத்தில் அரசு துறைகள் மற்றும் அரசு சார்ந்த நிறுவனங்கள் மூலம் அரசு இ வலைதள சந்தையில் அதிக அளவில் கொள்முதல் செய்வதற்கும் மற்றும் தமிழகத்தில் உள்ள அனைத்து தொழில் நிறுவனங்களும் மற்றும் குறு, சிறு மற்றும் நடுத்தர நிறுவனங்களும் அதிக அளவில் இச்சந்தையின் மூலம் பயனடைய வேண்டும் என கேட்டுக் கொள்ளப்பட்டுள்ளது.

இந்திய அளவில் 3 லட்சத்து 25 ஆயிரத்து 865 விற்பனையாளர்கள் மற்றும் சேவை புரிவோர்கள் மூலம் 18 லட்சத்து 63 ஆயிரத்து 545 பொருள்கள் இந்த ஜெம் போர்ட்டல் மூலம் அரசுத் துறைகள் கொள்முதல் செய்யலாம். இதுவரை இந்திய அளவில் ரூபாய் 45 ஆயிரத்து 800 கோடி அளவிற்கு ஜெம் போர்ட்டல் மூலம் கொள்முதல் செய்யப்பட்டுள்ளது.

ஜெம் போர்ட்டல் மூலம் தமிழ்நாடு அரசால் 892.19 கோடி ரூபாய்க்கு கொள்முதல் செய்யப்பட்டுள்ளது. தமிழ்நாட்டை சேர்ந்த 2 ஆயிரத்து 985 குறு, சிறு மற்றும் நடுத்தரத் தொழில் நிறுவனங்கள் ஜெம் போர்ட்டலில் பதிவு செய்து ரூபாய் 311.38 கோடி அளவிற்கு விற்பனை செய்துள்ளன. தமிழ்நாட்டில் மொத்தம் 22 லட்சம் குறு, சிறு மற்றும் நடுத்தரத் தொழில் நிறுவனங்கள் பதிவு செய்துள்ள நிலையில் ஜெம் போர்ட்டல் மூலம் பதிவு செய்து விற்பனை செய்வதற்கான அதிகமான வாய்ப்புகள் தமிழகத்தில் உள்ளது. இதனை தமிழ்நாட்டில் உள்ள சிறு, குறு, நடுத்தர நிறுவனங்கள் அரசு இ வலைதள சந்தையில் ஈடுபட்டு அதிக அளவில் பயனடைய கேட்டுக் கொள்ளப்பட்டுள்ளது.

இத்திட்டம் குறித்து இக்கலந்துரையாடலின் ஒரு பகுதியாகிய விரிவான விளக்கத்தினை ஜெம் கூடுதல் தலைமை நிர்வாக அலுவலர், எச்.ஆர்.ஷர்மா, துணை தலைமை நிர்வாக அலுவலர் ஏ.வி.முரளிதரன் ஆகியோர் காலையில் விற்பனையாளர் களான தொழில் நிறுவனங்களுக்கும் எடுத்துரைத்தனர். மாலையில் வாங்குபவர்களான அரசு துறை மற்றும் அதனை சார்ந்த நிறுவனங்களின் அதிகாரிகளுக்கும் கணினி படக்காட்சி மூலம் எடுத்துரைக்கப்பட்டது. மேலும் இக்கலந்துரையாடலின் போது விற்பனையாளர்கள் மற்றும் வாங்குபவர்களின் சிற்சில சந்தேகங்களும் நிவர்த்தி செய்யப்பட்டது.

இந்நிகழ்ச்சியில் அமைச்சர் எம்.சி.சம்பத் பேசியதாவது:-

ஒளிவு மறைவற்ற விற்பனைக்கு ஜெம் ஒரு உந்து சக்தியாக அமையும். தொழில் துறையில் அரசு முதலிடத்தில் உள்ளது. சிறு குறு நிறுவனங்களும், பெரு நிறுவனங்களும் தமிழ்நாட்டில் தொழில் துவங்க முன்வர வேண்டும். சிறு குறு நிறுவனங்கள் வைத்திருக்கும் அனைவரும் ஜெம் போர்ட்டலில் பதிவு செய்ய வேண்டும். 25 லட்சம் சிறு குறு நிறுவனங்களும் ஜெம் போர்ட்டலில் பதிவு செய்து கொண்டு வெளிப்படை தன்மையை கடைபிடிக்க வேண்டும். இதன் மூலம் வருமான வரி உள்ளிட்ட எந்த பிரச்சினையும் வராது.

இவ்வாறு அமைச்சர் எம்.சி.,சம்பத் பேசினார்.

இக்கூட்டத்தில் தொழில் துறை செயலர் என்.முருகானந்தம், குறு, சிறு மற்றும் நடுத்தரத் தொழில் நிறுவனங்கள் துறை முதன்மைச் செயலர், முனைவர் ராஜேந்திர குமார், தொழில் ஆணையர் மற்றும் தொழில் வணிக இயக்குநர், அனு ஜார்ஜ், நிதித் துறை சிறப்பு செயலர், பூஜா குல்கர்னி, மற்றும் தொழில் வணிகத் துறை கூடுதல் ஆணையர் டி.பி.ராஜேஷ், மற்றும் ஜெம் மாநில வர்த்தக ஒருங்கிணைப்பாளர் ரமேஷ் மகாதேவன் ஆகியோர் கலந்து கொண்டனர்.