சிறப்பு செய்திகள்

தமிழகத்தில் ஹெலிகாப்டர் ஆம்புலன்ஸ் சேவை – முதலமைச்சர் அறிவிப்பு…

லண்டன்:-

தொலைதூரங்களில் உடல்நலம் பாதிக்கப்பட்டவர்களுக்கு குறித்த நேரத்தில் சிகிச்சை அளிப்பதற்காக தமிழகத்தில் ஹெலிகாப்டர் ஆம்புலன்ஸ் வசதி ஏற்படுத்தப்படும் என்று முதலமைச்சர் எடப்பாடி கே.பழனிசாமி கூறினார்.

தமிழகத்தில் லண்டன் கிங்ஸ் மருத்துவமனை கிளையை தொடங்குவதற்கு முன்வந்தற்காக தமிழக அரசின் சார்பிலும், தமிழக மக்களின் சார்பிலும் முதலமைச்சர் நன்றி தெரிவித்துக் கொண்டார். அமெரிக்கா, இங்கிலாந்து, துபாய் ஆகிய நாடுகளில் தொழில் முதலீட்டை ஈர்க்கவும், அங்குள்ள தொழில் நுட்பங்களை கண்டறிந்து அதனை தமிழகத்தில் செயல்படுத்திடவும் பல்வேறு ஒப்பந்தங்களில் கையெழுத்திடவும் முதலமைச்சர் எடப்பாடி கே.பழனிசாமி கடந்த 28-ந்தேதி சென்னையில்இருந்து வெளிநாடு புறப்பட்டு சென்றார்.

முதலில் லண்டன் சென்றார். அங்கு சுகாதாரத்துறை சார்பில் 3 ஒப்பந்தங்கள் முதலமைச்சர் முன்னிலையில் கையெழுத்தாகின. தொடர்ந்து அவர் இங்கிலாந்து நாட்டு எம்.பி.க்கள் மத்தியில் பேசினார். தொழில் தொடங்க உகந்த மாநிலமாக தமிழகம் திகழ்கிறது என்று குறிப்பிட்டு தமிழகத்தில் செய்யப்பட்டுள்ள உள்கட்டமைப்பு வசதிகள், சலுகைகளை விளக்கி கூறி அழைப்புவிடுத்தார்.

லண்டன் கிங்ஸ் மருத்துவக் கல்லூரிமருத்துவமனையில் ஆற்றிய உரை வருமாறு:-

இந்த கிறிஸ்தவ மருத்துவக் கல்லூரி மருத்துவமனையில் பணிபுரிகின்ற அனைத்து மருத்துவர்களையும், இந்த நேரத்தில் உளமார பாராட்டுகிறேன். கிங்ஸ் மருத்துவமனையின் கிளை ஒன்றை தமிழகத்தில் அமைக்க இருப்பதாக தெரிவித்திருக்கிறார்கள். அதற்கான முழு ஆதரவை தமிழக அரசு வழங்கும் என்று உறுதி அளிக்கிறேன். இங்கு இருக்கின்ற மருத்துவ வசதிகள் அனைத்தும் தமிழக மக்களுக்கும் கிடைக்கக்கூடிய சூழ்நிலையை இந்த கிங்ஸ் நிறுவனம் ஏற்படுத்தி கொடுத்தமைக்கு தமிழக அரசின் சார்பில், தமிழக மக்களின் சார்பில் நன்றி தெரிவித்துக் கொள்கிறேன்.

கிங்ஸ் மருத்துவமனை உண்மையிலேயே ஒரு தலைசிறந்த மருத்துவமனையாக திகழ்கிறது. நோயாளிகளை ஹெலிகாப்டர் மூலம் அழைத்து வரும் திட்டம் பாராட்டுக்குரியது. இன்றைக்கு ராபின்சன் ஹெலிகாப்டர் இருக்கின்ற இடத்தை பார்வையிட்டோம், சென்னையிலும் அதனை அமைப்பதற்கு நாங்கள் ஏற்பாடு செய்திருக்கிறோம். உடல் நலம் பாதிக்கப்பட்டவர்கள் தொலைதூரத்தில் இருந்து நகரத்துக்கு வந்து சிகிச்சை பெற முடியாதபோது விலைமதிக்க முடியாத உயிரைஇழக்க நேரிடுகிறது.

அப்படிப்பட்ட சூழ்நிலையில் ஹெலிகாப்டர் ஆம்புலன்ஸ் மூலமாக குறித்த காலத்தில் மருத்துவமனைக்கு கொண்டு வந்து நோயை குணப்படுத்தி அவர்களை பிழைக்க வைக்கக்கூடிய அரிய சாதனையை கிங்ஸ் மருத்துவமனை செய்து கொண்டிருக்கிறது. இதேபோன்று தொலைதூரத்தில் உள்ள இடங்களில் உடல் நலம் பாதிக்கப்பட்டவர்களை குறித்த நேரத்தில் சிகிச்சை அளித்து காப்பாற்ற தமிழகத்திலும் ஹெலிகாப்டர் ஆம்புலன்ஸ் வசதியை ஏற்படுத்திக் கொடுக்க அரசு நடவடிக்கை மேற்கொண்டு நிச்சயமாக செயல்படுத்தும் என்பதை தெரிவித்துக் கொள்கிறேன்.

இவ்வாறு முதலமைச்சர் எடப்பாடி கே.பழனிசாமி பேசினார்.