சிறப்பு செய்திகள்

விலையில்லா மிதிவண்டிகள் வழங்கும் திட்டம் தொடரும் – தமிழக அரசு அறிவிப்பு…

இந்தியாவிலேயே முதன்முறையாக பள்ளி மாணவ, மாணவிகளுக்கு விலையில்லா மிதிவண்டி வழங்கும் திட்டத்தை புரட்சித்தலைவி அம்மா அவர்கள் தமிழகத்தில் அமல்படுத்தினார். அத்திட்டம் தொடர்ந்து செயல்படுத்தப்பட்டு வருகிறது. இடையில் அத்திட்டம் நிறுத்தப்பட்டு விட்டதாக வெளியான பொய் செய்திக்கு மறுப்பு தெரிவிக்கும் வகையில் மாணவ, மாணவிகளுக்கு விலையில்லா மிதிவண்டி வழங்கும் திட்டம் என அரசு திட்டவட்டமாக அறிவித்துள்ளது.

அரசு மற்றும் அரசு நிதி உதவி பெறும் பள்ளிகளில் மாணவ, மாணவிகளுக்கு ஆண்டுதோறும் விலையில்லா மிதிவண்டிகள் வழங்கப்பட்டு வருகின்றன. ஒவ்வொரு ஆண்டும் பிளஸ்-1 படிக்கும் போது அந்த மாணவ, மாணவிகளுக்கு விலையில்லா மதிவண்டிகள் வழங்கப்படுவது வழக்கம். அத்திட்டம் இடையில் மக்களவை தேர்தல் நடைபெற்றதால் தொடர்ந்து செயல்படுத்த முடியாத நிலைமை ஏற்பட்டது.

தேர்தல் முடிவுற்ற நிலையில் இப்போது அனைத்து பிளஸ்-1 மாணவ, மாணவிகளுக்கு விலையில்லா மிதிவண்டிகள் வழங்கப்பட்டு வருகின்றன. இத்திட்டம் நிறுத்தப்பட்டு விட்டதாக தி.மு.க.வினர் புரளியை கிளப்பி விட்டதால் மாணவர்களிடையே அச்சம் நிலவியது. ஆனால் உண்மை அல்ல என்பதை உறுதிபடுத்தும் வகையில் அத்திட்டம் தொடரும் என தமிழக அரசு அறிவித்துள்ளது.

இது குறித்து அரசு வெளியிட்டுள்ள செய்திக்குறிப்பில் கூறப்பட்டிருப்பதாவது:-

மேல்நிலைக் கல்வியை ஊக்குவிக்கும் வகையில் அரசு, அரசு நிதியுதவி பெறும் மற்றும் பகுதியாக நிதியுதவி பெறும் பள்ளிகளில் 11-ம் வகுப்பு பயிலும் பிற்படுத்தப்பட்டோர், மிகப்பிற்படுத்தப்பட்டோர், சீர்மரபினர் மற்றும் சிறுபான்மையினர் வகுப்புகளைச் சார்ந்த மாணவ, மாணவியருக்கு பொருளாதார உச்ச வரம்பின்றி விலையில்லா மிதிவண்டிகள் வழங்கப்படுகின்றன. இத்திட்டம் தொடர்ந்து செயல்படுத்தப்பட்டு வருகிறது.

2017-2018 மற்றும் 2018-2019 ஆகிய இரண்டு ஆண்டுகளுக்கும் சேர்த்து, பிற்படுத்தப்பட்டோர், மிகப்பிற்படுத்தப்பட்டோர், சீர்மரபினர் மற்றும் சிறுபான்மையின மாணவ, மாணவியருக்கு வழங்கப்பட்ட 7,39,636 மிதிவண்டிகள் உட்பட மொத்தம் 10,87,147 மிதிவண்டிகள் 2018-2019-ல் வழங்கப்பட்டுள்ளன.

இத்திட்டத்திற்காக 2019-2020-ம் ஆண்டிற்கு, பிற்படுத்தப்பட்டோர் நலத் துறைக்கு ரூ.7,300 லட்சம், மிகப்பிற்படுத்தப்பட்டோர் மற்றும் சீர்மரபினர் நலத்துறைக்கு ரூ.6,548.11 லட்சம் ஆக மொத்தம் ரூ.13,848.11 லட்சம் ஒதுக்கீடு செய்யப்பட்டுள்ளது.  விலையில்லா மிதிவண்டிகள் வழங்கும் திட்டத்தின் கீழ் 11-ம் வகுப்பு பயிலும் அனைத்து வகுப்பைச் சார்ந்த மாணவ / மாணவியருக்கும் தொடர்ந்து விலையில்லா மிதிவண்டிகள் வழங்கப்படும். இத்திட்டம் இனிவரும் ஆண்டுகளிலும் தொடர்ந்து செயல்படுத்தப்படும்.

இவ்வாறு அரசு செய்திக்குறிப்பில் கூறப்பட்டுள்ளது.