சிறப்பு செய்திகள்

காவேரி டெல்டா மாவட்டங்கள் பாதுகாக்கப்பட்ட வேளாண் மண்டலமாக அறிவிப்பு – முதலமைச்சருக்கு விவசாயிகள் நன்றி

சென்னை

சேலம் மாவட்டம் தலைவாசலில் கடந்த 9-ந்தேதி நடைபெற்ற ஒருங்கிணைந்த கால்நடைபூங்கா அடிக்கல் நாட்டு விழாவில் பேசிய முதலமைச்சர் எடப்பாடி கே.பழனிசாமி, தஞ்சாவூர், திருவாரூர், நாகை, புதுக்கோட்டை, அரியலூர், கடலூர், திருச்சி, கரூர் ஆகிய 8 மாவட்டங்களை உள்ளடக்கிய காவேரி டெல்டா பகுதிகள் பாதுகாக்கப்பட்ட சிறப்பு வேளாண் மண்டலமாக மாற்றப்படும் என்று அறிவித்தார்.

மேலும் சட்ட வல்லுநர்களை கலந்தாலோசித்து, இதற்கு தனி சட்டம் கொண்டு வரப்படும் என்றும், ஹைட்ரோ கார்பன் உள்ளிட்ட விவசாயத்தை பாதிக்கும் எந்தவொரு திட்டத்தையும் தமிழகத்தில் அனுமதிக்க மாட்டோம் என்றும் திட்டவட்டமாக கூறினார். முதலமைச்சரின் இந்த அறிவிப்புக்கு பல்வேறு அரசியல் கட்சிகள், விவசாய சங்கங்கள் பாராட்டு தெரிவித்தன.

இந்நிலையில் நேற்று முதலமைச்சர் எடப்பாடி கே.பழனிசாமியை முகாம் அலுவலகத்தில், புதுக்கோட்டை மாவட்டம் நெடுவாசல் மற்றும் அதனை சுற்றியுள்ள 30 கிராமங்களை சேர்ந்த விவசாய பிரதிநிதிகள் மற்றும் ஊராட்சித் தலைவர்கள் சந்தித்து காவேரி டெல்டா பகுதிகளை ‘‘பாதுகாக்கப்பட்ட சிறப்பு வேளாண் மண்டலமாக’’ மாற்றப்படும் என்று அறிவித்ததற்கும், நெடுவாசலில் ஹைட்ரோ கார்பன் திட்டத்தை செயல்படுத்தாமல் இருக்க உரிய நடவடிக்கை மேற்கொண்டமைக்காகவும் நன்றி தெரிவித்தனர்.

முதல்வரை சந்தித்த பின் நெடுவாசலை சேர்ந்த ஆசிரியர் வேலு செய்தியாளர்களிடம் கூறியதாவது:-

நெடுவாசலில் ஹைட்ரோ கார்பன் திட்டம் அமல்படுத்தப்படாது என்பதில் தமிழக அரசு உறுதியாக இருந்து, எங்கள் பகுதி விவசாயிகளை காப்பாற்றியது. காவேரி டெல்டா பகுதிகளை பாதுகாக்கப்பட்ட சிறப்பு வேளாண் மண்டலமாக மாற்ற சட்டம் இயற்றப்படும் என முதல்வர் அறிவித்தது வரலாற்றில் இடம் பெறத்தக்க பெரும் நிகழ்வு. முதலமைச்சருக்கு நன்றி சொல்வதற்காக அவரை சந்தித்தோம். நெடுவாசலை சுற்றியுள்ள 30 கிராமங்களை சேர்ந்த விவசாய பிரதிநிதிகள் இங்கு வந்திருக்கிறோம். முதலமைச்சரை சந்தித்து நன்றி தெரிவித்தோம். தொடர் நடவடிக்கைகளை எடுத்து வருவதாக முதல்வர் எங்களிடம் தெரிவித்துள்ளார்.

காவேரி டெல்டா மாவட்டங்கள் அனைத்தையும் ஒருங்கிணைத்து பாதுகாக்கப்பட்ட வேளாண் மண்டலமாக அறிவிக்க தனிச்சட்டம் இயற்றப்படும் என அறிவித்துள்ளது தமிழக மக்கள் அனைவரையும் மகிழ்ச்சி கடலில் ஆழ்த்தியுள்ளது. இந்த அறிவிப்பை எண்ணி எண்ணி மகிழத்தக்கது. இதற்காக, முதலமைச்சர் எடப்பாடி கே.பழனிசாமி தமிழக அரசியல் வரலாற்றில் என்றென்றும் போற்றப்படுவார் என நன்றி கடிதத்தில் குறிப்பிட்டுள்ளோம். புதுக்கோட்டை மாவட்டத்துக்கு காவேரி உபரி நீரை திருப்பிவிடுவதற்கு கோரிக்கையை அமைச்சர் டாக்டர் சி.விஜயபாஸ்கர் நீண்ட காலமாக வலியுறுத்தி வருகிறார். காவேரி உபரி நீரை திருப்பிவிடுவதற்கு இந்த பட்ஜெட்டில் நிதி ஒதுக்க உள்ளதாக முதல்வர் மகிழ்ச்சியான செய்தியை எங்களிடத்தில் சொன்னார்.

இவ்வாறு அவர் கூறினார்.

இதனை தொடர்ந்து அமைச்சர் டாக்டர் சி.விஜயபாஸ்கர் கூறுகையில், நெடுவாசல் மக்கள் தங்கள் போராட்டத்தை வெளிப்படுத்தி இருந்தாலும் தான் ஒரு விவசாயி என்ற அடிப்படையில் டெல்டா மாவட்டங்களை பாதுகாக்கப்பட்ட வேளாண் மண்டலமாக அறிவித்துள்ளார். நெடுவாசலில் போராட்டத்தில் ஈடுபட்ட மக்கள் மீது தொடுக்கப்பட்ட வழக்கை வாபஸ் வாங்க முதல்வர் நடவடிக்கைகள் எடுப்பதாக உறுதி அளித்துள்ளார் என்று தெரிவித்தார்.