திருவண்ணாமலை

சேவூர் சுப்பிரமணிய சுவாமி கோயில் மஹா கும்பாபிஷேக விழா – அமைச்சர் சேவூர் எஸ்.இராமச்சந்திரன் பங்கேற்பு.

திருவண்ணமலை

திருவண்ணாமலை மாவட்டம் ஆரணி அடுத்த சேவூர் அருள்மிகு ஸ்ரீவள்ளிதேவசேனா சமேத ஸ்ரீசுப்பிரமணிய சுவாமி கோயிலில் சுமார் 100 வருடங்களுக்கு முன்பு கும்பாபிஷேகம் நடைபெற்றது. இதையடுத்து மீண்டும் கும்பாபிசேகம் நடத்த ரூ.1.5 கோடிக்கு மேல் திருப்பணிகள் நடைபெற்றன. புதிய ராஜகோபுரம் மற்றும் கோயிலில் வள்ளி தெய்வானை சமேத சுப்பிரமணிய சுவாமி பிரகாரம், விநாயகர் ஆலயம், நவகிரக ஆலயம், உள்ளிட்டவைகளும் புதியதாக கட்டப்பட்டது. இதையடுத்து நேற்று மஹா கும்பாபிஷேக விழா நடைபெற்றது.

காலையில் யாகசாலை பூஜை, அவப்ருத யாகம், 8.30 மணிக்கு மஹா பூர்ணாஹுதி, யாத்ராதானம், கலசப்புறப்பாடு நடைபெற்றது. பின்னர் 9.30 மணியளவில் ராஜகோபுரம் மற்றும் ஸ்ரீவள்ளி தேவசேனா சமேத சுப்பிரமணிய சுவாமிக்கும் மற்றும் பரிவாரங்களுக்கும் மஹா கும்பாபிஷேகம் நடைபெற்றது. விழாவில் இந்து சமய அறநிலையத்துறை அமைச்சர் சேவூர் எஸ்.இராமச்சந்திரன் தனது குடும்பத்துடன் பங்கேற்று சாமி தரிசனம் செய்தார். கும்பாபிஷேகத்தின்போது ஏராளமான பக்தர்கள் முருகனுக்கு அரோகரா என விண்ணதிர கோஷம் எழுப்பினர்.

செய்யாறு தொகுதி சட்டமன்ற உறுப்பினர் தூசி கே.மோகன், மாவட்ட வருவாய் அலுவலர் ரத்தினசாமி, ஆரணி கோட்டாட்சியர் மைதிலி, ஆன்மீகவாதிகள் ரத்தனகிரி தவத்திரு பாலமுருகனடிமை சுவாமிகள், கலவை தவத்திரு சச்சிதானந்த சுவாமிகள், ஆரணி ஜோதிடர் ரா.குமரேசன், நகர அம்மா பேரவை செயலாளர் பாரி பி.பாபு, ஒன்றிய செயலாளர்கள் பி.ஆர்.ஜி.சேகர், எம்.வேலு, பாசறை மாவட்ட செயலாளர் ஜி.வி.கஜேந்திரன், மேற்கு ஆரணி ஒன்றிய குழுத்தலைவர் பச்சையம்மாள் சீனிவாசன், துணைத்தலைவர் அ.வேலாயுதம், மாவட்ட கவுன்சிலர் ப.திருமால், செங்கம் அமுதா அருணாசலம், திருவண்ணாமலை டாக்டர் பழனி, முன்னாள் தலைவர்கள் வி.வெங்கடேசன், கே.பெருமாள், பட்டு கூட்டுறவு சங்கத்தலைவர்கள் ஜெ.சம்பத், எஸ்.ஜோதிலிங்கம், எஸ்.பாலசந்தர், குமரவேல் சில்க்ஸ் புருஷோத்தமன், ஐடி விங் மாவட்ட செயலாளர் மணி உள்ளிட்ட பலர் கலந்து கொண்டனர்.

கும்பாபிஷேக விழாவை முன்னிட்டு ராஜ் டிவி புகழ் ராஜகீதம் இசை குழுவினரின் இன்னிசை கச்சேரியும், உலக அளவில் சாதனை புரிந்த டாக்டர் மீனாட்சிபிரியா ராகவனின் சென்னை ஸ்ரீவிநாயகா நாட்டியாலயா சார்பில் பரதநாட்டிய நிகழ்ச்சியும் நடைபெற்றது, பின்னர் இரவு சுவாமி திருக்கல்யாண வைபவம் நடைபெற்றது. அதன் பின்னர் சுவாமி திருவீதியுலா நடைபெற்றது. இதில் ஏராளமான பக்தர்கள் கலந்து கொண்டு சாமி தரிசனம் செய்தனர்.