தற்போதைய செய்திகள்

முதலமைச்சர் கேட்டதையும் கொடுப்பார் கேட்காததையும் கொடுப்பார் – அமைச்சர் உடுமலை கே.ராதாகிருஷ்ணன் பேச்சு…

சேலம்

முதலமைச்சர் கேட்டதையும் கொடுப்பார், கேட்காததையும் கொடுப்பார் என்று தலைவாசலில் நடைபெற்ற விவசாய பெருவிழாவில் கால்நடை பராமரிப்புத்துறை அமைச்சர் உடுமலை கே.ராதாகிருஷ்ணன் கூறினார்.

முதலமைச்சர் எடப்பாடி கே.பழனிசாமி கடந்த 9-ந்தேதி சேலம் மாவட்டம், தலைவாசலில் சர்வதேச தரத்தில் ஒருங்கிணைந்த கால்நடை ஆராய்ச்சி பூங்கா, கால்நடை மருத்துவக் கல்லூரி மற்றும் ஆராய்ச்சி நிலையத்திற்கு அடிக்கல் நாட்டி வைத்து, விவசாயப் பெருவிழாவை தொடங்கி வைத்தார். மூன்று நாட்கள் நடைபெற்ற விவசாயப் பெருவிழா, கருத்தரங்கம் மற்றும் கண்காட்சி நேற்று முன்தினத்தடன் நிறைவு பெற்றது.

கால்நடை பராமரிப்புத்துறை அமைச்சர் உடுமலை கே.ராதாகிருஷ்ணன் சிறப்பாக அரங்குகள் அமைத்த அரசு அலுவலர்களை பாராட்டி சான்றிதழ்களை வழங்கி விழா பேருரை ஆற்றினார். வேளாண்மைத்துறை அமைச்சர் இரா.துரைக்கண்ணு சிறப்பாக அரங்குகள் அமைத்த இதர நிறுவனங்களை பாராட்டி சான்றிதழ்களை வழங்கி விழா சிறப்புரை ஆற்றினார்.

இவ்விழாவில் கால்நடை பராமரிப்புத்துறை அமைச்சர் உடுமலை கே.ராதாகிருஷ்ணன் பேசியதாவது:-

முதலமைச்சர் எடப்பாடி கே.பழனிசாமி தமிழகத்தை அனைத்து துறைகளிலும் முதல் மாநிலமாக செயல்படுத்தி கொண்டிருக்கிறார். அந்த வகையில் தானும் ஒரு விவசாயி என்பதால், விவசாயிகளின் நலனுக்காகவும், ஏழை எளிய மக்களின் வாழ்க்கை தரம் உயர்வதற்காகவும் பல சிறப்பு திட்டங்களை செயல்படுத்தி கொண்டிருக்கிறார். அதனால் தான் 9.2.2020 அன்று நடைபெற்ற அடிக்கல் நாட்டு விழாவில் காவேரி டெல்டா பகுதிகள் பாதுகாக்கப்பட்ட சிறப்பு வேளாண் மண்டலமாக மாற்றப்படும் என்று அறிவித்தார். இந்த அறிவிப்பால் டெல்டா பகுதி விவசாயிகள் அனைவரும் மிக்க மகிழ்ச்சி அடைந்துள்ளனர்.

இங்கு கால்நடை பூங்கா மூன்று பிரிவுகளாக அமைக்கப்படவுள்ளது. முதல் பிரிவில், நவீன வசதிகள் கொண்ட கால்நடை மருத்துவமனை, இரண்டாம் பிரிவில் பால், இறைச்சி, மீன், முட்டை போன்றவற்றை பாதுகாத்தல், மூன்றாம் பிரிவில் கால்நடை அறிவியல் மருத்துவ பல்கலைக்கழகத்தில் படிக்க வரும் மாணவ, மாணவிகளுக்கு உலக நாடுகளில் உள்ள மருத்துவத்தை இங்கு நவீன வசதிகளுடன் ஏற்படுத்துதல், இதுமட்டுமல்லாது முதலமைச்சர் நம் உள்நாட்டு ஆடு, மாட்டினங்களை பேணி காப்பதற்கு தனி பிரிவு, அதேபோல் நம் தமிழகத்தின் பராம்பரிய செல்ல பிராணிகளின் இனப்பெருக்கத்தை பெருக்குவதற்காக தனி பிரிவு, வெண்பன்றி வளர்ப்பிற்கு தனி பிரிவு, விவசாய பெருமக்கள் பயன்பெறும் வகையில் பால்பண்ணை அமைக்க தேவையான இயந்திரங்கள், கருவிகள், கால்நடை தீவனம் தயாரிக்கும் தொழில்நுட்பங்களும் இடம்பெறுகின்றன.

முதலமைச்சர் கால்நடை பூங்காவிற்கு அடிக்கல் நாட்டிய போது விவசாயத்தின் அதிநவீன தொழில்நுட்பங்கள், விவசாய பெருங்குடி மக்களும், பொதுமக்களும் தெரிந்து கொள்ளும் வகையில் 224 அரங்குகள் அமைக்கப்பட்டன. இந்த கண்காட்சியை கண்டுகளித்த விவசாயிகளும், பொதுமக்களும், பள்ளி மற்றும் கல்லூரி மாணவ, மாணவிகளும் மிகவும் பயனடைந்துள்ளனர்.

புரட்சித்தலைவி அம்மா அவர்கள் கடந்த 2011-ம் ஆண்டு முதல் கால்நடை பராமரிப்புத்துறையின் மூலம் விலையில்லா கறவை மாடுகள், விலையில்லா வெள்ளாடுகள், செம்மறியாடுகள் மற்றும் கோழியினங்கள் ஆகியவை கிராமப்புற ஏழை, எளிய பெண்களுக்கு வழங்கப்பட்டதனால், அவர்களின் பொருளாதாரம் மேன்மை அடைந்துள்ளன. அவர்களின் வாழ்க்கை தரம் வெதுவாக உயர்ந்துள்ளது. இந்த திட்டம் இன்று வரை முதலமைச்சர் தலைமையில் நடைபெறும் அம்மாவின் அரசு தொடர்ந்து வழங்கி கொண்டிருக்கிறது.

முதலமைச்சர் எடப்பாடி கே.பழனிசாமி கேட்டதையும் கொடுப்பார், கேட்காததையும் கொடுப்பார். அந்த வகையில், நம் நாட்டின் செல்லப் பிராணிகளான ராஜபாளையம் சிப்பிப்பாறை, கன்னி, கோம்பை ஆகிய செல்லப்பிராணிகளின் இனப்பெருக்கத்தை அழிவிலிருந்து காப்பதற்காக, செல்லப்பிராணிகளுக்கு ஓர் ஆராய்ச்சி மையம் வேண்டுமென்று கேட்டுக்கொண்டேன். நான் கேட்டவுடன், முதலமைச்சர் ஆராய்ச்சி மையம் அமைப்பதற்கு ஒப்புக் கொண்டார். அவருக்கு என் மனமார்ந்த நன்றியை தெரிவித்துக் கொள்கிறேன்.

முதலமைச்சர் எடப்பாடி கே.பழனிசாமி தலைமையிலான அம்மாவின் அரசு அனைத்து துறைகளிலும், இந்தியாவிலேயே முதல் மாநிலமாக திகழ்ந்து கொண்டிருக்கிறது என்பதில் எவ்வித ஐயமுமில்லை. ஆதலால் தான், மத்திய அரசின் விருதுகளை அனைத்து துறையும் பெற்றுக் கொண்டிருக்கிறது.

இவ்வாறு அமைச்சர் உடுமலை கே.ராதாகிருஷ்ணன் பேசினர்.