தற்போதைய செய்திகள்

அம்மாவின் முடிவு தான் அ.தி.மு.க.வின் நிலைப்பாடு – அமைச்சர் டி.ஜெயக்குமார் பேட்டி

சென்னை

7 பேர் விடுதலை விவகாரத்தில் புரட்சித்தலைவி அம்மாவின் முடிவுதான் அ.தி.மு.க.வின் நிலைப்பாடு. திமுகவை போல் இரட்டை வேடம் போட மாட்டோம் என்று அமைச்சர் டி.ஜெயக்குமார் தெரிவித்தார்.

சென்னை மந்தைவெளியில் உள்ள ராணி மெய்யம்மை பள்ளியில் மாணவர்களுக்கு விலையில்லா மிதிவண்டி வழங்கும் நிகழ்ச்சி நேற்று நடைபெற்றது. இதில் மீன்வளத்துறை அமைச்சர் டி.ஜெயக்குமார், பள்ளி கல்வித்துறை அமைச்சர் கே.ஏ.செங்கோட்டையன் ஆகியோர் கலந்து கொண்டு மாணவர்களுக்கு விலையில்லா மிதிவண்டிகளை வழங்கினர்.

இதன் பின்னர் அமைச்சர் டி.ஜெயக்குமார் செய்தியாளர்களிடம் கூறியதாவது:-

முன்னாள் பிரதமர் ராஜீவ்காந்தி கொலை வழக்கில் சிறையில் உள்ள 7பேரை விடுதலை செய்யும் விவகாரத்தில் தமிழ்நாடு ஆளுநரை நிர்ப்பந்திக்க முடியாது. சிறையில் உள்ள 7 பேரும் உடனடியாக விடுதலை செய்ய வேண்டும் என்பதே தமிழ்நாடு அரசின் நிலைப்பாடு. மறைந்த முதலமைச்சர் அம்மாவின் முடிவு தான் அ.தி.மு.க.வின் நிலைப்பாடு. தி.மு.க.வை போல் இரட்டை வேடம் போட மாட்டோம். தி.மு.க தலைவர் கருணாநிதி 7 பேரில் நளினியை மட்டும் விடுதலை செய்யலாம் என கூறினார். இந்த விவகாரத்தில் ஆளுநர் தான் உரிய முடிவு எடுக்க வேண்டும்.

டி.என்.பி.எஸ்.சி. முறைகேட்டில் சி.பி.சி.ஐ.டி. காவல்துறையினர் 41 பேரை கைது செய்துள்ளனர். மேலும், இதுதொடர்பாக விசாரணை நடத்தி வருகின்றனர். இந்த முறைகேட்டுக்கு தி.மு.க ஆட்சியில் தான் வழி செய்யப்பட்டது. எனவே இதில் தி.மு.க.வின் முக்கிய புள்ளிகளுக்கு தொடர்பு இருக்கிறது. இந்த விவகாரத்தில் கைது செய்யப்பட்டவர்கள் மீது நடவடிக்கை எடுக்கப்படும். மேலும், குற்றவியல் நடவடிக்கையும் மேற்கொள்ளப்படும்.

டி.என்.பி.எஸ்.சி. முறைகேடு விவகாரத்தில் தி.மு.க.வை சேர்ந்த முன்னாள் சட்டப்பேரவை உறுப்பினர் அப்பாவுக்கு தொடர்பு உள்ளது என ஏற்கனவே நான் கூறிய பிறகும், அவர் அமைதி காப்பது ஏன்?டெல்லி தேர்தலில் நடந்ததை போல் தமிழ்நாட்டிலும் நிகழும் என கமல் தெரிவித்திருப்பது, மறைமுகமாக மூன்றாவது முறையாக அ.தி.மு.க ஆட்சிக்கு வரும் என்பதாக எடுத்துக் கொள்ளலாம். 2021-ம் ஆண்டு தேர்தலிலும் வெற்றிபெற்று அ.தி.மு.க ஆட்சி அமைக்கும்.

இவ்வாறு அமைச்சர் டி.ஜெயக்குமார் கூறினார்.