கோவை

வெள்ளிங்கிரி மலை கோயிலுக்கு செல்லபக்தர்களுக்கு அனுமதி

கோவை

வெள்ளிங்கிரி மலைக்கோயிலுக்குச் செல்லும் மலைப்பாதை பிப்.15-ந்தேதி திறக்கப்படும் என வனத்துறை அறிவித்துள்ளது.

கோவை அருகே மேற்குத் தொடர்ச்சி மலையில் அமைந்துள்ளது வெள்ளிங்கிரி மலைக் கோயில். மலையடிவாரத்தில் அமைந்திருக்கும் பூண்டி கோயிலை ஒட்டியுள்ள மலைத் தொடரில் 7-வது மலையில் சுயம்பு வடிவில் சிவலிங்கம் அமைந்துள்ளது. வனத்துறை கட்டுப்பாட்டில் உள்ள இந்தக் கோயிலில் உள்ள சுயம்பு லிங்கத்தை தரிசிக்க ஆண்டுதோறும் சிவராத்திரி மற்றும் சித்ரா பெளர்ணமி காலங்களில் பக்தர்களுக்கு அனுமதியளிக்கப்படுகிறது.

அதன்படி பிப்ரவரி முதல் மே மாதம் வரை 4 மாதங்களுக்கு மலைக் கோயில் பாதை திறக்கப்பட்டு பக்தர்களுக்கு அனுமதியளிக்கப்படுகிறது. இந்நிலையில் வரும் 21-ந் தேதி சிவராத்திரி விழா கொண்டாடப்படவுள்ள நிலையில் வெள்ளிங்கிரி மலைக்கோயிலுக்குச் செல்லும் பாதை 15-ந்தேதி திறக்கப்பட உள்ளது.

இது தொடர்பாக போளுவாம்பட்டி வனச் சரகர் ஆரோக்கியதாஸ் கூறியதாவது:-

அமாவாசை உள்பட குறிப்பிட்ட சில தினங்கள் மட்டும் காலை 5 முதல் 7 மணி வரை மலைக் கோயிலுக்குச் செல்ல பக்தர்களுக்கு அனுமதியளிக்கப்படுகிறது. காலையில் செல்லும் பக்தர்கள் மாலை 6 மணிக்குள் கீழே இறங்க அறிவுறுத்தப்படுகிறது. ஆனால் சிவராத்திரி, சித்ரா பெளர்ணமி காலங்களில் பிப்ரவரி முதல் மே வரை மலைக் கோயில் பாதை திறக்கப்பட்டு கால அவகாசமின்றி பக்தர்கள் சென்று வருவதற்கு அனுமதியளிக்கப்படுகிறது.

இந்நிலையில் மலைக் கோயிலுக்குச் செல்லும் பாதை 15-ந்தேதி திறக்கப்பட உள்ளது.

மலைக் கோயிலுக்குச் செல்லும் பக்தர்கள் எளிதில் தீப்பற்றக்கூடிய பொருள்கள், நெகிழிப் பொருள்கள் மற்றும் போதைப் பொருள்களை எடுத்துச் செல்வதற்கு தடை விதிக்கப்பட்டுள்ளது. மலைக் கோயிலுக்கு செல்லும் பக்தர்களைக் கண்காணிக்க சிறப்புக் குழுக்கள் அமைக்கப்பட்டுள்ளன என்றார்.