தற்போதைய செய்திகள்

நாள் ஒன்றுக்கு 1000 மூட்டைகள் நெல் கொள்முதல் செய்ய அனுமதி – அமைச்சர் ஆர்.காமராஜ் தகவல்

திருவாரூர்

நெல் கொள்முதல் நிலையங்களில் நாள் ஒன்றுக்கு 1000 மூட்டைகள் நெல் கொள்முதல் செய்ய அனுமதி வழங்கப்பட்டுள்ளதாக அமைச்சர் ஆர்.காமராஜ் தெரிவித்தார்.

திருவாரூர் மாவட்ட ஆட்சியர் அலுவலக கூட்டரங்கில் காரீப் பருவ நெல்கொள்முதல் குறித்து திருவாரூர், தஞ்சாவூர், நாகை மாவட்ட அலுவலர்களுடனான, ஒருங்கிணைந்த கலந்தாய்வு கூட்டம் உணவுத்துறை அமைச்சர் ஆர்.காமராஜ் தலைமையில் நடைபெற்றது. உணவுத்துறை முதன்மை செயலர் தயானந்த் கட்டாரியா, தமிழ்நாடு நுகர்பொருள் வாணிபக் கழக நிர்வாக இயக்குநர் எம்.சுதாதேவி, மாவட்ட ஆட்சியர் த.ஆனந்த், உணவுப்பொருள் குற்றப்புலனாய்வு காவல் இயக்குநர் பிரதீப் வி.பிலிப், மாவட்ட காவல் கண்காணிப்பாளர் துரை ஆகியோர் உடனிருந்தனர்.

இக்கூட்டத்தில் அமைச்சர் ஆர்.காமராஜ் பேசியதாவது:- 

நெல் கொள்முதல் நிலையங்களில் நாள் ஒன்றுக்கு 800 மூட்டை வரை மட்டுமே கொள்முதல் செய்யலாம் என்று இருந்ததை 1000 மூட்டை வரை கொள்முதல் செய்ய அனுமதி வழங்கப்பட்டுள்ளது. இதற்கு மேல் நெல்வரத்து அதிகமாக இருந்தால் அருகாமையில் கூடுதல் நெல் கொள்முதல் நிலையங்களை திறக்க மாவட்ட ஆட்சியர்களுக்கு அனுமதி வழங்கப்பட்டுள்ளது.

நடப்பு கொள்முதல் பருவத்தில் மாநிலம் முழுவதும் 1697 கொள்முதல் நிலையங்கள் திறக்கப்பட்டு இன்று வரை 5 லட்சத்து 89 ஆயிரத்து 951 மெ.டன் நெல் கொள்முதல் செய்யப்பட்டுள்ளது. இதற்கு ஊக்கத்தொகையாக மட்டும் 39 கோடியே 19 லட்சம் ரூபாய் விவசாயிகளுக்கு வழங்கப்பட்டுள்ளது. இதன் மூலம் 1 லட்சத்து 15 ஆயிரம் விவசாயிகள் பயனடைந்துள்ளனர்.

கடந்த 8 ஆண்டுகளில் வழங்கப்பட்ட மொத்த ஊக்கத்தொகை ரூ.752 கோடி, விவசாயிகள் தங்கள் குறைகள் சம்பந்தமாக ஆலோசனைகளை தெரிவிக்க விரும்பினால் சென்னை தலைமை அலுவலகத்தில் 044-26424560, 044-26422448 என்ற எண்களில் புகார் பிரிவுகள் மற்றும் கட்டுப்பாட்டு அறைகளுக்கு தெரிவிக்கலாம். மாவட்ட அளவிலும் மாநில அளவிலும் உணவுத்துறை அலுவலர்கள் அடங்கிய தணிக்கை குழுக்கள் அமைக்கப்பட்டுள்ளன. உணவுப்பொருள் குற்றப் புலனாய்வுதுறை மூலம் பறக்கும் படைகள் அமைக்கப்பட்டுள்ளன.

இவ்வாறு அமைச்சர் ஆர்.காமராஜ் பேசினார்.

முன்னதாக அமைச்சர் ஆர்.காமராஜ் திருவாரூர் வட்டம் புலிவலம் நேரடி நெல் கொள்முதல் நிலையத்திற்கு சென்று நெல் மூட்டைகளின் எடை மற்றும் தரம் குறித்து ஆய்வு நடத்தினார். புகார்களுக்கு இடமின்றி சீரான நெல் கொள்முதல் நடைபெறுவதை உறுதிசெய்ய தமிழக அரசு மாநிலம் முழுவதும் நடைமுறைபடுத்தி வரும் E-Procurement முறைகள் ECS மூலம் நெல்லுக்குரிய கிரயம் விவசாயிகள் வங்கி கணக்கில் வரவு வைத்தல், கொள்முதல் தொகை மற்றும் ஊக்கத்தொகை விவரங்கள் தேவையான சாக்குகள் இருப்பு வைத்து தாமதமின்றி நெல் கொள்முதல்’ செய்யப்படுவது ஆகியன குறித்து விவசாயிகளிடம் கலந்துரையாடினார்.

இக்கூட்டத்தில் மாவட்ட வருவாய் அலுவலர் பொன்னம்மாள், திருவாரூர், தஞ்சாவூர், நாகப்பட்டினம் மாவட்ட நுகர்பொருள் வாணிபகழக முதுநிலை மண்டல மேலாளர்கள் மற்றும் துறை சார்ந்த அலுவலர்கள் கலந்து கொண்டனர்.