தற்போதைய செய்திகள்

அம்மா பிறந்தநாளில் நலத்திட்ட உதவிகள் வழங்க சிறுபான்மையினர் பிரிவு முடிவு – ஆலோசனை கூட்டத்தில் தீர்மானம் நிறைவேற்றம்

சென்னை

புரட்சித்தலைவி அம்மா பிறந்தநாளில் ஏழைகளுக்கு நலத்திட்ட உதவிகள் வழங்குவது என்று கழக சிறுபான்மையினர் நலப்பிரிவு நிர்வாகிகள் கூட்டத்தில் தீர்மானிக்கப்பட்டது.

இதய தெய்வம் புரட்சித்தலைவி அம்மா அவர்களின் 72-வது பிறந்த நாள் விழாவினை சிறப்பாக கொண்டாடுவது குறித்து கழக சிறுபான்மையினர் நலப்பிரிவு நிர்வாகிகள் மற்றும் மாவட்டச் செயலாளர்கள் ஆலோசனைக் கூட்டம் தலைமைச் செயலகத்தில் நேற்று நடைபெற்றது.

கூட்டத்திற்கு கழக சிறுபான்மையினர் நலப்பிரிவுச் செயலாளர் அ.அன்வர்ராஜா தலைமை தாங்கினார். தொழிலாளர் நலத்துறை அமைச்சர் டாக்டர் நிலோபர்கபீல், கழக சிறுபான்மையினர் நலப்பிரிவு பொருளாளர் டி.ஜான்மகேந்திரன் ஆகியோர் முன்னிலை வகித்தனர். கழக சிறுபான்மையினர் நலப் பிரிவு துணைச் செயலாளரும், கழக அமைப்புச் செயலாளரும், கழக செய்தித் தொடர்பாளருமான ஜே.சி.டி.பிரபாகர் வரவேற்றார்.

இக்கூட்டத்தில் நிறைவேற்றப்பட்ட தீர்மானங்கள் வருமாறு:-

மனிதப்புனிதர், மக்கள் திலகம், புரட்சித்தலைவர் டாக்டர் எம்.ஜி.ஆரால் தொடங்கப்பட்ட அனைத்திந்திய அண்ணா திராவிட முன்னேற்றக்கழகம் என்கின்ற இந்த பேரியக்கத்தை உலகமே வியக்கும் வண்ணம் இந்திய துணைக் கண்டத்தின் மிகப்பெரிய கட்சியாக உயர்த்தி, மக்கள் அனைவரும் பயன்பெறும் வகையில் சிறப்பான ஆட்சியைத் தந்து மறைந்தும் இன்றும் மக்களின் மனங்களில் நிறைந்து வாழ்ந்து கொண்டிருக்கின்ற நம்தாய் புரட்சித்தலைவி அம்மா அவர்களின் 72-வது பிறந்த நாளை மக்கள் பயன்பெறும் வகையில் நலத்திட்டங்கள் வழங்கி சிறப்பாக கொண்டாடுவது என கழக சிறுபான்மையினர் நலப்பிரிவின் சார்பில் ஏக மனதாக தீர்மானிக்கப்படுகிறது.

புரட்சித்தலைவி அம்மா அவர்களின் அருளாசியோடு அவர்களின் புகழை நிலைநாட்டும் விதமாக, எதிரிகளும் வியந்து பாராட்டும் வகையில் நல்லாட்சி புரிந்து வருகின்ற நம் முதலமைச்சர் எடப்பாடியாரின் ஆட்சித்திறனையும், ஆளுமையையும் அங்கீகரிக்கும் விதமாக நமது மத்திய அரசு ஒட்டு மொத்த துறைகளின் சிறந்த நிர்வாகத் திறன் மேலாண்மைக்கான தேசிய அளவிலான முதன்மை விருதினை வழங்கியுள்ளது. இந்த மாபெரும் சாதனையை நிகழ்த்தி தமிழகத்திற்கு பெருமை சேர்த்த நம் முதலமைச்சரை பாராட்டி ஏக மனதாகத் தீர்மானம் நிறைவேற்றப்படுகிறது.

தமிழக டெல்டா விவசாயிகளின் வாழ்வாதாரத்தைக் காக்கும் விதமாக தஞ்சை டெல்டா பகுதியை பாதுகாக்கப்பட்ட வேளாண் மண்டலமாக அறிவித்து அனைவரின் பாராட்டுதலையும் பெற்றுள்ள நம் முதல்வரை மனமார பாராட்டுவதோடு, செயற்கரிய இச்சாதனை புரிந்து, வேளாண் மண்டலம் மட்டுமல்ல அண்ணா தி.மு.க.வும் இனி டெல்டா பகுதியில் பாதுகாப்பாகவே இருக்கும் என்ற சாதனை சரித்திரம் படைத்திட்ட முதலமைச்சர் எடப்பாடியாருக்கு மனமார்ந்த நன்றியை தெரிவித்து ஒரு மனதாக தீர்மானிக்கப்படுகிறது.

தமிழக மக்களின் நலன்கருதி தொலைநோக்கோடு சரியான நேரத்தில் தமிழகம் முழுவதும் நீர் நிலைகளில் குடிமராமத்துப் பணி மேற்கொண்டதால் மழை காலத்தில் அனைத்து மாவட்டங்களிலும் நிலத்தடி நீர் மட்டம் அபரிமிதமாக உயர்ந்துள்ளது, இதற்கு பாராட்டு தெரிவிப்பதோடு, மக்களின் கோரிக்கையை ஏற்று 5-ம் வகுப்பு மற்றும் 8-ஆம் வகுப்பு மாணவர்களுக்கான அரசு பொதுத்தேர்வை ரத்து செய்து உத்தரவிட்டமைக்காகவும் நன்றி தெரிவித்து தீர்மானம் நிறைவேற்றப்படுகிறது.

குடியுரிமைச் சட்டத்தால் அச்சப்பட்டு, எதிர்கால வாழ்வாதாரத்தைக் குறித்து கவலை கொண்டிருக்கும் இஸ்லாமிய மக்களின் பிரச்சனைக்கு உரிய வழியில் தீர்வுகாண உதவி செய்யாமல், இப்பிரச்சினையை அரசியல் ரீதியாக ஊதிப் பெரிதாக்கி, பொய் பிரச்சாரங்களை தந்திரமாகப் பரப்பி மலிவான அரசியல் லாபம் பெறத்துடிக்கும் திமுக தலைவரையும் அவர்தம் கூட்டணிக் கட்சிகளையும் இக்கூட்டத்தின் வாயிலாக கண்டித்து தீர்மானம் நிறைவேற்றப்படுகிறது.

முதல்வர் மற்றும் துணை முதல்வர் ஆகியோரின் கட்டளையை ஏற்று வரவிருக்கும் பேரூராட்சி, நகராட்சி, மாநகராட்சி ஆகிய உள்ளாட்சி அமைப்புகளுக்கான தேர்தலில் நம் சிறுபான்மைப் பிரிவின் நிர்வாகிகள் அனைவரும் கடுமையாக உழைத்து நமது இயக்கம் அமோக வெற்றியை பெற பாடுபட வேண்டும் என ஏகமனதாக தீர்மானித்து, தீர்மானம் நிறைவேற்றப்படுகிறது.

மத்திய அரசாங்கம் கொண்டு வந்துள்ள இந்திய குடியுரிமை திருத்தச் சட்டம், தேசிய மக்கள் தொகை பதிவேடு, தேசிய குடியுரிமைப் பதிவேடு, அதாவது CAA, NPR, NRC ஆகிய சட்டங்கள் இந்திய முஸ்லீம்களின் குடியுரிமையை கேள்விக் குறியாக்கும் என்று நம்பும் வகையில் தமிழ்நாட்டில் போராட்டங்களும், ஆர்பாட்டங்களும் நடைபெற்று வருகின்றன. குடியுரிமை திருத்தச் சட்டத்தால் இந்திய முஸ்லீம்களுக்கு எவ்வித பாதிப்பும் இல்லை என்றும், தேசிய குடியுரிமை பதிவேடு (NRC) சம்மந்தமாக இன்னும் நாங்கள் விவாதிக்கவே இல்லை என்றும் பாரதப் பிரதமர் அறிவித்துள்ளார்.

தமிழ்நாட்டில் உள்ள முஸ்லீம்களுக்கு எந்த பாதிப்பு வந்தாலும் அதை நாங்கள் அனுமதிக்கமாட்டோம், எதிர்த்து போராடுவோம் என்று தமிழ்நாடு முதலமைச்சர் டாக்டர் எடப்பாடி கே.பழனிசாமியும், தமிழ்நாடு துணை முதலமைச்சர் ஓ.பன்னீர்செல்வமும் தங்கள் கருத்துக்களை தமிழ்நாட்டு மக்களிடையே பதிவு செய்துள்ளனர். தமிழக சட்டமன்றத்திலும் உறுதி அளித்துள்ளனர்.

இருப்பினும், தங்களுக்கு எவ்வித பாதிப்பும் வராது என்ற சட்டப்பூர்வமான நம்பிக்கையை நாம் பெற வேண்டும் என்று தமிழ்நாட்டு முஸ்லீம்கள் விரும்புகின்றனர். எனவே இதுகுறித்து நன்கு பரிசீலித்து மத்திய அரசுக்கு தகுந்த அழுத்தம் கொடுத்து சிறுபான்மை மக்களின் உரிமைகளை பாதுகாத்திட உரிய நடவடிக்கை மேற்கொள்ள வேண்டும் என்று தமிழ்நாடு முதலமைச்சர் டாக்டர் எடப்பாடி கே.பழனிசாமியையும், தமிழ்நாடு துணை முதலமைச்சர் ஓ.பன்னீர்செல்வத்தையும் இக்கூட்டம் ஒருமனதாக கேட்டுக் கொள்கிறது.

மனிதப்புனிதர், மக்கள் திலகம், புரட்சித்தலைவர் டாக்டர் எம்.ஜி.ஆர். அவர்களின் நூற்றாண்டு விழாவை நினைவு கூறும் வகையில் மாவட்டந்தோறும் புரட்சித்தலைவர் டாக்டர் எம்.ஜி.ஆர். நூற்றாண்டு விழா சிறப்பாக கொண்டாடப்பட்டது. மேலும் சென்னையில் புரட்சித்தலைவர் டாக்டர் எம்.ஜி.ஆரின் நூற்றாண்டு விழாவை நினைவு கூரும் வகையில் அலங்கார வளைவு அமைக்கப்பட்டது. மதுரை மாட்டுத் தாவணி பேருந்து நிலையத்திற்கும், சென்னை கோயம்பேடு பேருந்து நிலையத்திற்கும் புரட்சித் தலைவர் டாக்டர் எம்.ஜி.ஆர். பேருந்து நிலையம் என்று பெயர் சூட்டப்பட்டது.

சென்னை சென்ட்ரல் ரயில் நிலையத்திற்கு பாரதப் பிரதமரிடம் முறையிட்டு புரட்சித்தலைவர் டாக்டர் எம்.ஜி.ஆர். மத்திய ரயில்வே நிலையம் என்று பெயர் சூட்டியதற்கு தமிழ்நாடு முதலமைச்சர் எடப்பாடி கே.பழனிசாமிக்கும், தமிழ்நாடு துணை முதலமைச்சர் ஓ.பன்னீர்செல்வத்துக்கும் இக்கூட்டத்தின் வாயிலாக மனமார்ந்த நன்றியை தெரிவித்துக் கொள்கின்றோம்.

எதிர்வரும் உள்ளாட்சிமன்றத் தேர்தலில் நகராட்சி, பேரூராட்சி, மாநகராட்சித் தேர்தலிலும், 2021 சட்டமன்ற தேர்தலிலும், நாடாளுமன்றத் தேர்தலிலும் போட்டியிட கழக சிறுபான்மையினருக்கு 10 சதவீதம் இடஒதுக்கீடு வழங்கிட வேண்டி தமிழ்நாடு முதலமைச்சர் எடப்பாடி கே.பழனிசாமியையும், தமிழ்நாடு துணை முதலமைச்சர் ஓ.பன்னீர்செல்வத்தையும் இக்கூட்டம் ஒருமனதாக கேட்டுக் கொள்கிறது.

இவ்வாறு தீர்மானங்கள் நிறைவேற்றப்பட்டன.