திருவண்ணாமலை

கலசப்பாக்கத்தில் 398 அங்கன்வாடி ஊழியர்களுக்கு செல்போன்கள் – வி.பன்னீர்செல்வம் எம்.எல்.ஏ வழங்கினார்…

திருவண்ணாமலை:-

கலசப்பாக்கம் பகுதியில் 398 அங்கன்வாடி பணியாளர்களுக்கு ரூ. 39 லட்சம் மதிப்பீட்டில் மென்பொருள் செயல்பாடு பொருத்தப்பட்ட செல்போன்களை சட்டமன்ற உறுப்பினர் வி.பன்னீர்செல்வம் வழங்கினார்.

திருவண்ணாமலை மாவட்டம் கலசப்பாக்கம் தொகுதிக்குட்பட்ட புதுப்பாளையம், ஜமுனாமரத்தூர், போளூர், கலசப்பாக்கம் ஆகிய பகுதிகளுக்கு உட்பட்ட 398 அங்கன்வாடி பணியாளர்களுக்கு போஷான் அபியான் திட்டத்தின் கீழ் ரூ. 39 லட்சம் மதிப்பீட்டில் மென்பொருள் பயன்பாடு செயலி பொருத்தப்பட்ட செல்போன்கள் வழங்கும் நிகழ்ச்சி கலசப்பாக்கத்தில் நடைபெற்றது.

இந்நிகழ்ச்சிக்கு மாவட்ட ஒருங்கிணைந்த குழந்தை வளர்ச்சி திட்ட அலுவலர் கந்தன் தலைமை வகித்தார். இதில் சிறப்பு அழைப்பாளராக கலசப்பாக்கம் தொகுதி சட்டமன்ற உறுப்பினர் வி.பன்னீர்செல்வம் கலந்துகொண்டு பணியாளர்களுக்கு கைபேசிகளை வழங்கினார்.

பின்னர் வி.பன்னீர்செல்வம் பேசுகையில், புரட்சித்தலைவி அம்மா நல்லாசியுடன் நடைபெறும் ஆட்சியில் முதல்வரின் சீரிய முயற்சியால் தமிழக அரசு சமூக நலத்துறையின் கீழ் மூன்று தேசிய விருதுகளையும், ஊரக வளர்ச்சி துறை, சுகாதாரத்துறை, கல்வித்துறை, வேளாண்மை துறை உள்ளிட்ட பல்வேறு துறைகளில் இந்தியாவில் முதன்மை மாநிலமாக திகழ்வதுடன் அனைத்து திட்டங்களையும் சிறப்பாக செயல்படுத்துவதில் இந்தியாவிற்கே முன்னோடி மாநிலமாக திகழ்கிறது என்றார்.

இந்நிகழ்ச்சியில் வட்டார வளர்ச்சி அலுவலர்கள் நிர்மலா, அன்பழகன், புதுப்பாளையம் வட்டார வளர்ச்சி அலுவலர்கள் ஆனந்தன், லட்சுமி, ஒன்றிய குழந்தை வளர்ச்சி திட்ட அலுவலர்கள் ஜெயந்தி, ஜோஸ்பின் எப்சிபா, பொதுக்குழு உறுப்பினர் பொய்யாமொழி, புதுப்பாளையம் ஒன்றியச் செயலாளர் புருஷோத்தமன் உட்பட கழக நிர்வாகிகள் பலர் கலந்து கொண்டனர்.