தற்போதைய செய்திகள்

அம்மாவின் லட்சிய கனவுகளை முதல்வர் நிறைவேற்றி வருகிறார் – அமைச்சர் திண்டுக்கல் சி.சீனிவாசன் பேட்டி

திண்டுக்கல்

அம்மாவின் லட்சியக் கனவுகளை முதலமைச்சர் படிப்படியாக நிறைவேற்றி வருகிறார் என்று அமைச்சர் திண்டுக்கல் சி.சீனிவாசன் கூறினார்.

திண்டுக்கல் மாவட்டத்தில் புதிய அரசு மருத்துவக் கல்லூரிக்கு அடிக்கல் நாட்டுவிழாவிற்கு 05.03.2020 அன்று முதலமைச்சர் வருகை தரவுள்ளார். அதற்கான விழா முன்னேற்பாடுகள் குறித்தும், மருத்துவ கல்லூரிக்கு தேர்வு செய்யப்பட்டுள்ள இடத்தில் உட்கட்டமைப்பு வசதிகள் மேற்கொள்வது குறித்தும் திண்டுக்கல் மாநகராட்சி கூட்டரங்கில் வனத்துறை அமைச்சர் திண்டுக்கல் சி.சீனிவாசன் அலுவலர்களுடன் ஆய்வு மேற்கொண்டார். பின்னர் அவர் கூறியதாவது:-

இந்தியாவிலேயே மருத்துவத்துறையில் தமிழ்நாடுதான் மிக சிறந்த மாநிலமாகவும், முன்னணி மாநிலமாகவும் திகழ்ந்து கொண்டிருக்கிறது. வெளிநாடுகளில் இருந்துகூட சிகிச்சைக்காக ஏராளமானோர் சென்னைக்கும் மற்ற நகரங்களுக்கும் வந்த வண்ணம் இருக்கிறார்கள். அமெரிக்கா, இங்கிலாந்து போன்ற நாடுகளை அடுத்து தொடர்ந்து தமிழகம் சிறந்த மருத்துவ வசதி அளிக்கும் மாநிலமாக திகழ்ந்து கொண்டிருக்கிறது. மாவட்டந்தோறும் ஒரு மருத்துவக் கல்லூரி என்ற தொலைநோக்கத்தோடு புரட்சித்தலைவி அம்மா அவர்கள் நடவடிக்கைகளை மேற்கொண்டிருந்தார். அம்மாவின் அந்த லட்சிய கனவை, அவர் வழி நின்று செயல்படும் முதல்வர் படிப்படியாக நிறைவேற்றிக் கொண்டிருக்கிறார்.

திண்டுக்கல் மாவட்டத்தில் புதிய அரசு மருத்துவக் கல்லூரி அமைவதற்கு திண்டுக்கல் கிழக்கு வட்டம், அடியனூத்து கிராமத்தில் 8.6.10 எக்டேர் நிலம் ஒதுக்கீடு செய்யப்பட்டு, ஆரம்பக்கட்டப் பணிகள் நடைபெற்று வருகிறது. முதலமைச்சர் எடப்பாடி கே.பழனிசாமி புதிய மருத்துவக் கல்லூரிக்கு அடிக்கல் நாட்டு விழாவிற்கு 05.03.2020 அன்று திண்டுக்கல்லுக்கு வருகை தரவுள்ளார். அந்த விழாவில் புதிய மருத்துவக் கல்லூரிக்கு அடிக்கல்நாட்டி முதலமைச்சர் பல்வேறு அரசு திட்டப்பணிகளை தொடங்கி வைத்து, பயனாளிகளுக்கு நலத்திட்ட உதவிகள் வழங்க உள்ளார்.

இவ்வாறு அமைச்சர் திண்டுக்கல் சி.சீனிவாசன் கூறினார்.

இந்த ஆய்வின்போது, மாவட்ட ஆட்சித்தலைவர் மு.விஜயலட்சுமி, மாவட்ட வருவாய் அலுவலர் பா.வேலு, மாவட்ட காவல் கண்காணிப்பாளர் ஆர்.சக்திவேல், மாவட்ட மத்திய கூட்டுறவு வங்கித் தலைவர் வி.மருதராஜ், மாவட்ட ஊரக வளர்ச்சி முகமை திட்ட இயக்குநர் கே.கவிதா, திண்டுக்கல் மாநகராட்சி ஆணையாளர் செந்தில்முருகன் மற்றும் மருத்துவத்துறை, பொதுப்பணித்துறை, நெடுஞ்சாலைத்துறை, சுகாதாரத்துறை உள்ளிட்ட அனைத்துத்துறை அலுவலர்கள் கலந்து கொண்டனர்.