தற்போதைய செய்திகள்

நகரும் நியாய விலை கடைகள் அமைக்க அரசு நடவடிக்கை – பேரவையில் அமைச்சர் செல்லூர் கே.ராஜூ உறுதி

சென்னை

தமிழகம் முழுவதும் குறைந்த எண்ணிக்கை குடும்ப கார்டு உள்ள பகுதிகளில் நகரும் நியாய விலை கடைகள் அமைக்க நடவடிக்கை எடுக்கபட்டு வருகிறது என்று அமைச்சர் செல்லூர் கே.ராஜூ தெரிவித்தார்.

தமிழக சட்டப்பேரவையில் கேள்வி நேரத்தின்போது லால்குடி தொகுதி உறுப்பினர் சவுந்தரபாண்டியன் பேசுகையில்,

லால்குடி தொகுதிக்குட்பட்ட நெரிஞ்சலகுடியில் நியாய விலை கடையை பிரித்து பள்ளிவயலில் பகுதி நேர நியாய விலை கடை அமைக்க அரசு முன்வருமா? என்று கேட்டார்.

இதற்கு அமைச்சர் செல்லூர் கே.ராஜூ பதிலளித்து பேசியதாவது:-

உறுப்பினர் கூறிய பகுதியில் 80 குடும்ப அட்டைகளே உள்ளன. புதிய பகுதி நேர கடைகள் துவக்க 150 குடும்ப அட்டைகள் இருக்க வேண்டும். ஏழை எளிய மக்கள் பயன்பெறுவதற்காகவும், அவர்களுக்கு மானிய விலையில் உணவு பொருட்கள் கிடைப்பதற்காகவும், அம்மாவின் அரசு நடவடிக்கைகளை மேற்கொண்டு வருகிறது.

உறுப்பினர் கூறிய பகுதிகளில் கூலி தொழிலாளிகள் அதிகமாக உள்ளதாகவும், 2 கிலோ மீட்டர் நடந்து சென்று பொருட்கள் வாங்க வேண்டி உள்ளது என தெரிவித்துள்ளார். எனவே சிறப்பு இனமாக அப்பகுதியில் வேன் மூலம் பகுதி நேர நியாய விலைக்கடை அமைக்க அரசு நடவடிக்கை எடுக்கும். மாதம் 2 முறை அங்கு பொருட்கள் வழங்க அரசு பரிசீலனை செய்யும்.

ஆளுங்கட்சி, எதிர்க்கட்சி என்று இல்லாமல் அனைத்து உறுப்பினர்களும் அதிக அளவில் பகுதி நேர கடைகள் வேண்டுமென கேள்வி எழுப்புகிறார்கள். இது தொடர்பாக துறை அலுவலர்களுடன் முதலமைச்சர் ஆலோசனை நடத்தி கிராமப்புறங்களில் 50, 60, 70 கார்டுகள் உள்ள பகுதிகளில் பகுதி நேர கடைகள் அமைப்பது சிரமம் என்பதால், நகரும் நியாய விலை கடை அமைக்க அரசு நடவடிக்கை எடுத்து வருகிறது. அனைத்து உறுப்பினர்களின் கோரிக்கைகள் பரிசீலித்து குடும்ப அட்டைகளின் எண்ணிக்கை கணக்கெடுக்கப்பட்டு குறைந்த எண்ணிக்கை கார்டு உள்ள பகுதிகளில் நகரும் நியாய விலை கடை அமைக்க நடவடிக்கை எடுக்கப்படும்.

இவ்வாறு அமைச்சர் செல்லூர் கே.ராஜூ பதிலளித்தார்.