தற்போதைய செய்திகள்

அனுமதி அளித்தால் தனியார் கல்லூரிகளில் ஆவின் பாலகங்கள் – பேரவையில் அமைச்சர் கே.டி.ராஜேந்திர பாலாஜி உறுதி

சென்னை

தனியார் கல்லூரிகள் அனுமதி அளித்தால் அங்கும் ஆவின் பாலகங்கள் அமைக்க நடவடிக்கை எடுக்கப்படும் என்று அமைச்சர் கே.டி.ராஜேந்திர பாலாஜி தெரிவித்தார்.

தமிழக சட்டப்பேரவையில் நேற்று கேள்வி நேரத்தின்போது திருப்பத்தூர் தொகுதி உறுப்பினர் நல்லதம்பி கேள்வி ஒன்றை எழுப்பினார். திருப்பத்தூர் தொகுதிக்குட்பட்ட திருப்பத்தூர் அரசு கலைக் கல்லூரி வளாகத்தில் ஆவின் பாலகம் அமைக்க அரசு முன் வருமா? என்று கேட்டார்.

இதற்கு பால் வளத்துறை அமைச்சர் கே.டி.ராஜேந்திர பாலாஜி திருப்பத்தூர் கல்லூரியில் ஆவின் பாலகம் அமைக்க கல்லூரியின் அனுமதி பெறப்பட்டுள்ளது. கடந்த சட்டமன்ற கூட்டத் தொடரிலேயே அங்கு ஆவின் பாலகம் அமைக்கப்படும் என்று உறுதி கூறப்பட்டது. கல்லூரி அனுமதி பெற காலதாமதம் ஆனதால் அமைக்கப்படவில்லை. தற்போது அனுமதி பெறப்பட்டதால் அங்கு ஆவின் பாலகம் அமைத்து தரப்படும். அம்மா வழியில் நடைபெறும் முதலமைச்சர் எடப்பாடி கே.பழனிசாமியின் அரசு, கூடுதலாக ஆவின் பாலகங்களை அமைக்க நடவடிக்கை மேற்கொண்டு வருகிறது. மாவட்ட கூட்டுறவு சங்கங்களின் 163 ஆவின் பாலகங்களும், சென்னை மாநகராட்சியில் 23 ஆவின் பாலகங்களும், 206 கல்லூரிகளில் ஆவின் பாலகங்களும் அமைக்கப்பட்டுள்ளது.

மேலும் அரசு தனியார் கல்லூரிகள் அனுமதி வழங்கும் பட்சத்தில் அங்கும் ஆவின் பாலகங்கள் அமைக்க நடவடிக்கை மேற்கொள்ள ப்படும். கல்லூரிகளில் ஆவின் பாலகங்கள் அமைக்க அரசு நடவடிக்கை மேற்கொள்ளும். அதேபோல் திருப்பத்தூரில் பால் குளிரூட்டு நிலையம் அமைக்கப்பட வேண்டும் என உறுப்பினர் தெரிவித்துள்ளார்.
அங்கு அதிகமாக பால்வரத்து இருக்கும் பட்சத்தில் தனியாக குளிரூட்டும் நிலையம் அமைக்கப்படும். தனியார் நிறுவனங்களுக்கு பாலை விற்பனை செய்வதை விட ஆவின் நிறுவனத்திற்கு கொடுப்பதையே விவசாயிகள் விரும்புகின்றனர். இதற்கு காரணம் ஆவின் நிறுவனம் பால் கொள்முதல் விலையை அதிகமாக வழங்குவது தான் என்று பதில் அளித்தார்.