தமிழகம்

விடுபட்ட விவசாயிகளுக்கு காப்பீட்டு தொகை கிடைக்க உரிய நடவடிக்கை – பேரவையில் முதலமைச்சர் தகவல்

சென்னை

ஆய்வின் அடிப்படையில் விடுபட்ட விவசாயிகளுக்கு காப்பீட்டு தொகை கிடைக்க நடவடிக்கை எடுக்கப்படும் என்று முதலமைச்சர் தெரிவித்தார்.

தமிழக சட்டப்பேரவையில்  நிதி நிலை அறிக்கை மீதான பொது விவாதத்தில் காங்கிரஸ் சட்டமன்ற குழு தலைவர் ராமசாமி பயிர் காப்பீட்டு தொகை விவசாயிகளுக்கு கிடைக்கவில்லை. எனது மாவட்டத்தில் 150 கிராமங்களில் கொடுக்கப்படாததால் விவசாயிகள் பாதிக்கப்பட்டுள்ளனர் என்று பேசினார். இதற்கு அமைச்சர் இரா.துரைக்கண்ணு இந்தியாவிலேயே பயிர் காப்பீட்டு திட்டத்தை செயல்படுத்துவதில் தமிழக அரசு முதன்மை மாநிலமாக திகழ்கிறது.

இதுவரை 7 ஆயிரத்து 618 கோடி பயிர் காப்பீட்டு தொகை பெறப்பட்டு வழங்கப்பட்டுள்ளது. சிவகங்கை மாவட்டத்தில் 2017- 18-ம் ஆண்டில் ரூ.297 கோடி ஒப்பளிக்கப்பட்டது. 2018-19-ம் ஆண்டில் ரூ.159 கோடி ஒப்பளிக்கப்பட்டது. பயிர் காப்பீட்டு தொகை வழங்குவதில் விவசாயிகள் யாரும் விடுவிக்கப்படவில்லை. சில இடங்களில் வங்கி கணக்குகள் மாறி உள்ளதால் நிறுத்திவைக்கப்பட்டுள்ளது என்றார்.

இதனை தொடர்ந்து அமைச்சர் ஓ.எஸ்.மணியன், புதிய பயிர் காப்பீட்டு திட்டத்தில் எந்த குளறுபடியும் இல்லை. நடைமுறை சிக்கல் தான் உள்ளது. தந்தை பெயரில் உள்ள சொத்தை வாரிசுகள் பகிர்ந்து கொண்டு விவசாயம் செய்கிறார்கள். பாகப் பிரிவினை செய்தது தொடர்பாக பத்திரப்பதிவு நடைபெறாமல் உள்ளது. பட்டா மாறுதல் செய்யப்பட வேண்டும். அப்படி பட்டா மாறுதல் செய்யததால் தடை ஏற்பட்டுள்ளது. தாசில்தாரிடம் வாரிசு சான்றிதழ் பெற்று தந்தவர்களுக்கு வழங்கப்படுகிறது.

மேலும் கூட்டுறவு வங்கி மற்றும் தேசிய வங்கி ஆகிய 2 இடங்களிலும் பயிர் காப்பீடு தொகை பெற சிலர் முயற்சி செய்கிறார்கள். இதனால் நிறுத்தி வைக்கப்பட்டுள்ளது. எனது மாவட்டத்தில் கூட 2 ஆயிரம் ஏக்கரில் இதுபோன்ற பிரச்சினை உள்ளது என்றார்.அதை தொடர்ந்து அமைச்சர் ஜி.பாஸ்கரன் சிவகங்கை மாவட்டத்தில் 85 கிராமங்களில் பயிர் காப்பீட்டு தொகை கொடுக்க வேண்டி உள்ளது. 21-ந்தேதி இன்சூரன்ஸ் நிறுவனங்கள் வரவழைக்கப்பட்டு மாவட்ட நிர்வாகத்துடன் ஆலோசனை நடத்தி பயிர் காப்பீட்டு தொகை வழங்கப்படும் என்றார்.

பின்னர் முதலமைச்சர் எடப்பாடி பழனிசாமி யாருக்கெல்லாம் பயிர் காப்பீட்டு தொகை கிடைக்கவில்லையோ, அவர்களுக்கு எல்லாம் ஆய்வு செய்து பயிர் காப்பீட்டு தொகை கிடைக்க உரிய நடவடிக்கை எடுக்கப்படும் என்றார்.