தற்போதைய செய்திகள்

வெற்றி பெறும் வீரர்கள்- காளைகளுக்கு தங்கக்காசு,கார்,பைக்,ஸ்கூட்டர் பரிசு – ஜல்லிக்கட்டு சங்க தலைவர் எஸ்.பி. அன்பரசன் பேட்டி

கோவை

கோவையில் 23-ந்தேதி நடைபெறும் ஜல்லிக்கட்டு போட்டியில் வெற்றி பெறும் வீரர்கள் மற்றும் காளைகளுக்கு தங்கக்காசு, கார், பைக்,ஸ்கூட்டர் பரிசாக வழங்கப்படும் என்று ஜல்லிக்கட்டு சங்க தலைவர் எஸ்.பி.அன்பரசன் கூறினார்.

கோவை செட்டிபாளையம் பகுதியில் வருகிற 23-ந் தேதி கோவை மாவட்ட நிர்வாகம் மற்றும் கோவை ஜல்லிக்கட்டு சங்கம் சார்பில் மூன்றாமாண்டு மாபெரும் ஜல்லிக்கட்டு போட்டி நடைபெற உள்ளது. இப்போட்டியை கழக அமைப்பு செயலாளரும், கோவை புறநகர் மாவட்ட கழக செயலாளரும், நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சருமான எஸ்.பி.வேலுமணி தொடங்கி வைக்கிறார்.சட்டப்பேரவை துணைத்தலைவர் பொள்ளாச்சி வி.ஜெயராமன், மாவட்ட ஆட்சியர் கு.ராசாமணி, ஏ.கே.செல்வராஜ் எம்.பி., சட்டமன்ற உறுப்பினர்கள் பி.ஆர்.ஜி.அருண்குமார், அம்மன் கே அர்ஜுனன், வி.சி.ஆறுக்குட்டி, ஓ.கே. சின்ராஜ், எட்டிமடை சண்முகம், கஸ்தூரி வாசு, வி.பி.கந்தசாமி மற்றும் கழக நிர்வாகிகள் உள்பட பலர் கலந்து கொள்கிறார்கள்.

ஜல்லிக்கட்டி போட்டிக்காக நடைபெற்று வரும் முன்னேற்பாடு பணிகளை நல்லறம் அறக்கட்டளை தலைவரும், கோவை ஜல்லிக்கட்டு சங்க தலைவருமான எஸ்.பி. அன்பரசன் பார்வையிட்டார்.

இதைத்தொடர்ந்து அவர் செய்தியாளர்களிடம் கூறியதாவது:-

கோவை ஜல்லிக்கட்டு சங்கம் சார்பில் மூன்றாமாண்டு ஜல்லிக்கட்டு போட்டி 23-ந்தேதி காலை 7 முதல் மாலை 5 மணி வரை கோவை எல் அன் டி பைபாஸ் அருகே செட்டிபாளையம் பகுதியில் நடைபெற உள்ளது.போட்டிகளை பொதுமக்கள் கண்டுகளிக்க பார்வையாளர்கள் அமரும் கேலரி வலுவாகவும் உறுதியாகவும் இருக்கும் வகையில்
தமிழகத்திலேயே மிக பிரம்மாண்டமான இரும்பு கேலரி அமைக்கப்பட்டுள்ளது. பொதுமக்களுக்கு தண்ணீர், உணவு, பேருந்து வசதிகளை மாவட்ட நிர்வாகம் செய்துள்ளது. நிகழ்ச்சியின் ஒரு பகுதியாக நாட்டு மாடு இன காளை கண்காட்சி,கிராமிய கலை நிகழ்ச்சிகள் நடைபெற உள்ளது.

இந்த ஜல்லிக்கட்டு போட்டியில் 750 முதல் 900 காளைகளும், 600 மாடுபிடி வீரர்களும் கலந்து கொள்வார்கள். தமிழகத்தில் ஜல்லிக்கட்டு போட்டிகள் மீண்டும் நடைபெற போராட்டம் நடத்திய அனைத்து இளைஞர்களுக்கும் மதிப்பளித்து இந்த நிகழ்ச்சியை நடத்துகிறோம். போட்டிகளில் வீரர்கள் காயம் அடைந்தால் அவர்களுக்கு உடனடி சிகிச்சை அளிக்கும் வகையில் சிறப்பு மருத்துவர் குழுவை கொண்டு மருத்துவ வசதி ஏற்படுத்தப்பட்டுள்ளது.

இதுவரை ஜல்லிக்கட்டு நடத்தப்பட்ட மற்ற மாவட்டங்களை விட கூடுதல் பரிசு பொருட்கள் கோவை ஜல்லிக்கட்டு போட்டியில் வழங்க உள்ளோம். வெற்றி பெறும் வீரர்களுக்கும், மாடுகளுக்கும் தங்க காசும் மற்றும் பல்வேறு பொருட்களும் பரிசாக வழங்கப்படும். மேலும் மாடு பிடி வீரர்களிடம் சிக்காத காளைகளின் உரிமையாளர்களுக்கும் முதல் பரிசாக மாருதி ஆல்டோ கார், இரண்டாம் பரிசாக மோட்டார் பைக்,மூன்றாம் பரிசு ஸ்கூட்டர் வழங்குவதுடன். சிறப்பு பரிசுகளும் வழங்கப்பட உள்ளது. சிறந்த காளையை வளர்த்தவருக்கு நாட்டு மாடு சிறப்பு பரிசாக வழங்கப்படும்.

1000 ஏக்கர் பரப்பளவு கொண்ட இடத்தில் ஜல்லிக்கட்டு போட்டியை நடத்துகிறோம். ஒரே நேரத்தில் இங்கு 10000 வாகனங்களுக்கும் மேல் பார்க்கிங் செய்ய வசதி ஏற்பாடு செய்யப்பட்டு வருகிறது. இந்த ஆண்டு இதுவரை 4150 காளைகள் பதிவு செய்யப்பட்டுள்ளது. கோவை மாவட்டத்தில் வளர்க்கப்பட்ட 300 காளைகள் இந்த ஆண்டு போட்டியில் களம் காணவுள்ளது. கடந்த ஆண்டு நடைபெற்ற போட்டிகளை 50 ஆயிரம் முதல் 1 லட்சம் பேர் வரை கண்டு களித்தனர். இந்த ஆண்டு 3 லட்சம் பேர் வருவார்கள் என எதிர்பார்க்கப்படுகிறது. இங்கு அமைக்கப்பட்டுள்ள கேலரியில் ஒரே நேரத்தில் 8 ஆயிரம் பேர் வரை அமர்ந்து போட்டியை காணலாம். போட்டியில் பங்கேற்கும் மாடு பிடி வீரர்களுக்கு இன்சூரன்ஸ் செய்யப்பட உள்ளது.

இவ்வாறு கோவை ஜல்லிக்கட்டு சங்க தலைவர் எஸ்.பி.அன்பரசன் கூறினார்.

பேட்டியின்போது கோவை மாவட்ட ஜல்லிக்கட்டு சங்க செயலாளர் மாதம்பட்டி தங்கவேலு, மற்றும் முன்னாள் எம்எல்ஏ சின்ராஜ், நிர்வாகிகள் சிரவை நாகராஜ் எஸ்.ஆர்.அர்ச்சுணன், ஆர்.எஸ்.திருமுகம், டோனி சிங், அரசு வழக்கறிஞர் பிரபுராம் உள்பட பலர் உடனிருந்தனர்.