தற்போதைய செய்திகள்

தமிழை வைத்து தி.மு.க. வியாபாரம் செய்கிறது – அமைச்சர் டி.ஜெயக்குமார் கடும் தாக்கு…

சென்னை:-

தமிழை வைத்து தி.மு.க. வியாபாரம் செய்கிறது என்று அமைச்சர் டி.ஜெயக்குமார் கூறினார்.

சென்னையில்  மீன்வளத்துறை அமைச்சர் டி.ஜெயக்குமார் செய்தியாளர்களுக்கு பேட்டி அளித்தார். அப்போது அவர் கூறியதாவது:-

திமுக தலைவர் மு.க.ஸ்டாலின் அறிக்கையை நானும் படித்தேன். ரயில்வேயின் துறை தேர்வு இது. அவர்கள் (திமுக) ஆட்சி நடக்கும்போது இதுபோன்ற துறை தேர்வு நடந்துள்ளது. பதவி உயர்வுக்கான தேர்வு இது. திமுக ஆட்சி இருந்த காலத்தில் இதுபோன்ற தேர்வு நடந்தபோது மாநில மொழியில் துறை தேர்வுக்கு எடுத்த நடவடிக்கை என்ன? இது குறித்து திமுக தலைவர் ஸ்டாலின் தெரிவிக்கவேண்டும். இதுபோன்ற அறிக்கை மூலம் ஊரை ஏமாற்றக்கூடாது. வானத்தில் இருந்து குதித்ததுபோல, தமிழக மக்களுக்கு ஒன்றும் தெரியாததுபோல, தமிழ் தமிழ்
என்று சொல்லிக்கொள்வது.

தமிழை வைத்து வியாபாரம் செய்து பிழைக்கும் குடும்பம் தி.மு.க.. தமிழால் தமிழை வைத்து பிழைக்கும் குடும்பம் என்று மீண்டும் தெரிவிக்கிறேன். தமிழை எங்கே வளர்த்தார்கள். அறிவியல் தமிழை அம்மா தந்தார். 8-வது உலக தமிழ் மாநாட்டை அம்மா நடத்தினார்.

உலக தமிழர் ஆராய்ச்சி நிறுவனத்தை அம்மா தந்தார். தஞ்சாவூரில் தமிழ் பல்கலைக்கழகத்தை புரட்சித்தலைவர் உருவாக்கினார். தமிழுக்காக என்ன கிழித்தார்கள் திமுகவினர். செம்மொழி மாநாட்டை நடத்தினார்கள். அது குடும்ப மாநாடு. குடும்பத்தினரை மாநாட்டின் முன்வரிசையில் அமர வைத்து உலகம் முழுவதும் காண்பித்ததுதான் மிச்சம். இந்த மாநாட்டின் மூலம் ஏதாவது பயன் இருந்ததா? ஒன்றுமில்லை.

அம்மா எடுத்த முயற்சி காரணமாக கணினி தமிழ் வளர்ந்துள்ளது என்றால் அவர் போட்ட விதை இது. தமிழுக்கு உண்மையாக, உணர்வுப்பூர்வமான தொண்டாட்டுகின்ற இயக்கம் அஇஅதிமுக அம்மா ஆட்சிதான். எதுவும் செய்யாமல் தமிழ் பற்றாளர்கள், தமிழுக்கு நாங்கள்தான் சொந்தக்காரர்கள் என்றால் எப்படி, நிச்சயமாகத் தமிழுக்குத் துரோகம் செய்தவர்கள் இவர்கள் (திமுக).

தேர்வு முறையில் என்ன செய்தார்கள். 2006 -2011, 1996-2001 இந்த கால கட்டத்தில், மத்திய அரசுடன் முழு ஆதரவுடன் இருந்த நேரத்தில் என்ன செய்தார்கள். இன்றைக்கும் புதிய தேர்வுக்கு மொழி வாய்ப்பு தரப்படுகிறது. ரயில்வே தேர்வில் கூட மொழி வாய்ப்பு தரப்படுகிறது. இவற்றை எல்லாம் மறைத்து திமுக பேசி வருகிறது. தமிழுக்கு அழிவு என்பது என்றைக்கும் கிடையாது. ஆனால் தமிழுக்கு இவர்களால் (திமுக) பாதிப்பு வரும்.

ப.சிதம்பரம் குறித்த கேள்விக்குப் பதில் அளித்த துரைமுருகன் இது சட்டத்திற்கு உட்பட்டு என்று பதில் அளித்துள்ளார். இது எதைக் காட்டுகிறது. அவர் பம்மிவிட்டார் என்று காட்டுகிறது. உண்மையில் நான் கூறியது உண்மையாகிறதா, இல்லையா காரணம் என்ன என்று எல்லோருக்கும் தெரியும்.

கலைஞர் தொலைக்காட்சி விவகாரம், ஏர்செல் மேக்சிஸ் வழக்கு இதனை மீண்டும் எடுக்க போவதாக சொல்கிறார்கள். அதுபோல பெரம்பலூர் சாதிக் மரணம். இதையும் மீண்டும் எடுக்கபோவதாக சொல்கிறார்கள். இவை அனைத்தும் திமுக தலைவரின் வயிற்றில் புளியை கரைத்துள்ளது.

இவ்வாறு டி. ஜெயக்குமார் தெரிவித்தார்.