தற்போதைய செய்திகள்

அரியலூரில் ஒருங்கிணைந்த நீதிமன்றம் நடப்பாண்டில் அமைக்க நடவடிக்கை – அரசு கொறடா கேள்விக்கு அமைச்சர் சி.வி.சண்முகம் பதில்

சென்னை

அரியலூரில் ஒருங்கிணைந்த நீதிமன்றம் அமைக்க நடவடிக்கை எடுக்கப்பட்டுவருவதாக அமைச்சர் சி.வி.சண்முகம் தெரிவித்தார்.

தமிழக சட்டப்பேரவையில் நேற்று கேள்வி நேரத்தின்போது அரியலூர் தொகுதி சட்டமன்ற உறுப்பினரும், அரசு கொறடாவுமான சு.ராஜேந்திரன் பேசுகையில், மறைந்த அம்மாவின் வழியில், மக்கள் நலப் பணிகளில், மக்களின் பேராதரவுடன் மூன்று ஆண்டு நிறைவு செய்து நான்காம் ஆண்டினை அடியெடுத்து வைத்துள்ள முதலமைச்சருக்கு பாராட்டுகளை தெரிவித்துக் கொள்கிறேன்.

மேலும் அம்மாவின் பிறந்தநாளை மாநில பெண் குழந்தைகள் பாதுகாப்பு தினமாக அறிவித்தமைக்கு எனது நன்றியை தெரிவித்துக் கொள்கிறேன். எனது அரியலூர் தொகுதியில் ஒருங்கிணைந்த நீதிமன்ற வளாகம் அமைக்க அரசு முன்வருமா? என்று கேட்டார்.

இதற்கு சட்டத்துறை அமைச்சர் சி.வி.சண்முகம் பதிலளிக்கையில், அரியலூரில் 3.58 ஏக்கர் இடம் தேர்வு செய்யப்பட்டு உள்ளது. தற்போது நிலமாற்றம் நடவடிக்கை மேற்கொள்ளப்பட்டு வருகிறது. நில மாற்ற நடவடிக்கை முடிந்தவுடன் உடனடியாக உயர் நீதிமன்றத்திலிருந்து பரிந்துரை கடிதம் பெற்று இந்த ஆண்டிற்குள் அரியலூரில் ஒருங்கிணைந்த நீதிமன்ற வளாகம் அமைக்க நடவடிக்கை எடுக்கப்படும் என்றார்.

தொடர்ந்து பல்வேறு உறுப்பினர்கள் தங்கள் தொகுதிகளில் நீதிமன்றங்கள் அமைக்க வேண்டும் என வேண்டுகோள் விடுத்தனர். அதற்கு பதிலளித்து பேசிய அமைச்சர் சி.வி.சண்முகம், அனைத்து தாலுகாக்களிலும் நீதிமன்றங்கள் அமைக்க வேண்டும் என கொள்கை முடிவு எடுத்து, நீதிமன்றங்கள் இல்லாத தாலுகாக்களிலும் படிப்படியாக நீதிமன்றங்கள் தொடங்கப்பட்டு வருகிறது.

இந்த ஆண்டு பல்லாவரம் மற்றும் மதுரவாயல் தாலுகாக்களில் துவங்கப்படும். கிருஷ்ணகிரியில் ஒருங்கிணைந்த தொழிலாளர் நீதிமன்றம் செயல்பட தொடங்கியுள்ளது என்றும் இந்த ஆண்டு இரண்டு நீதிமன்றங்கள் அமைப்படும் என்று தெரிவித்தார்.