தற்போதைய செய்திகள்

திருச்சி எரகுடியில் 660 பயனாளிகளுக்கு ரூ.15.78 கோடியில் நலத்திட்ட உதவிகள் அமைச்சர்கள் வழங்கினர்…

திருச்சி:-

திருச்சி மாவட்டம் எரகுடியில் 660 பயனாளிகளுக்கு ரூ.15.78 கோடி மதிப்பிலான பல்வேறு நலத்திட்ட உதவிகளை அமைச்சர்கள் செல்லூர் கே.ராஜூ, வெல்லமண்டி என்.நடராஜன், எஸ்.வளர்மதி ஆகியோர் வழங்கினர்.

திருச்சி மாவட்ட மத்திய கூட்டுறவு வங்கியின் எரகுடி கிளையை கூட்டுறவுத்துறை அமைச்சர் செல்லூர் கே.ராஜூ, சுற்றுலாத்துறை அமைச்சர் வெல்லமண்டி என்.நடராஜன், பிற்படுத்தப்பட்டோர் மற்றும் சிறுபான்மையினர் நலத்துறை அமைச்சர் எஸ்.வளர்மதி ஆகியோர் திறந்து வைத்து, 660 பயனாளிகளுக்கு ரூ.15.78 கோடி மதிப்பிலான பல்வேறு நலத்திட்ட உதவிகளை வழங்கினர்.

நிகழ்ச்சியில் அமைச்சர் செல்லூர் கே.ராஜூ பேசியதாவது:-

திருச்சி மாவட்ட மத்திய கூட்டுறவு வங்கியின் மூலம் கே.சி.சி. பயிர்க்கடன் 30 நபர்களுக்கு ரூ.42 லட்சம், 97 மகளிர் சுய உதவிக்குழுக்களுக்கு ரூ.4.23 கோடி அளவில் சுய உதவிக்குழு கடன்களும், 76 பஞ்சாயத்து அளவிலான குழு கூட்டமைப்புகளுக்கு ரூ.4.82 கோடி, மத்திய காலக்கடன் 391 நபர்களுக்கு ரூ.2.46 கோடி, மாற்றுத்திறனாளி கடன் 8 நபர்களுக்கு ரூ.3.75 லட்சம், வீட்டுவசதி கடன், வீட்டு அடமானக்கடன் 26 நபர்களுக்கு ரூ.96 லட்சம் ஆக மொத்தம் 660 நபர்களுக்கு ரூ.15.78 கோடி அளவிற்கு கடன்களும், த.மணிகண்டன் என்பவருக்கு கருணை அடிப்படையில் திருச்சிராப்பள்ளி மாவட்ட மத்திய கூட்டுறவு வங்கியில் உதவியாளராக பணிநியமன ஆணையும் வழங்கப்பட்டுள்ளது.

இவ்வாறு அமைச்சர் செல்லூர் கே.ராஜூ தெரிவித்தார்.

அமைச்சர் எஸ்.வளர்மதி பேசியதாவது:-

திருச்சி மாவட்டத்தில் உள்ள கூட்டுறவு நிறுவனங்களின் மூலம் பிற்படுத்தபட்டோர் மற்றும் மகளிர் நலன் கருதி எண்ணற்ற திட்டங்கள் தமிழக அரசின் வழிகாட்டுதலின்படி சிறப்பாக செயல்படுத்தப்பட்டு வருகிறது. திருச்சி மாவட்டத்தில் 2019-2020-ம் ஆண்டில் தொடக்க வேளாண்மை கூட்டுறவு கடன் சங்கங்களின் மூலம் வழங்கப்படும் பயிர் கடன்களின் குறியீடு ரூ.396.15 கோடி ஆகும். அதில் நடப்பாண்டில் பயிர்கடன் மட்டும் 31.08.2019 முடிய 7934 விவசாய பெருமக்களுக்கு தொடக்க வேளாண்மை கூட்டுறவு கடன் சங்கங்கள் மூலம் ரூ.55.35 கோடி வழங்கப்பட்டுள்ளது.

திருச்சி மாவட்டத்தில் 01.04.2019 முதல் 31.08.2019 முடிய தமிழ்நாடு பிற்படுத்தபட்டோர் மேம்பாட்டு கழகத்தின் மூலம் திருச்சிராப்பள்ளி மாவட்ட மத்திய கூட்டுறவு வங்கி மற்றும் தொடக்க வேளாண்மை கூட்டுறவு கடன் சங்கங்களின் வாயிலாக 63 நபர்களுக்கு ரூ.58 லட்சம் நிதியுதவி வழங்கப்பட்டுள்ளது. 01.04.2019 முதல் 31.08.2019 முடிய மகளிர் சுய உதவிக் குழுக்களுக்கு தொடக்க வேளாண்மை கூட்டுறவு கடன் சங்கங்கள் மற்றும் திருச்சி மாவட்ட மத்திய கூட்டுறவு வங்கிக் கிளைகள் மூலமாக ரூ.9.93 கோடி கடன்கள் வழங்கபட்டுள்ளன.

01.04.2019 முதல் 31.08.2019 முடிய மகளிர் தொழில் முனைவோர் கடனாக ரூ.3.36 லட்சம் வழங்கப்பட்டுள்ளது. 01.04.2019 முதல் 31.08.2019 முடிய பணிபுரியும் மகளிருக்கு கடனாக ரூ.16.48 லட்சம் தொடக்க வேளாண்மை கூட்டுறவு கடன் சங்கங்கள் மற்றும் திருச்சி மாவட்ட மத்திய கூட்டுறவு வங்கிக்கிளைகள் வழியே கடன்கள் வழங்கப்பட்டுள்ளன.

திருச்சி மாவட்ட மத்திய கூட்டுறவு வங்கியின் புதிய கிளையான எரகுடியில் பயிர்கடன் 30 நபர்களுக்கு ரூ.42 லட்சம், மகளிர் சுய உதவிக்குழுக் கடன்கள் 173 மகளிர் சுய உதவிக்குழுக்களுக்கு ரூ.9.05 கோடி, மாற்றுத்திறனாளி கடன்கள் 8 நபர்களுக்கு ரூ.3.75 லட்சம், மத்திய காலக்கடன்கள் 391 நபர்களுக்கு ரூ.2.46 கோடி, வீட்டு அடமானக்கடன் மற்றும் வீட்டு வசதிக் கடன் 26 நபர்களுக்கு ரூ.2.15 கோடி, மகளிர் வளர்ச்சிக் கடன் 12 நபர்களுக்கு ரூ.68.50 லட்சம், சம்பளச்சான்று கடன்கள் 20 நபர்களுக்கு ரூ.96.60 லட்சம் ஆக கூடுதலாக 660 நபர்களுக்கு ரூ.15.78 கோடி கடன்கள் வழங்கப்பட்டுள்ளது.

திருச்சி மாவட்டத்தில் அனைத்து தொடக்க வேளாண்மை கூட்டுறவு கடன் சங்கங்களிலும் பயிர்க்கடன் வழங்கப்படுகிறது. மேலும் தொடக்க வேளாண்மை கூட்டுறவு கடன் சங்கங்களில் செயல்படுத்தப்படும் வேளாண் சேவை மையங்கள் மூலமாக டிராக்டர், உழவு இயந்திரங்கள் குறைந்த வாடகையில் விவசாயிகளுக்கு வழங்கப்படுகிறது. இதன் மூலம் வேளாண்மையை இயந்திரமயமாக்குதலில் கூட்டுறவு பெரும் பங்காற்றுகிறது.

அதே போல தொடக்க வேளாண்மை கூட்டுறவு கடன் சங்கங்களில் இயங்கும் மண் பரிசோதனை நிலையங்கள் மூலமாக மண் வளத்தை அறிந்து, அதற்கு தகுந்தவாறு உரமிடுவதற்கும், பயிர்கள் மற்றும் தோட்டக்கலை சாகுபடிக்கு மண்பரிசோதனை நிலையங்களில் ஆலோசனை வழங்கி நல்லதொரு பணியை வேளாண்மை செழிக்க கூட்டுறவுச் சங்கங்கள் செயல்படுகின்றன.

இவ்வாறு அமைச்சர் எஸ்.வளர்மதி பேசினார்.