தற்போதைய செய்திகள்

மக்களின் கோரிக்கைகளுக்கு கழக ஆட்சியில் உடனடி தீர்வு – அமைச்சர் வெ.சரோஜா பேச்சு…

நாமக்கல்:-

மக்களின் கோரிக்கைகளுக்கு கழக ஆட்சியில் உடனடி தீர்வு காணப்படுகிறது என்று அமைச்சர் வெ.சரோஜா கூறினார்.
நாமக்கல் மாவட்டம் ராசிபுரம் வட்டம், வெண்ணந்தூரில் வருவாய் மற்றும் பேரிடர் மேலாண்மைத்துறையின் சார்பில் நடைபெற்ற முதலமைச்சரின் சிறப்பு குறை தீர்க்கும் திட்ட முகாமில் சமூக நலன் மற்றும் சத்துணவுத்திட்டத்துறை அமைச்சர் மருத்துவர் வெ.சரோஜா பொதுமக்களிடமிருந்து மனுக்களை பெற்றுக்கொண்டார்.

முகாமில் அமைச்சர் மருத்துவர்.வெ.சரோஜா பேசியதாவது:-

முதலமைச்சரின் சிறப்பு குறை தீர்க்கும் திட்ட முகாமானது அரசாங்கமே மக்களை நோக்கி சென்று, மக்களின் குறைகளை மனுக்களாக பெற்று விரைவில் குறிப்பிட்ட காலத்திற்குள் தீர்வு வழங்கப்படக்கூடிய திட்டமாகும். இத்திட்டத்தின் கீழ் பெறப்படும் மனுக்கள் அனைத்தும் செப்டம்பர் மாத இறுதிக்குள் தீர்வு வழங்கப்படவுள்ளது.

பெண் குழந்தைகளை காப்போம், பெண் குழந்தைகளுக்கு கற்பிப்போம் திட்டத்தை நாமக்கல் மாவட்டத்தில் சிறப்பாக செயல்படுத்தி 2014-2015 ஆம் ஆண்டில் 867 ஆக இருந்த பெண் குழந்தை பிறப்பு விகிதத்தை, 2018-2019 ஆம் ஆண்டில் 935 ஆக உயர்த்தியமைக்காக மாவட்ட ஆட்சித்தலைவர் மு.ஆசியா மரியம் மத்திய பெண்கள் மற்றும் குழந்தைகள் மேம்பாட்டு அமைச்சகம் சார்பாக புதுடெல்லியில் நடைபெற்ற விழாவில் பெண்கள் மற்றும் குழந்தைகள் நல மேம்பாட்டு அமைச்சர் ஸ்மிருதி இராணியிடம் பாராட்டு சான்றிதழ் மற்றும் விருதினை பெற்றுள்ளார்.

ராசிபுரம் வட்டத்தில் இதுவரை, இலவச வீட்டுமனை பட்டா வேண்டி 2000 மனுக்களும், முதியோர் ஓய்வூதிய தொகை வேண்டி 3,334 மனுக்களும், விதவை உதவித்தொகை, குடும்ப அட்டை, பட்டா மாறுதல் உள்பட பிற துறையை சார்ந்த 674 மனுக்கள் என மொத்தம் 5,922 மனுக்கள் வரப்பெற்றிருக்கின்றன. இந்த மனுக்கள் மீது உடனடி தீர்வு காணப்பட்டு ஒரு மாதத்தில் நலத்திட்டங்கள் வழங்கப்படவுள்ளன.

தற்போது தமிழகத்தில் உள்ள 13.25 லட்சம் மாற்றுத் திறனாளிகளுக்கு ஒதுக்கீடு செய்யப்பட்ட ரூ. 572.25 கோடியில் உதவித் தொகையாக மட்டும் ரூ. 375 கோடி நிதி பெறப்பட்டு, மாற்றுத் திறனாளிகள் நலச்சட்டம்-2016 சிறப்பாக செயல்படுத்தப்படுகிறது. அவர்களுக்கான உதவி உபகரணங்கள், படிக்கின்ற மாணவர்களுக்கு சிறப்புப் பயிற்சிகள், இயன்முறைப் பயிற்சிகள் அளிக்கப்படுகின்றன.

பள்ளிக் கல்வித்துறையுடன் இணைந்தும் மாற்றுத் திறனாளிகள் நல உதவிகள் அளிக்கப்படுகின்றன. தம்மால் இயங்கமுடியாமல் உள்ள தொழுநோய், தசைச் சிதைவு, மூளை வளர்ச்சிக் குறைவு உள்ளிட்டவற்றால் பாதிக்கப் பட்டவர்களுக்கும், மன வளர்ச்சி பாதிக்கப்பட்டவர்களுக்கும் என மொத்தம் 800 பேருக்கு மாதம் தலா ரூ. 1500 வீதம் உதவித் தொகைகள் அளிக்கப்பட்டு வருகின்றன. அத்துடன் அவர்களைப் பராமரிக்கும் பெற்றோர், உறவினர்கள், ஆதரவாளர்கள் உள்ளிட்டோருக்கும் ரூ.1000 உதவித் தொகை அளிக்கப்படுகிறது. இதற்காக நடப்பாண்டில் ரூ.1 கோடி ஒதுக்கீடு செய்யப்பட்டுள்ளது.

தமிழகத்தில் 60 ஆயிரம் அங்கன்வாடி மையப் பணியாளர்களுக்கு சிறப்புப் பாடத்திட்டங்கள் அடங்கிய, பலசெயல்திறன் அலைபேசிகள் வழங்கப்பட்டுள்ளதன் மூலம், அங்கன்வாடியில் சேர்ந்துள்ள குழந்தைகளை மேலும் சிறப்பாக பராமரிக்க முடியும். அனைத்து மாவட்டங்களிலும் மொத்தம் ரூ. 50 கோடி மதிப்பில் பலசெயல்திறன் அலைபேசிகள் வழங்கப்பட்டு வருகின்றன.

இதில் பதிவேற்றம் செய்யப்பட்டுள்ள பாடத்திட்டங்கள், குழந்தைகள் பராமரிப்பு உள்ளிட்ட விவரங்களைக் கொண்டு மாநிலத்தில் ஊட்டச்சத்து குறைபாடு இல்லாத குழந்தைகளை உருவாக்கும் நோக்கத்தில் ஊட்டச்சத்து இயக்கம் முனைப்போடு செயல்படுத்தப்படுகிறது. இது, ஊட்டச்சத்து மாதம் என்பதால், இந்த மாதம் முழுவதும் ஊட்டச்சத்து குறித்த விழிப்புணர்வு நிகழ்ச்சிகள் நடத்தப்படுகின்றன.

தமிழகத்தில் ஒருங்கிணைந்த குழந்தைகள் வளர்ச்சித் திட்டம் போஷான் அபியான் ஆகிய திட்டங்களை சிறப்பாக செயல்படுத்தியமைக்காக மத்திய அரசு அண்மையில் தேசிய அளவிலான (ஒருங்கிணைந்த குழந்தைகள் வளர்ச்சித் திட்டம்,. போஷான் அபியான்) 2 முதல் விருதுகளையும், (பலசெயல்திறன் அலைபேசிகள்) ஒரு தேசிய 2-ஆம் இடத்திற்கான விருதுகள் மற்றும் ரூ. 3 கோடி ஊக்கத் தொகையும் அளித்துள்ளது இத்துறைப் பணியாளர்களை புத்துணர்ச்சியுடன் பணியாற்ற வழிவகுத்துள்ளது. அடுத்த ஆண்டு அனைத்து பிரிவுகளிலும் விருதுகளை பெறுவோம்.

போஷான் அபியான் மூலம் வரும் 3 ஆண்டுக்குள் ரத்த சோகை அற்ற, வயதுக்கு ஏற்ற உயரம்-எடை கொண்ட ஆரோக்கிய குழந்தைகள் பெற வேண்டும் என்ற இலக்கு நிர்ணயிக்கப்பட்டுள்ளது. ஏற்கனவே தமிழகம் இந்த இலக்கை எய்தியுள்ளது. மேலும், ஆரோக்கியமான குழந்தைகளை கர்ப்பிணிப் பெண்கள் பெற்றெடுக்க சுகாதாரம் மற்றும் ஊட்டச்சத்து இயக்கம் முழுவீச்சில் செயல்படுத்தப்பட்டு வருகிறது.

இவ்வாறு அமைச்சர் மருத்துவர் வெ.சரோஜா தெரிவித்தார்.

இந்நிகழ்ச்சியில் தனித்துணை ஆட்சியர் சமூக பாதுகாப்புத்திட்டம் எஸ்.என்.பாலசுப்பிரமணியன், இராசிபுரம் மத்திய கூட்டுறவு வங்கி இயக்குநர் எஸ்.பி.தாமோதரன், வெண்ணந்தூர் பேரூராட்சி முன்னாள் தலைவர் எஸ்.என்.கே.பி.செல்வம் உட்பட வருவாய்த்துறை அலுவலர்கள், உள்ளாட்சி அமைப்புகளின் முன்னாள் பிரதிநிதிகள், அரசுத்துறை அலுவலர்கள் மற்றும் பொதுமக்கள் கலந்து கொண்டனர்.