தற்போதைய செய்திகள்

விடுபட்ட கிராமங்களில் காவேரி குடிநீர் திட்டத்தை செயல்படுத்த நடவடிக்கை – அமைச்சர் எம்.ஆர்.விஜயபாஸ்கர் உறுதி…

கரூர்:-

விடுபட்ட கிராமங்களில் காவேரி குடிநீர் திட்டத்தை செயல்படுத்த நடவடிக்கை எடுக்கப்படும் என்று அமைச்சர் எம்.ஆர்.விஜயபாஸ்கர் உறுதியளித்து உள்ளார்.

கரூர் மாவட்ட ஆட்சித்தலைவர் அலுவலக கூட்டரங்கில் போக்குவரத்துத்துறை அமைச்சர் எம்.ஆர்.விஜயபாஸ்கர் மாவட்ட ஆட்சித்தலைவர் த.அன்பழகன் தலைமையில் அனைத்துறை அலுவலர்களுடன் துறைசார்ந்த வளர்ச்சி பணிகள் தொடர்பாக ஆய்வு மேற்கொண்டார்.

ஆய்வு கூட்டத்தில் அமைச்சர் எம்.ஆர்.விஜயபாஸ்கர் பேசியதாவது:-

பொதுமக்களின் அடிப்படை தேவைகளான குடிநீர், சாக்கடை வசதி, சாலை. தெருவிளக்குகள், குப்பைகளை அகற்றுதல் போன்ற பணிகளுக்கு துறைசார்ந்த அலுவலர்கள் அதிக முக்கியத்துவம் கொடுத்து விரைவாக பணிகளை முடிக்க வேண்டும். கரூர் நகராட்சிக்குட்பட்ட கரூர், இனாம் கரூர், மற்றும் தாந்தோணி, குளித்தலை நகராட்சி, 8 ஊராட்சி ஒன்றியங்களுக்கும் என 12 பகுதிகளுக்கு 12 துணை ஆட்சியர்கள் நிலையில் உள்ள அலுவலர்களை நியமித்து பொதுமக்களின் அடிப்படை தேவைகள் குறித்து கேட்டறிந்து அறிக்கை தயார் செய்து அதன் அடிப்படையில் பணிகளை மேற்கொள்ள வேண்டும். அனைத்துறை அலுவலர்கள் தங்கள் துறைசார்ந்த பணிகளை நிறைவேற்ற உள்ள நடைமுறை சிக்கல் இருந்தால் உடனடியாக என் கவனத்திற்கு கொண்டு வந்தால் அதில் உள்ள சிரமத்தை தீர்த்துவைக்க நடவடிக்கை மேற்கொள்ளப்படும்.

பொதுமக்கள் அதிகம் தொடர்புகொள்ளும் மின்சாரவாரியம். நகராட்சி மற்றும் உள்ளாட்சி அமைப்புகள் பொதுமக்களின் கோரிக்கையின் மீது விரைந்து நடவடிக்கை எடுக்க வேண்டும். தெரு விளக்குகள் சரியாக எரிகிறதா என தொடர்புடைய அலுவலர்கள் இரவு நேரத்தில் ஆய்வு மேற்கொள்ள வேண்டும். மழைகாலம் வருவதால் அதற்கு முன்னதாக டெங்கு தடுப்பு பணிகளை தொடங்க வேண்டும்.

தமிழ்நாடு குடிநீர் வடிகால் வாரிய அலுவலர்கள் கிராம பகுதியில் நடைபெற்று வரும் 43 மேல்நிலை நீர் தேக்க தொட்டிகள், 13 நீர் சேகரிப்பு தொட்டிகளையும், நகர்புரத்தில் நடைபெற்று வரும் 4 மேல்நிலை நீர் தேக்க தொட்டிகள் அமைக்கும் பணிகளை விரைவாக முடித்து பொதுமக்களின் குடிநீர் தேவையை தீர்க்க வேண்டும். மேலும் காவிரி குடிநீர் திட்டம் இல்லாத கிராமங்களை கண்டறிந்து அதற்கான திட்ட மதிப்பீகள் தயார்செய்து கொடுத்தால் முதல்வரின் கவனத்திற்கு கொண்டு சென்று வரும் நிதிநிலை அறிக்கையில் சேர்த்து பணிகள் தொடங்க நடவடிக்கை எடுக்கப்படும்.

கரூர் மாவட்டம் முழுவதும் வேளாண்துறை சார்பாக 14,858 விவசாயிகளுக்கு இலக்கு நிர்னைத்து கிசான் கடன் அட்டைகள் வழங்கும் பணிகள் நடைபெற்று வருகிறது. இதன் மூலம் ரூ.1.60 லட்சம் 4 சதவீதம் வட்டியில் கூட்டுறவு மற்றும் பிற வங்கிகள் மூலம் கடன் வழங்கப்படுகிறது. இதை துறை அலுவலர்கள் விவசாயிகளிடம் விழிப்புணர்வு ஏற்படுத்தி இத்திட்டத்தில் சேர்க்க வேண்டும். மேலும் மாவட்டத்தில் உள்ள குளம், குட்டைகள் மற்றும் நீர் நிலைகள் உள்ள பகுதிகளில் 6 லட்சம் பனை விதைகள் நடவு செய்ய திட்டமிட்டு முதல் கட்டமாக 4 லட்சத்து 20 ஆயிரம் பனை விதைகள் தயார் நிலையில் உள்ளது விரைவில் நடவு செய்யும் இப்பணி தொடங்கி வைக்கப்பட உள்ளது.

மேலும் அனைவருக்கும் வீடு வழங்கும் திட்டத்தின் கீழ் தமிழ்நாடு குடிசை மாற்று வாரியம் மூலம் செல்லாண்டிபாளையத்தில் 640 வீடுகளும், புலியூரில் 288 வீடுகளும். சனப்பிரட்டியில் 192 வீகளும், அரவக்குறிச்சியில் 32 வீடுகளும் கட்டப்பட்டு வருகிறது. விரைவில் இப்பணிகளை முடித்து பயனாளிகளிடம் ஒப்படைக்கப்ப நடவடிக்கை எடுக்கப்பட்டு வருகிறது.

இவ்வாறு அமைச்சர் எம்.ஆர்.விஜயபாஸ்கர் தெரிவித்தார்.

இந்நிகழ்ச்சியில், மாவட்ட வருவாய் அலுவலர் சி.இராஜேந்திரன், மாவட்ட ஊரகவளர்ச்சி முகமை திட்ட இயக்குநர் கவிதா, மாவட்ட ஆட்சியரின் நேர்முக உதவியாளர் செல்வசுரபி கால்நடை பராமரிப்புத்துறை இணை இயக்குநர் மரு.இராதாகிருஷ்ணன், கரூர் வருவாய் கோட்டாட்சியர் சந்தியா, நகராட்சி ஆணையர் (பொ) ராஜேந்திரன், வேளாண் இணை இயக்குநர் வளர்மதி உள்ளிட்ட அனைத்து துறை அலுவலர்கள் கலந்துகொண்டனர்.