திருப்பூர்

நகர்புற உள்ளாட்சிதேர்தலில் கழகத்தை 100 சதவீதம் வெற்றி பெற வைப்போம் – துணை சபாநாயகர் பொள்ளாச்சி வி.ஜெயராமன் சூளுரை

திருப்பூர்

நகர்ப்புற உள்ளாட்சி தேர்தலில் திருப்பூர் மாவட்டத்திற்குட்பட்ட அனைத்து தொகுதியிலும் முதலமைச்சரின் சாதனைகளை எடுத்துக்கூறி கழகத்தை 100 சதவீதம் வெற்றிபெற வைப்போம் என அம்மா பிறந்த நன்னாளில் சூளுரை ஏற்றுக்கொள்வோம் என்று ஆலோசனைக்கூட்டத்தில் திருப்பூர் புறநகர் மாவட்ட கழக செயலாளரும், துணை சபாநாயகருமான பொள்ளாச்சி வி.ஜெயராமன் சூளுரைத்தார்.

இதயதெய்வம் புரட்சித்தலைவி அம்மா அவர்களின் 72-வது பிறந்தநாள் விழாவை சிறப்பாக கொண்டாடுவது குறித்து திருப்பூர் புறநகர் மாவட்ட கழக நிர்வாகிகள் ஆலோசனை கூட்டம் தாராபுரம் சிவரஞ்சனி மஹாலில் நடைபெற்றது. இக்கூட்டத்திற்கு மாவட்ட கழக அவைத்தலைவர் பி.கே.ராஜ் தலைமை வகித்தார். முன்னாள் நாடாளுமன்ற உறுப்பினர் சி.மகேந்திரன் முன்னிலை வகித்தார்.

இக்கூட்டத்தில் திருப்பூர் புறநகர் மாவட்ட கழக செயலாளரும், துணை சபாநாயகருமான பொள்ளாச்சி வி.ஜெயராமன் பங்கேற்று பேசியதாவது:-

இதயதெய்வம் புரட்சித்தலைவி அம்மா அவர்களின் 72-வது பிறந்தநாள் விழா 24.02.2020 அன்று திருப்பூர் புறநகர் மாவட்ட கழகத்தின் சார்பில் சிறப்பாக கொண்டாடப்பட உள்ளது. இவ்விழாவை சிறப்பிக்கும் வகையில் அனைத்து வழிபாட்டு தலங்களிலும் அம்மா அவர்களின் அரசு சிறப்பாக செயல்பட, சிறப்பு பிரார்த்தனைகள், சிறப்பு வழிபாடுகள் செய்தும், அம்மா அவர்களின் திருவுருவ படத்திற்கு மாலை அணிவித்து, மலர் தூவி வணங்கி பொதுமக்களுக்கு இனிப்பு வழங்கியும், ஏழை, எளிய மக்கள் பயன்பெறும் வகையில் அன்னதானம் மற்றும் உயிர்காக்கும் பொருட்டு ரத்ததான முகாம்கள், கண் சிகிச்சை முகாம்கள், நலிந்த தொழிலாளர்களுக்கு உதவிகள், முதியோர்கள், உடல் ஊனமுற்றோர், ஏழை, எளியோர் மற்றும் பள்ளி மாணவ, மாணவிகள் பயன்பெறும் வகையில் பல்வேறு நலத்திட்ட உதவிகளை வழங்கி சிறப்பாக கொண்டாட வேண்டும்.

புரட்சித்தலைவி அம்மா அவர்களின் மறைவிற்கு பின் இந்த ஆட்சி இன்று போகும், நாளை போகும் என்று எதிர்க்கட்சிகள் கொக்கரித்தன. ஆனால் முதலமைச்சர் எடப்பாடியார் 2021-ம் ஆண்டு சட்டமன்ற தேர்தலிலும் வெற்றி பெற்று கழக அரசு தான் அமையும் என்ற அம்மாவின் லட்சியத்தை நனவாக்கும் விதமாக அம்மாவின் பிறந்தநாள் தினத்தை பெண் குழந்தைகள் பாதுகாப்பு தினமாக அறிவித்திருக்கிறார் முதலமைச்சர்.

நமது இயக்கத்தை அழிக்க நினைக்கும் எதிரிகளுக்கு முதலமைச்சர் சிம்ம சொப்பனமாக உள்ளார். மிக விரைவில் நகர்ப்புற உள்ளாட்சி தேர்தல் நடைபெற இருக்கிறது. இதில் திருப்பூர் மாவட்டத்திற்கு உட்பட்ட அனைத்து தொகுதியிலும் முதலமைச்சரின் சாதனைகளை எடுத்துக்கூறி கழகத்தை 100 சதவீதம் வெற்றி பெற வைப்போம் என்று அம்மா பிறந்த நன்னாளில் சூளுரை ஏற்றுக் கொள்வோம்.

இவ்வாறு திருப்பூர் புறநகர் மாவட்ட கழக செயலாளரும், துணை சபாநாயகருமான பொள்ளாச்சி வி.ஜெயராமன் பேசினார்.

இக்கூட்டத்தில் நிறைவேற்றப்பட்ட தீர்மானங்கள் வருமாறு:-

புரட்சித்தலைவி அம்மா அவர்களின் 72-வது பிறந்த நாளை முன்னிட்டு திருப்பூர் மாவட்டம் முழுவதும் சி ஏழை எளிய மக்களுக்கு நலத்திட்ட உதவிகள் வழங்கி கொண்டாடுவது என தீர்மானிக்கப்பட்டது. அம்மா அவர்கள் பிறந்த நாளை பெண் குழந்தைகள் பாதுகாப்பு தினமாக அறிவித்ததற்காவும், காவேரி டெல்டா பகுதியை பாதுகாக்கப்பட்ட வேளாண் மண்டலமாக அறிவித்தற்காகவும்,
புதிதாக 11 மருத்துவ கல்லூரிகள் மற்றும் மருத்துவமனைகள் ஆரம்பிக்க அறிவிப்பு வெளியிட்டதற்கும் முதல்வர் மற்றும் துணை முதல்வர் ஆகியோருக்கு நன்றி தெரிவித்துக் கொள்கிறது. வரும் 14.03.2020-ம்தேதி திருப்பூரில் புதிதாக அமையவுள்ள மருத்துவக் கல்லூரி அடிக்கல் நாட்டு விழாவிற்கு வருகை தரும் முதல்வருக்கு கழகத்தின் சார்பில் சிறப்பான வரவேற்பு அளிப்பது, சேலம் தலைவாசலில் கால்நடை பூங்கா அமைக்க அடிக்கல் நாட்டியதற்கு முதல்வர், துணை முதல்வர் ஆகியோருக்கு நன்றி தெரிவித்து கொள்கிறது.

அத்திக்கடவு அவினாசி திட்டத்துக்கு இந்த பட்ஜெட்டில் கூடுதலாக ரூபாய் 500 கோடி ஒதுக்கீடு செய்ததற்கும் காவிரி -குண்டாறு இணைப்புத் திட்டத்துக்கு ரூபாய் 700 கோடி ஒதுக்கீடு செய்ததற்கும் முதல்வர், துணை முதல்வர் ஆகியோருக்கு நன்றி தெரிவித்து கொள்வது,

ஹஜ் யாத்திரை செல்லும் இஸ்லாமியர்களுக்கு சென்னையில் ஹஜ் இல்லம் கட்ட ரூபாய் 15 கோடி ஒதுக்கியும் உலமாக்களுக்கு மாத உதவி தொகையாக ரூபாய் 3000 வழங்கவும் உலமாக்களுக்கு ரூபாய் 25,000 மானியத்தில் இரு சக்கர வாகனம் வழங்க உத்தரவிட்ட முதல்வர், துணை முதல்வருக்கும் இந்த கூட்டம் ஏக மனதாக நன்றி தெரிவித்து கொள்கிறது. ஐந்து புதிய மாவட்டங்களை நிர்வாக வசதிக்காக உருவாக்கி அதற்கு ரூபாய் 500 கோடி நிதி ஒதுக்கிய முதல்வர், துணை முதல்வருக்கு இந்த கூட்டம் ஏக மனதாக நன்றியை தெரிவித்து கொள்கிறது. இவ்வாறு தீர்மானங்கள் நிறைவேற்றப்பட்டன.