சிறப்பு செய்திகள்

ப.சிதம்பரத்துக்கு சுயநலம் தான் முக்கியம் – முதலமைச்சர் கடும் தாக்கு….

சேலம்:-

பல ஆண்டுகள் மத்திய அமைச்சராக இருந்தும் தமிழகத்துக்கு சிறு துளி நன்மை கூட செய்யாத ப.சிதம்பரத்துக்கு சுயநலம் தான் முக்கியம் என்று முதலமைச்சர் எடப்பாடி கே.பழனிசாமி கூறினார்.

டெல்டா விவசாயிகளுக்காக மேட்டூர் அணையில் இருந்து தண்ணீர் திறந்து வைத்து முதலமைச்சர் எடப்பாடி கே.பழனிசாமி செய்தியாளர்களுக்கு அளித்த பேட்டி வருமாறு:-

மேட்டூர் அணையில் இருந்து இன்றைய தினம் தண்ணீர் திறக்கப்பட்டுள்ளது. அதே போல மேட்டூர் மேற்கு மற்றும் கிழக்கு கரைகளுக்கும் தண்ணீர் திறக்கப்பட்டுள்ளது.

கேள்வி:- தற்போது 3000 கன அடி நீர் திறக்கப்பட்டுள்ளது. படிப்படியாக திறந்து விடப்படும் தண்ணீர் அளவு உயர்த்தப்படுமா?

பதில்:- இப்போது பகல் நேரமாக இருப்பதால் அதிக அளவில் தண்ணீர் திறந்து விடப்பட்டால் கரையோர மக்கள் பாதிக்கப்படுவார்கள். எனவே, படிப்படியாக தண்ணீரின் அளவு உயர்த்தப்பட்டு 10 ஆயிரம் கன அடி அளவிற்கு திறந்து விடப்படும். அணைக்கு வரும் நீரின் அளவைப் பொறுத்து தண்ணீர் திறந்து விடப்படும் தண்ணீரின் அளவு படிப்படியாக உயர்த்தப்பட்டு, கடைமடைப் பகுதி வரையிலும் தண்ணீர் கொண்டு சேர்க்கப்படும். டெல்டா பகுதிகளில் இருக்கின்ற ஏரிகள், குளங்கள் முழுமையாக நிரப்பப்படும்.

கேள்வி:- கடைமடைப் பகுதிகளில் பெரும்பாலான இடங்களில் தூர்வாரப்படவில்லை என தொடர்ந்து விவசாயிகள் குற்றச்சாட்டினை முன் வைத்துள்ளனர்.

பதில்:– தூர்வாருவதற்கு ரூ.66 கோடி நிதி ஒதுக்கீடு செய்து டெண்டர் விடப்பட்டு பணிகள் துவங்கப்பட்டுள்ளது. இன்றைக்கு டெல்டா பாசன பகுதிகளில் இருக்கின்ற கால்வாய்கள் எல்லாம் எந்த அளவிற்கு சீர் செய்யப்படுகின்றன என்பதை கண்காணிப்பதற்காக தனியாக ஒரு ஐ.ஏ.எஸ். அதிகாரியை நியமித்து இருக்கின்றோம். பாலாஜி என்ற இந்திய ஆட்சிப்பணி அதிகாரி நியமிக்கப்பட்டு அவர் ஒவ்வொரு மாவட்டத்திற்கும் சென்று அந்தப் பணிகளை கவனித்துக் கொண்டிருக்கின்றார்.

கேள்வி:– விவசாயிகள் சுமார் 50 ஆயிரம் கன அடி வீதம் தண்ணீர் திறந்து விட கோரியுள்ளார்கள்.

பதில்:- கால்வாய்களில் சுமார் 26 ஆயிரம் கன அடி வீதம் மட்டுமே தண்ணீர் திறந்து விட முடியும். தற்போது விவசாயிகள் நாற்று நடும் பணியை செய்தி வருகின்றார்கள். பின்னர் தான் நடவுப்பணியினை தொடங்குவார்கள். தற்போது நாற்றுக்கு தேவையான தண்ணீர் திறந்து விடப்பட்டுள்ளது. விவசாயிகள் கோரிக்கையினை ஏற்று அவர்கள் எவ்வளவு தண்ணீர் கோருகிறார்களோ அவ்வளவு தண்ணிர் திறந்து விடப்படும்.

கேள்வி:- விவசாயிகளுக்கு தேவையான இடுபொருட்கள், உரங்கள் போதுமான அளவு உள்ளதா?
பதில்:- ஏற்கனவே கூறியதைப் போல விவசாயிகளுக்கு தேவையான உரம், இடுபொருட்களான விதை நெல் அனைத்தும் தயாராக இருக்கின்றது.

கேள்வி:- 220 டி.எம்.சி. தண்ணீர் அணையில் இருந்து வருகிறது 129 டி.எம்.சி. தண்ணீர் வடகிழக்கு பருவமழையை நம்பித்தான் உள்ளது என தெரிவித்துள்ளீர்கள். சென்ற வருடம் வடகிழக்கு பருவமழை பொய்த்தது போன்று இந்த வருடமும் பொய்த்துப் போனால், வேறு ஏதும் நீர் மேலாண்மை திட்டம் செயல்படுத்தப்படுமா?

பதில்:- கர்நாடகாவில் அனைத்து அணைகளும் நிரம்பிவிட்டன, இனி அவர்களால் தண்ணீரை தேக்கி வைக்க முடியாது. எனவே, இனி வருகின்ற நீர் அனைத்தையும் நமக்குத் தான் திறந்து விட முடியும். நமக்கு தேவையான நீர் கண்டிப்பாக கிடைக்கும். கர்நாடகாவில் உள்ள 4 அணையும் முழுக் கொள்ளளவினை எட்டி விட்ட காரணத்தால் உபரி நீர் முழுவதும் மேட்டூர் அணைக்கு வந்து சேரும்.

தற்போது அணைக்கு 42 ஆயிரம் கன அடி நீர் வந்து கொண்டிருக்கிறது. நாளைய தினம் கிருஷ்ண சாகர் அணையிலிருந்து தண்ணீர் திறந்து விடப்படும் என தெரிகிறது. கிருஷ்ண சாகர் அணைக்கு 80 ஆயிரம் கன அடி நீர் வந்து கொண்டிருப்பதாக தெரிவிக்கின்றார்கள். அந்த தண்ணீர் முழுவதும் நாளைய தினம் திறப்பார்கள் என்று எதிர்பார்க்கப்படுகிறது.

கேள்வி: – நீலகிரி மாவட்டம் கனமழையினால் அதிகமாக பாதிக்கப்பட்டுள்ளது. தற்போது ஸ்டாலின் நிவாரணம் வழங்கப்படும் எனவும், நிவாரணப்பணிகளுக்கு ரூ.10 கோடி வழங்கப்படும் எனவும் தெரிவித்துள்ளார்.

பதில்:- ஸ்டாலின் நிவாரணம் வழங்குவதாக தெரிவிக்கவில்லை. நிவாரணப்பணிகள் மேற்கொள்ளப்படும் என தெரிவித்துள்ளார். அதாவது நாடாளுமன்ற உறுப்பினர் நிதியில் இருந்து சின்னச் சின்னப் பணிகள் மேற்கொள்ளப்படும் என தெரிவித்துள்ளார். ரூ.10 கோடி மதிப்பில் என்ன பணிகள் மேற்கொள்ளப்படும். சுமார் 140 இடங்களில் நிலச்சரிவு ஏற்பட்டுள்ளது. அதனை சரி செய்ய எவ்வளவு நிதி வேண்டும் என்பதை கணக்கிட்டுக்கொள்ளுங்கள். ஸ்டாலின் நேற்றைய தினம் குறிப்பிட்டார், நீலகிரி மாவட்டத்தில் பாதிக்கப்பட்ட மக்களை அமைச்சர்கள் யாரும் வந்து சந்திக்கவில்லை என்ற தவறான கருத்தினை தெரிவித்துள்ளார்.

கனமழை பொழிந்தவுடனே எனது உத்தரவின் பேரில், வருவாய் துறை அமைச்சரை உடனடியாக அனுப்பி, பாதிக்கப்பட்ட பகுதி மக்களை சந்தித்து ஆறுதல் கூறி, அங்கு என்னென்ன பணிகள் மேற்கொள்ள வேண்டும் என்பதை அறிந்து, அது அரசின் கவனத்திற்கு கொண்டு வரப்பட்டு நிவாரணப் பணிகள் முடுக்கி விடப்பட்டுள்ளது. ஆகவே எதிர்கட்சி தலைவர் கூறுவது தவறான கருத்து. விளம்பரம் தேடத்தான் அதை சொல்லியிருப்பார் எனக் கருதுகின்றேன். பாதிக்கப்பட்ட மக்கள் அனைவருக்கும் அரசு உதவி செய்யும்.

உயிரிழந்தவர்களுக்கு ரூ.10 லட்சம் இழப்பீடாக அரசு அறிவித்திருக்கிறது. அதுமட்டும் அல்லாது, எதிர் கட்சி தலைவர் தான் விளம்பரம் தேடவில்லை என்று கூறியிருக்கிறார். நாங்களும் அதைத்தான் கூறுகிறோம். பின்னர் எதற்காக அமைச்சர்கள் சென்று பார்க்கவில்லை என்ற தவறான கருத்தினை தெரிவித்துள்ளார். அமைச்சர் சென்ற செய்தி தங்களுக்கு தெரியவில்லை. இதிலிருந்து என்ன தெரிகிறது எந்த செய்தியும் தெரியாமல், யாரோ கூறுகின்ற செய்தியை கேட்டு பத்திரிக்கைகளுக்கும் ஊடகங்களுக்கும் செய்தி கொடுப்பது தெரிகிறது.

இன்றைய தினம் துணை முதலமைச்சர் நீலகிரி மாவட்டத்திற்கு நேரில் சென்று பாதிக்கப்பட்ட மக்களை நேரில் சந்தித்து ஆறுதல் கூறியும், பாதிக்கப்பட்ட இடங்களை பார்வையிட்டு சீர் செய்ய என்னென்ன நடவடிக்கை எடுக்க வேண்டும் என்பதை ஆய்வு செய்து, அந்த ஆய்வின் அடிப்படையில் நாளைய தினம் உயர் அலுவலர்கள் கூட்டம் சென்னை, தலைமைச் செயலகத்திலே நடைபெற உள்ளது. நிவாரணப்பணிகள் வேகமாகவும், துரிதமாகவும் நடைபெற துணை முதலமைச்சர் இன்றைய தினம் (நேற்று) முழுவதும் நீலகிரி மாவட்டத்தில் சுற்றுப் பயணம் மேற்கொள்வார்.

கேள்வி :- ஸ்டாலின், நீங்கள் அமெரிக்கா செல்ல உள்ளதாக தெரிவித்துள்ளார். வெளிநாட்டுப் பயணத்தின் நோக்கம் என்ன?

பதில்:- அது குறித்து விரைவில் அறிவிக்கப்படும், பத்திரிகையாளர்களுக்கும் தெரிவிக்கப்படும். வெளிநாட்டுப்பயணத்தின் நோக்கம் தமிழகத்திற்கு அதிக அளவில் தொழிற்சாலைகள் வர வேண்டும் என்பதே. தமிழ்நாட்டில் இருந்து சென்று அயல் நாட்டில் உள்ள தொழில் அதிபர்களை அழைத்துப் பேசி அதிக முதலீட்டினை ஈர்ப்பதற்காகவே இந்த வெளிநாட்டுப் பயணத்தை மேற்கொள்கிறேன்.

அதேபோல, மின்சாரத் துறையில் நவீன தொழில்நுட்பத்தினை புகுத்தவும். இங்கு மிகப்பெரிய கால்நடைப் பூங்காவினை நாம் அமைக்க உள்ளோம். அதில் என்னென்ன திட்டங்களை செயல்படுத்தவேண்டும் என்பதற்கு அங்குள்ள கால்நடை ஆராய்ச்சி நிலையத்தினையும் சென்று பார்வையிட உள்ளேன். மேலும், சுகாதாரத்துறையில் நவீன முறையில் சிகிச்சை மேற்கொள்ள, இங்கிலாந்து நாட்டுடன் ஒப்பந்தமத் போட இருக்கிறோம். இதன் மூலம் மக்களுக்கு உயர்தர சிகிச்சை அளிக்கப்படும்.

கேள்வி:- ப.சிதம்பரம் மத்திய அரசு தமிழகத்தை யூனியன் பிரதேசமாக அறிவித்தால் கூட அ.தி.மு.க. அரசு வேடிக்கை பார்த்துக் கொண்டு தான் இருக்கும் என கூறியுள்ளார் ?

பதில்:- ப.சிதம்பரம் தமிழகத்திற்காக என்ன திட்டத்தை கொண்டு வந்துள்ளார். இவர் எத்தனை ஆண்டு காலம் மத்திய அமைச்சராக இருந்துள்ளார். அவரால் என்ன திட்டம் கொண்டு வரப்பட்டு, செயல்படுத்தப்பட்டுள்ளது. எத்தனை ஆண்டுகாலம் நிதியமைச்சராக இருந்துள்ளார், தேவையான நிதியை வழங்கினாரா? தொழிற்சாலைகள் அமைத்தாரா? இல்லை புதிய திட்டத்தைத் தான் கொண்டு வந்தாரா? காவிரி பிரச்சனையைத் தான் தீர்த்தாரா? முல்லை பெரியாறு பிரச்சனையைத் தான் தீர்த்தாரா? பாலாறு பிரச்சினையைத் தான் தீர்த்தாரா? எந்த பிரச்சினையைத் தான் அவர் தீர்த்துள்ளார்.

அவரது சுயநலம் மட்டுமே அவருக்கு முக்கியம். நாட்டு நலன் கிடையாது. ஆகவே அவரது பேச்சை பொருட்படுத்த அவசியம் இல்லை. மக்கள் அவரை ஏற்கனவே நிராகரித்து விட்டார்கள். அவர் எந்த மக்களைப் சந்திக்கிறார். நான் முதலமைச்சராக இருந்து எத்தனை முறை இங்கு வந்துள்ளேன். எத்தனை முறை மக்களைப் பார்த்துள்ளேன். எத்தனை திட்டங்களை அறிவித்துள்ளோன். ப.சிதம்பரம் மத்திய அமைச்சராக இருந்த போது எத்தனைமுறை தமிழகத்தில் சுற்றுப்பயணம் மேற்கொண்டுள்ளார். எத்தனை திட்டங்களை அறிவித்துள்ளார்.

கேள்வி:- காஷ்மீர் விவகாரத்தில் உங்களது நிலைப்பாடு என்ன?
பதில்:- இதய தெய்வம் புரட்சித்தலைவி அம்மா அவர்கள் 1984-ல் ஜூலை மாதம் அவர் மேலவை உறுப்பினராக இருந்தபோது தெரிவித்த கருத்தை, நாங்கள் நிறைவேற்றி இருக்கிறோம்.

இவ்வாறு முதலமைச்சர் எடப்பாடி கே.பழனிசாமி கூறினார்.