கன்னியாகுமரி

ஊராட்சிகள் வளர்ச்சிக்கு, அனைவரும் ஒருங்கிணைந்து செயல்பட வேண்டும் – என்.தளவாய்சுந்தரம் வேண்டுகோள்

கன்னியாகுமரி

ஊராட்சிகள் வளர்ச்சிக்கு அனைவரும் ஒருங்கிணைந்து செயல்பட வேண்டும் என்று தமிழ்நாடு அரசின் டெல்லி சிறப்பு பிரதிநிதி என்.தளவாய்சுந்தரம் வேண்டுகோள் விடுத்துள்ளார்.

தமிழ்நாடு அரசின் டெல்லி சிறப்பு பிரதிநிதி என்.தளவாய்சுந்தரம், தனது சொந்த நிதியிலிருந்து ரூ.3.10 லட்சம் செலவில் புதிதாக வாங்கப்பட்ட குப்பை அள்ளும் நவீன வாகனத்தை, தோவாளை ஊராட்சி மன்ற அலுவலகத்திற்கு வழங்கும் விழா மாவட்ட ஆட்சித்தலைவர் பிரசாந்த் மு.வடநேரே தலைமையில் நடைபெற்றது.

விழாவில் தமிழ்நாடு அரசின் டெல்லி சிறப்புப் பிரதிநிதி ந.தளவாய் சுந்தரம் கலந்து கொண்டு தனது சொந்த செலவில் புதிதாக வாங்கப்பட்ட குப்பை அள்ளும் நவீன வாகனத்திற்கான சாவியினை ஊராட்சி மன்றத்தலைவர் அ.நெடுஞ்செழியனிடம் வழங்கி தெரிவித்ததாவது:-

தோவாளை ஊராட்சி மன்ற பகுதி அரசியல் அப்பாற்பட்டு, அனைத்து கட்சியினரும், அனைத்து சமுதாயத்தினரும், ஒற்றுமையாக வாழக்கூடிய பகுதியாகும். முதலமைச்சரின் ஆணைக்கிணங்க, தோவாளையில் ரூ.1 கோடி செலவில், நூலக வசதிகளுடன் கூடிய மணிமண்டபம் தமிழுக்காக தொண்டாற்றி, வாழ்ந்து மறைந்த, கவிமணி தேசிக விநாயகம் பிள்ளை நினைவாக அமைக்கப்படவுள்ளது.

இப்பகுதி பொதுமக்களின் கோரிக்கையை ஏற்று, சார்பதிவாளர் அலுவலகம் ஏற்கனவே, அமைக்கப்பட்டுள்ளது. மேலும், தோவாளை மற்றும் அதனை சுற்றியுள்ள பகுதி கிராமங்களை சார்ந்த, பொதுமக்கள் பயன்பெறும் வகையில், தோவாளையில் மின்சாரவாரிய அலுவலகமும், தபால் நிலையமும் திறக்க நடவடிக்கை எடுக்கப்பட்டுள்ளது.

தோவாளை ஊராட்சி பகுதியில் அசம்பாவித சம்பவங்கள் மற்றும் திருட்டு சம்பவங்கள் நடைபெறாமல் தடுப்பதற்காக, கண்காணிப்பு கேமராக்கள் (சி.சி.டி.வி) அமைக்க வேண்டும் என்ற பொதுமக்களின் கோரிக்கையினை ஏற்று, அதற்கான நடவடிக்கையும் எடுக்கப்பட்டுள்ளது. மேலும், இப்பகுதிக்கு தேவையான அனைத்து அடிப்படை வசதிகளும், செய்வதற்கு அனைவரும் கட்சி வேறுபாடுகளுக்கு அப்பாற்பட்டு, ஒருங்கிணைந்து செயல்பட வேண்டும்.

இவ்வாறு தமிழ்நாடு அரசின் டெல்லி சிறப்பு பிரதிநிதி என்.தளவாய்சுந்தரம் பேசினார்.

இந்நிகழ்ச்சியில், மாவட்ட ஆவின் பெருந்தலைவர் எஸ்.ஏ.அசோகன், மாவட்ட தமிழ்நாடு மாநில மீன்வள கூட்டுறவு இணையப் பெருந்தலைவர் சேவியர் மனோகரன், தமிழ்நாடு மாநில சிறுபான்மையினர் நல ஆணைய உறுப்பினர் அ.ராஜன், மாவட்ட கூட்டுறவு ஒன்றியப் பெருந்தலைவர் எஸ்.கிருஷ்ணகுமார், ஊராட்சி ஒன்றியத்தலைவர்கள் இ.சாந்தினி, ஆர்.அய்யப்பன், மாவட்ட ஊராட்சி உறுப்பினர் மா.பரமேஸ்வரன், தோவாளை ஊராட்சி ஒன்றிய துணைத்தலைவர் பி.ஷேக் சையது அலி, ஊராட்சிமன்ற துணைத்தலைவர் என்.எல்.தாணு, அரசு அலுவலர்கள், துப்புரவு ஊழியர்கள் மற்றும் பொதுமக்கள் பலர் கலந்து கொண்டனர்.