சிறப்பு செய்திகள்

வேளாண் மண்டலம் அரசிதழில் வெளியீடு – முதலமைச்சருக்கு விவசாயிகள், பொதுமக்கள் பாராட்டு

சென்னை:-

காவேரி டெல்டா மாவட்டங்களை பாதுகாக்கப்பட்ட சிறப்பு வேளாண் மண்டலமாக சேலம் தலைவாசலில் கடந்த 9-ந்தேதி நடைபெற்ற கால்நடை பூங்கா அடிக்கல் நாட்டு விழாவில் முதலமைச்சர் எடப்பாடி கே.பழனிசாமி அறிவித்தார். இந்த அறிவிப்பு 10 நாளில் சட்டமாக கொண்டு வரப்பட்டது. சட்டப்பேரவையில் கடந்த 20-ந்தேதி காவிரி டெல்டா பகுதியை பாதுகாக்கப்பட்ட வேளாண் மண்டலமாக அறிவிக்கும் ஒரு சட்ட முன்வடிவினை முதலமைச்சர் எடப்பாடி கே.பழனிசாமி கொண்டு வந்தார். பின்னர் இந்த சட்ட முன்வடிவு நிறைவேற்றப்பட்டது.

அந்த மசோதாவில், வேளாண் மண்டலத்திற்குத் தேவையான அனைத்துப் பணிகளையும் மேற்கொள்வதற்கு 24 உறுப்பினர்களை கொண்ட அதிகார அமைப்பு அமைக்கப்படும். முதல்வரைத் தலைவராக கொண்டு இந்த அமைப்பு செயல்படும். துணை முதல்வர், சட்டத்துறை, வேளாண் துறை, சுற்றுச்சூழல் துறை, நகராட்சி நிர்வாகம் மற்றும் ஊரக வளர்ச்சித் துறை, தொழில் துறை, கால்நடைப் பராமரிப்புத் துறை, மீன்வளத்துறை ஆகிய துறைகளின் அமைச்சர்கள் இக்குழுவின் உறுப்பினர்களாகச் செயல்படுவர்.இந்த அதிகார அமைப்புக்கு உதவுவதற்காக மாவட்ட அளவில் ஒரு குழு
இருக்க வேண்டும் என்பதற்காக மாவட்ட ஆட்சியர் தலைமையில் 13 பேர் கொண்ட குழு ஒன்று அமைக்கப்படுகிறது. இதில் மாவட்ட ஆட்சியரால் பரிந்துரை செய்யப்பட்ட 2 விவசாயிகளின் பிரதிநிதிகள் இடம் பெறுவார்கள்.

துத்தநாக உருக்காலை, இரும்புத் தாது செயல்முறை ஆலை, ஒருங்கிணைந்த எஃகு ஆலை அல்லது இலகு இரும்பு ஆலை, செம்பு உருக்காலை, அலுமினியம் உருக்காலை, எண்ணெய் மற்றும் நிலக்கரிப் படுகை மீத்தேன் ஆலைகள், பாறைப் படிம எரிவாயு, ஹைட்ரோகார்பன் வாயு எடுத்தல், வாயுக்களின் ஆய்வுகள், துளைத்தெடுத்தல் மற்றும் பிரித்தெடுத்தல் உள்ளிட்ட ஆய்வுகளுக்கு அனுமதி வழங்கப்பட மாட்டாது.

தஞ்சை, திருவாரூர், நாகை ஆகிய 3 மாவட்டங்கள், கடலூர் மாவட்டத்தின் காட்டுமன்னார்கோவில், மேல்புவனகிரி, கீரப்பாளையம், பரங்கிப்பேட்டை மற்றும் குமராட்சி, புதுக்கோட்டை மாவட்டத்தின் அறந்தாங்கி, ஆவுடையார்கோயில், மணல்மேல்குடி, திருவரங்குளம் மற்றும் கரம்பக்குடி வட்டாரங்கள் பாதுகாக்கப்பட்ட வேளாண் மண்டலத்திற்கு உட்பட்ட பகுதிகளாக அறிவிக்கப்பட்டுள்ளன” என குறிப்பிடப்பட்டிருந்தது.

இந்நிலையில், இந்த சட்ட மசோதா ஆளுநர் ஒப்புதலுக்காக அனுப்பப்பட்டிருந்தது. இந்த மசோதாவுக்கு நேற்று முன்தினம் (21-ந் தேதி) ஆளுநர் பன்வாரிலால் ஒப்புதல் அளித்ததையடுத்து அந்த மசோதா சட்டமானது.இந்நிலையில் 22-ந் தேதி) பாதுகாக்கப்பட்ட ‘வேளாண் மண்டல மேம்படுத்துதல் சட்டத்தை’ தமிழக அரசு அரசிதழில் வெளியிட்டுள்ளது.சிறப்பு வேளாண் மண்டலம் அரசிதழில் வெளியிடப்பட்டதற்கு முதலமைச்சர் எடப்பாடி கே.பழனிசாமிக்கு விவசாயிகள் மற்றும் பொதுமக்கள் நன்றியும், பாராட்டும் தெரிவித்து உள்ளனர்.