தற்போதைய செய்திகள்

உழைக்கும் பெண்கள் 194 பேருக்கு அம்மா இரு சக்கர வாகனங்கள் – அமைச்சர் டாக்டர் வெ.சரோஜா வழங்கினார்

நாமக்கல்

நாமக்கல் மாவட்டத்தில் உழைக்கும் பெண்கள் 194 பேருக்கு அம்மா இரு சக்கர வாகனங்களை அமைச்சர் டாக்டர் வெ.சரோஜா வழங்கினார்.

நாமக்கல் மாவட்டம், நாமகிரிப்பேட்டை, வெண்ணந்தூர், ராசிபுரம் உள்ளிட்ட ஊராட்சி ஒன்றிய அலுவலகங்களில் நடைபெற்ற நிகழ்ச்சிகளில், உழைக்கும் மகளிருக்கு மானிய விலையில் அம்மா இருசக்கர வாகனம் பெறுவதற்கான ஆணைகள் வழங்கும் நிகழ்ச்சி, தமிழ்நாடு மாநில குழந்தைகள் உரிமைகள் பாதுகாப்பு ஆணையம் மற்றும் ஒருங்கிணைந்த பள்ளிக்கல்வித்துறையின் சார்பில் மாற்றுத்திறன் கொண்ட குழந்தைகளுக்கு உதவி உபகரணங்கள் வழங்கும் நிகழ்ச்சி, ராசிபுரம் அரசு மருத்துவமனைக்கு தொகுதி மேம்பாட்டு நிதித்திட்டத்தின் கீழ் பல்வேறு மருத்துவ உபகரணங்கள் வழங்கும் நிகழ்ச்சி நடைபெற்றது.

இந்நிகழ்ச்சியில் கழக மகளிர் அணி இணைச் செயலாளரும், சமூக நலன் மற்றும் சத்துணவுத் திட்டத்துறை அமைச்சருமான மருத்துவர்.வெ.சரோஜா கலந்து கொண்டு, நாமகிரிப்பேட்டை, வெண்ணந்தூர், ராசிபுரம் ஊராட்சி ஒன்றிய அலுவலகங்களில் 194 உழைக்கும் மகளிருக்கு மானிய விலையில் அம்மா இருசக்கர வாகனம் பெறுவதற்கான ஆணைகளை வழங்கினார்.

பின்னர், வெண்ணந்தூரில் நடைபெற்ற நிகழ்ச்சியில் தமிழ்நாடு மாநில குழந்தைகள் உரிமைகள் பாதுகாப்பு ஆணையம் மற்றும் ஒருங்கிணைந்த பள்ளிக்கல்வித்துறையின் சார்பில் 42 மாற்றுத்திறன்கொண்ட குழந்தைகளுக்கு உதவி உபகரணங்களையும், இராசிபுரம் அரசு மருத்துவமனைக்கு தொகுதி மேம்பாட்டு நிதித்திட்டத்தின் கீழ் அறுவை அரங்கு, தொற்று நோய் நீக்கு பகுதி, காது, மூக்கு, தொண்டை ஆகிய பிரிவுகளுக்கு ரூ.7.50 லட்சம் மதிப்பீட்டில் பல்வேறு மருத்துவ உபகரணங்களையும் அமைச்சர் டாக்டர் வெ.சரோஜா வழங்கினார். பின்னர், ரூ.2.00 லட்சம் மதிப்பீட்டில் நோயாளிகள் காத்திருப்பு பகுதியை திறந்து வைத்தார்.

இந்நிகழ்ச்சியில் நாமக்கல் மாவட்ட கழக அவைத்தலைவரும், முன்னாள் நாடாளுமன்ற உறுப்பினரும், மாவட்ட ஊராட்சிக்குழு துணைத்தலைவருமான பி.ஆர்.சுந்தரம், மாநில குழந்தைகள் உரிமைகள் பாதுகாப்பு ஆணைய உறுப்பினர் மீராசங்கர், இணை இயக்குனர் நலப்பணிகள் க.சாந்தி, ராசிபுரம் நகர கழக செயலாளரும், ராசிபுரம் நகர கூட்டுறவு வங்கி தலைவருமான எம்.பாலசுப்ரமணியன், வெண்ணந்தூர் ஒன்றிய கழக செயலாளரும், நாமக்கல் மாவட்ட கூட்டுறவு அச்சக தலைவருமான எஸ்.பி.தாமோதரன், நாமகிரிப்பேட்டை கிழக்கு ஒன்றிய கழக செயலாளரும், ஆர்.சி.எம்.எஸ் தலைவருமான ஈ.கே.பொன்னுசாமி, ராசிபுரம் ஒன்றிய கழக செயலாளரும் அட்மா குழுத்தலைவருமான எம்.காளியப்பன் உள்பட பலர் கலந்து கொண்டனர்.