தற்போதைய செய்திகள்

முதலமைச்சரின் சிறப்பு குறை தீர்க்கும் திட்ட முகாமில் பெறப்படும் அனைத்து மனுக்களுக்கும் விரைவில் தீர்வு – அமைச்சர் பி.தங்கமணி உறுதி…

நாமக்கல்:-

முதலமைச்சரின் சிறப்பு குறை தீர்க்கும் திட்ட முகாமில் பெறப்படும் அனைத்து மனுக்களுக்கும் விரைவில் தீர்வு காணப்படும் என்று அமைச்சர் பி.தங்கமணி உறுதி அளித்தார்.

நாமக்கல் மாவட்டம் குமாரபாளையம் நகராட்சி அலுவலகம் மற்றும் குமாரபாளையம் வட்டாட்சியர் அலுவலகத்தில் முதலமைச்சரின் சிறப்பு குறைதீர்க்கும் திட்ட முகாம் மாவட்ட ஆட்சித்தலைவர் மு.ஆசியா மரியம் தலைமையில் நடைபெற்றது.

இம்முகாம்களில் கழக அமைப்பு செயலாளரும், நாமக்கல் மாவட்ட கழக செயலாளரும், மின்சாரம், மதுவிலக்கு மற்றும் ஆயத்தீர்வைத்துறை அமைச்சருமான பி.தங்கமணி, கழக மகளிர் அணி இணை செயலாளரும், சமூக நலன் மற்றும் சத்துணவு திட்டத்துறை அமைச்சருமான மருத்துவர் வெ.சரோஜா ஆகியோர் கலந்து கொண்டு பொதுமக்களிடமிருந்து கோரிக்கை மனுக்களை பெற்று உரிய நடவடிக்கை மேற்கொள்ளுமாறு சம்மந்தப்பட்ட துறை அலுவலர்களுக்கு உத்தரவிட்டனர்.

இந்நிகழ்ச்சியில் அமைச்சர் பி.தங்கமணி பேசியதாவது:-

முதலமைச்சரின் சிறப்பு குறை தீர்க்கும் திட்ட முகாமானது அரசாங்கமே மக்களை தேடி சென்று மக்களின் குறைகளை மனுக்களாக பெற்று விரைந்து குறிப்பிட்ட காலத்திற்குள் தீர்வு வழங்கப்படக்கூடிய திட்டமாகும். புரட்சித்தலைவி அம்மா அவர்களின் வழியில் நல்லாட்சி நடத்திவரும் முதலமைச்சர் எடப்பாடி கே.பழனிசாமி முதலமைச்சரின் சிறப்பு குறை தீர்க்கும் திட்டத்தினை 19.08.2019 அன்று சேலம் மாவட்டத்தில் தொடங்கி வைத்தார்.

இத்திட்டத்தின் கீழ் பெறப்படும் மனுக்கள் அனைத்திற்கும் ஒரு மாத காலத்திற்குள் தீர்வு வழங்கப்படவுள்ளது. இம்முகாம்களில் பெற்ற மனுக்கள் அனைத்தும் கணினியில் பதிவு செய்யப்பட்டு அனைத்து மனுக்களின் மீதும் நடவடிக்கை மேற்கொள்ளப்பட்டு தீர்வு வழங்கப்படும்.நாமக்கல் மாவட்டத்தில் இதுவரை நடைபெற்ற முதலமைச்சரின் சிறப்பு குறைதீர்க்கும் திட்ட முகாம்களில் மொத்தம் 19,300-க்கும் மேற்பட்ட மனுக்கள் பெறப்பட்டுள்ளன. குமாரபாளையம் சட்டமன்ற தொகுதிக்குட்பட்ட அனைத்து பகுதிகளிலும் தேவையான அடிப்படை வசதிகள் செய்து தரப்பட்டுள்ளன.

இவ்வாறு அமைச்சர் பி.தங்கமணி பேசினார்.

இந்த நிகழ்ச்சிகளில் சமூக பாதுகாப்பு திட்டத்தின் கீழ் 2 நபர்களுக்கு தற்காலிக உதவித்தொகை பெறுவதற்கான ஆணைகளையும், 16 மாற்றுத்திறனாளிகளுக்கு மாற்றுத்திறனாளி உதவித்தொகை பெறுவதற்கான ஆணைகளையும், 3 நபர்களுக்கு முதியோர் உதவித்தொகை பெறுவதற்கான ஆணைகளையும், 35 நபர்களுக்கு மின்னணு குடும்ப அட்டைகளையும் அமைச்சர்கள் பி.தங்கமணி, மருத்துவர் வெ.சரோஜா ஆகியோர் வழங்கினர்.

முகாமில் சமூக பாதுகாப்பு திட்ட தனித்துணை ஆட்சியர் எஸ்.என்.பாலசுப்பிரமணியன், திருச்செங்கோடு கோட்டாட்சியர் ப.மணிராஜ், குமாரபாளையம் நகர வங்கி தலைவர் எ.கே.நாகராஜ், வட்டாட்சியர் தங்கம் உட்பட வருவாய்த்துறை அலுவலர்கள், அரசுத்துறை அலுவலர்கள் மற்றும் பொதுமக்கள் கலந்து கொண்டனர்.