தற்போதைய செய்திகள்

தண்ணீர் பிரச்சினை இல்லாத மாவட்டமாக கரூர் திகழும் – அமைச்சர் எம்.ஆர்.விஜயபாஸ்கர் பேச்சு…

கருர்:-

ஐந்து இடங்களில் கதவணைகள் மூலம் 5 டி.எம்.சி. நீர் தேக்கி வைக்க வாய்ப்பு உள்ளதால் கரூர் மாவட்டத்தில் இனிமேல் தண்ணீர் பிரச்சினை இருக்காது என்று அமைச்சர் எம்.ஆர்.விஜயபாஸ்கர் கூறினார்.

கரூர் நகராட்சிக்குட்பட்ட காந்திகிராமம், திண்ணப்பாநகர் மற்றும் முத்தாலடம்பட்டி ஆகிய பகுதிகளில் முதலமைச்சரின் சிறப்பு குறை தீர்க்கும் திட்ட முகாம் நடைபெற்றது. போக்குவரத்துத்துறை அமைச்சர் எம்.ஆர்.விஜயபாஸ்கர் கலந்து கொண்டு பொதுமக்களிடமிருந்து கோரிக்கை மனுக்களை பெற்று சம்பந்தப்பட்ட அலுவலர்களிடம் வழங்கி உரிய நடவடிக்கை மேற்கொள்ளுமாறு உத்தரவிட்டார்.

இம்முகாமில் அமைச்சர் எம்.ஆர்.விஜயபாஸ்கர் பேசியதாவது:-

புரட்சித்தலைவி அம்மா அவர்கள் தமிழகத்தின் வளர்ச்சிக்காகவும், தமிழக மக்களின் பொருளாதார முன்னேற்றத்திற்காகவும் எண்ணற்ற திட்டங்களை வழங்கினார். குறிப்பாக மாதந்தோறும் 1.80 கோடி குடும்ப அட்டைதாரர்களுக்கு 20 கிலோ விலையில்லா அரிசி, மகப்பேறு நிதிஉதவி, விலையில்லா ஆடுகள், மாடுகள் மற்றும் கோழிகள் வழங்கும் திட்டம், மிக்ஸி, கிரைண்டர், மற்றும் மின்விசிறி வழங்கும் திட்டம், இரண்டு பெண்குழந்தை பெற்றால் நிதியுதவி திட்டம் என எண்ணிலடங்கா திட்டங்களை புரட்சித்தலைவி அம்மாவின் வழியில் செயல்படும் தமிழக அரசு தொடர்ந்து செயல்படுத்தி வருகிறது.

புரட்சித்தலைவி அம்மாவின் நல்லாசியோடு ஆட்சி செய்துவரும் முதலமைச்சர் எடப்பாடி கே.பழனிசாமி அனைத்து திட்டங்களையும் மிக சிறப்பாக செயல்படுத்தி வருகிறார். கரூர் மாவட்டத்தின் வளர்ச்சிக்கென்று கேட்ட அனைத்து திட்டங்களையும் செயல்படுத்தி வருகிறார் முதலமைச்சர். ரூ.300 கோடி மதிப்பீட்டில் 1000 படுக்கைகளுடன் 150 மாணவ-மாணவிகள் பயிலக்கூடிய அரசு மருத்துவக்கல்லூரி மருத்துவமனை அமைக்கப்பட்டு அதில் உயர்தர சிகிச்சை அளிக்க எம்.ஆர்.ஐ. ஸ்கேன் நிறுவப்பட்டுள்ளது. ரூ.145 கோடி மதிப்பீட்டில் கரூர் மற்றும் திருச்சி மாவட்டங்களை இணைக்கும் நெரூர் – உன்னியூர் பாலம் என எண்ணற்ற திட்டங்களை செயல்படுத்தி வருகிறார்.

மேலும், நெரூர் பகுதியிலும், குளித்தலை பகுதியிலும் கதவணை கட்டுவதற்கு ஆய்வு பணிக்காக ரூ.50 லட்சம் நிதி ஒதுக்கீடு செய்யப்பட்டுள்ளது. அவ்வாறு கதவணைகள் அமைக்கப்படும்போது, மாயனூர், நஞ்சைபுகளூர், குளித்தலை, நெரூர் என 5 இடங்களிலும் உள்ள கதவணைகள் மூலம் சுமார் 5 டி.எம்.சி நீர் தேக்கி வைக்கக்கூடிய மாவட்டமாக கரூர் மாவட்டம் இருக்கும். தண்ணீர் பிரச்சினை என்பதே கரூர் மாவட்டத்தில் இருக்காது.

கரூர் நகராட்சிக்குட்பட்ட பகுதிகளில் ரூ.15 கோடி மதிப்பில் சுமார் 48,500 குடிநீர் இணைப்புகளுக்கு புதிய பைப்லைன் அமைக்கப்பட்டு மீட்டர் பொருத்தும் பணி நடைபெறுகிறது. குடிநீர் இணைப்புகள் பெற்றுள்ள அனைத்து வீடுகளுக்கும் இரண்டு நாட்களுக்கு ஒருமுறை சீரான குடிநீர் சென்று சேர வேண்டும் என்ற நோக்கத்தில் இந்த திட்டம் செயல்படுத்தப் பட்டுள்ளது. மேலும் வரும் நிதிநிலை அறிக்கையில் நிதிகள் பெற்று கரூர் நகராட்சிக்குட்பட்ட தாந்தோணி பகுதிகளிலும் பாதாள சாக்கடை திட்டம் செயல்படுத்தப்படவுள்ளது.

மேலும் சாலை பாதுகாப்பு நிதியில் ரூ.3.50 கோடி மதிப்பில் கரூர் அமராவதி பாலம் முதல் வெங்ககல் பட்டிவரை உள்ள சாலையில் எல்.ஈ.டி பல்பு விளக்குகள் அமைக்கப்பட உள்ளது. கரூர் மாவட்டத்தில் ஏழை பெண்களின் திருமாங்கல்யத்திற்கு ஒரு பவுன் தங்கம் மற்றும் திருமண நிதியுதவி வழங்க நடப்பு ஆண்டில் 2000 பெண்களுக்கு வழங்க 2000 பவுன்கள் தயாராக உள்ளது. அதே போல் 2018-2019 நிதியாண்டில் 1535 பணிக்கு செல்லும் பெண்களுக்கு இருசக்கர வாகனம் வாங்க மானியம் வழங்கப்பட்டுள்ளது. அனைவருக்கும் வீடு வழங்கும் திட்டத்தில் இடம் உள்ளவர்களுக்கு வீடுகட்ட மானியம் வழங்கப்பட்டு வருகிறது. இடம் இல்லாதவர்களுக்கு அடுக்குமாடி குடியிருப்பு வழங்கப்படுகிறது.

இவ்வாறு அமைச்சர் எம்.ஆர்.விஜயபாஸ்கர் பேசினார்.

முன்னதாக அமைச்சர் எம்.ஆர்.விஜயபாஸ்கர் தாந்தோணி அரசு கலைக்கல்லூரி முன்புறம் ரூ.15 லட்சம் மதிப்பில் நிழற்குடை அமைக்கும் பணியை பூமி பூஜை செய்து தொடங்கி வைத்தார்.

பின்னர் கரூர் நகராட்சிக்குட்பட்ட காளியம்மன் கோயில் பகுதி, அரசு கலை கல்லூரி பகுதி, ரத்தினம் சாலை பகுதி மற்றும் கல்யாண பசுபதி ஈஸ்வரர் கோயில் பகுதி ஆகிய இடங்களில் அமைச்சர் எம்.ஆர்.விஜயபாஸ்கர் பொது மக்களிடம் கேரிக்கை மனுக்களை பெற்று நடவடிக்கை மேற்கொண்டார்.

இந்நிகழ்ச்சியில், மாவட்ட வருவாய் அலுவலர் சி.ராஜேந்திரன், கரூர் வருவாய் கோட்டாட்சியிர் சந்தியா, நகராட்சி ஆணையர் (பொ) ராஜேந்திரன், வட்டாட்சியர்கள் அமுதா, ஈஸ்வரன், தொலைபேசி ஆலோசனைக்குழு உறுப்பினர் சிவசாமி, நகர கூட்டுறவு வங்கி தலைவர் திருவிகா, கூட்டுறவு மொத்த விற்பணை பண்டகசாலை தலவைர் நெடுஞ்செழியன், கூட்டுறவு சங்கங்களின் பிரதிநிதிகள் வி.சி.கே.ஜெயராஜ, மல்லிகா சுப்பராயன் உள்ளிட்ட பலர் கலந்து கொண்டனர்.