மற்றவை

முதல்வரின் சிறப்பான செயல்பாட்டால் தமிழகம் வளர்ச்சி அடைந்து வருகிறது – அமைச்சர் எஸ்.பி.வேலுமணி பெருமிதம்…

புதுக்கோட்டை:-

முதலமைச்சரின் சிறப்பான செயல்பாட்டால் தமிழகம் வளர்ச்சி அடைந்து வருகிறது என்று அமைச்சர் எஸ்.பி.வேலுமணி பெருமிதத்துடன் கூறினார்.

புதுக்கோட்டை மாவட்டம், விராலிமலை ஊராட்சி ஒன்றியம், மதயானைப்பட்டியில் செயல்பட்டு வரும் காவேரி கூட்டுக் குடிநீர் திட்ட நீருந்து நிலையத்தை நகராட்சி நிர்வாகம், ஊரக வளர்ச்சி மற்றும் சிறப்பு திட்டங்கள் செயலாக்கத்துறை அமைச்சர் எஸ்.பி.வேலுமணி, உணவுத்துறை அமைச்சர் ஆர்.காமராஜ், மக்கள் நல்வாழ்வுத்துறை அமைச்சர் டாக்டர் சி.விஜயபாஸ்கர், சுற்றுலாத்துறை அமைச்சர் வெல்லமண்டி என்.நடராஜன், பிற்படுத்தப்பட்டோர் மற்றும் சிறுபான்மையினர் நலத்துறை அமைச்சர் எஸ்.வளர்மதி ஆகியோர் நேற்று நேரில் பார்வையிட்டு ஆய்வு செய்தனர்.

பின்னர் அமைச்சர் எஸ்.பி.வேலுமணி செய்தியாளர்களிடம் கூறியதாவது:-

புதுக்கோட்டை மாவட்டத்தில் விராலிமலை, அன்னவாசல், பொன்னமராவதி உள்ளிட்ட பல்வேறு ஊராட்சி ஒன்றியங்களை சேர்ந்த 1,766 ஊரக குடியிருப்புகள் மற்றும் சிவகங்கை மாவட்டத்தில் உள்ள 125 ஊரக குடியிருப்புகள் பயன்பெறும் வகையில் ரூ.301.50 கோடி மதிப்பீட்டில் நிறைவேற்றப்பட்ட காவேரி கூட்டு குடிநீர் திட்டத்தில் விராலிமலை ஊராட்சி ஒன்றியம், மதயானைப்பட்டியில் உள்ள காவேரி கூட்டு குடிநீர் திட்ட நீருந்து நிலையம் பார்வையிட்டு ஆய்வு செய்யப்பட்டது.

மக்கள் நல்வாழ்வுத்துறை அமைச்சரின் கோரிக்கையின் படி இத்திட்டத்தில் விடுபட்ட கிராமங்களை சேர்க்க உரிய நடவடிக்கை மேற்கொள்ளப்படும். முதலமைச்சரின் சிறப்பான செயல்பாட்டால் தமிழகத்தில் 50 ஆண்டுகளில் இல்லாத வளர்ச்சித் திட்டப் பணிகள் செயல்படுத்தப்பட்டு வருகிறது.

உள்ளாட்சித்துறையின் சிறப்பான செயல்பாட்டால் நாகநிதி திட்டத்திற்காக வேலூர் மாவட்டம் மத்திய அரசின் விருதை பெற்றுள்ளது. புரட்சித்தலைவி அம்மா அவர்களால் செயல்படுத்தப்பட்ட மழைநீர் சேகரிப்புத் திட்டத்தை தற்பொழுது அனைத்து பகுதிகளிலும் செயல்படுத்த நடவடிக்கை மேற்கொள்ளப்பட்டு வருகிறது. மேலும் இப்பணிகளை 3 மாதத்திற்குள் முடிக்க அலுவலர்களுக்கு அறிவுறுத்தப்பட்டுள்ளது. தொற்றுநோய் ஒழிப்பு பணிகள் குறித்தும், உள்ளாட்சித்துறையில் செயல்படுத்தப்படும் அனைத்து திட்டப் பணிகள் குறித்தும் இன்றையதினம் ஆய்வு செய்யப்பட உள்ளது.

குறிப்பாக புரட்சித்தலைவி அம்மா அவர்கள் செயல்படுத்திய சிறப்பான மக்கள் நலத்திட்டங்களை முதலமைச்சர் தொடர்ந்து செயல்படுத்தி வருகிறார். அந்த வகையில் திருச்சி, புதுக்கோட்டை உள்ளிட்ட 7 மாவட்டங்களில் ஊரக வளர்ச்சித்துறையின் மூலம் செயல்படுத்தப்பட்டு வரும் மழைநீர் சேகரிப்பு, பிரதம மந்திரி வீடு கட்டும் திட்டம், தொற்றுநோய் தடுப்பு திட்டம் போன்ற பல்வேறு திட்டங்கள் இன்றையதினம் ஆய்வு செய்யப்பட உள்ளது.

தற்பொழுது திருச்சியில் ஸ்மார்ட் சிட்டி திட்டம், மழைநீர் சேகரிப்பு திட்டம், குடிமராமத்து திட்டம் போன்ற திட்டங்களை பார்வையிட்டு ஆய்வு செய்தோம்.குடிமராமத்து திட்டம் என்ற சிறப்பான திட்டத்தை செயல்படுத்த முதலமைச்சர் உத்தரவிட்டுள்ளார். குடிமராமத்து திட்டத்தின் கீழ் பொதுப்பணித்துறையின் கட்டுப்பாட்டில் உள்ள குளங்கள் மற்றும் வரத்து வாரிகள் தூர்வாரப்பட்டு வருகின்றன.

இதேபோன்று ரூ.1,250 கோடி மதிப்பீட்டில் நிதி ஒதுக்கீடு செய்யப்பட்டு ஊரக வளர்ச்சித்துறையின் கட்டுப்பாட்டில் கிராமங்களில் உள்ள குளங்கள் தூர்வாரப்பட்டு வருகின்றன. குடிமராமத்து திட்டத்தின் கீழ் ஸ்ரீரங்கம் தொகுதியில் குளம் தூர்வாரும் பணிகளை பார்வையிட்டு ஆய்வு செய்தோம். இத்திட்டம் மிகுந்த பயனுள்ளதாக அமைந்துள்ளது என்று பொதுமக்கள் கருத்து தெரிவித்தனர்.

இவ்வாறு அமைச்சர் எஸ்.பி.வேலுமணி கூறினார்.

அதன்பின்னர் அமைச்சர் டாக்டர் சி.விஜயபாஸ்கர் கூறியதாவது:-

பொதுமக்களின் முன்னேற்றத்திற்காக எண்ணற்ற திட்டங்களை முதமைச்சர் செயல்படுத்தி வருகிறார். அந்த வகையில் புதுக்கோட்டை மாவட்ட மக்களின் குடிநீர் தேவையை பூர்த்தி செய்யும் வகையில் ரூ.301.50 கோடி மதிப்பீட்டில் காவேரி பார்வையிட்டு ஆய்வு செய்தோம்.

மதயானைப்பட்டி நீருந்து நிலையத்தில் தரைமட்ட நீர்தேக்கத் தொட்டி 2 எண்ணிக்கையில் முறையே 5,90,000 லிட்டர் மற்றும் 2,48,000 லிட்டர் கொள்ளளவு கொண்டதாகும். இங்கு 150 குதிரை திறன் கொண்ட 3 மின்மோட்டார்கள் மூலம் நிமிடத்திற்கு 74 மீட்டர் அழுத்தத்துடன், இயக்கப்பட்டு 192 தரைமட்ட நீர்தேக்கத் தொட்டிக்கு 11,836 லிட்டர் குடிநீர் அனுப்பப்பட்டு 1,570 கிராமங்களுக்கு குடிநீர் விநியோகம் செய்யப்பட்டு வருகிறது. மேலும் இப்பகுதி பொதுமக்களின் அனைத்து கோரிக்கைகளையும் நிறைவேற்ற உரிய நடவடிக்கை மேற்கொள்ளப்படும்.

இவ்வாறு அமைச்சர் டாக்டர்.சி.விஜயபாஸ்கர் பேசினார்.

இந்த ஆய்வின் போது ஊரக வளர்ச்சி மற்றும் ஊராட்சித்துறை இயக்குநரும் நகராட்சி நிர்வாக ஆணையாளருமான (பொ) கா.பாஸ்கரன், தமிழ்நாடு குடிநீர் வடிகால் வாரிய மேலாண்மை இயக்குநர் சி.என்.மகேஸ்வரன், மாவட்ட ஆட்சித் தலைவர் பி.உமாமகேஸ்வரி, தமிழ்நாடு வீட்டுவசதி வாரியத்தலைவர் பி.கே.வைரமுத்து உள்ளிட்ட அதிகாரிகள் உடனிருந்தனர்.