சிறப்பு செய்திகள்

கோவையில் ஜல்லிக்கட்டு போட்டி – வெற்றி பெற்றவர்களுக்கு அமைச்சர் எஸ்.பி.வேலுமணி பரிசு வழங்கி பாராட்டு

கோவை

கோவையில் ஜல்லிக்கட்டு போட்டிகளை அமைச்சர் எஸ்.பி.வேலுமணி துவக்கி வைத்து வெற்றிபெற்ற வீரர்களுக்கும், சிறந்த காளைகளின் உரிமையாளர்களுக்கும் பரிசுகளை வழங்கி பாராட்டு தெரிவித்தார்.

கோயம்புத்தூர் மாவட்டம் செட்டிப்பாளையம் எல் அண்ட் டி பைபாஸ் சாலை அருகே கோவை மாவட்ட நிர்வாகம் மற்றும் கோவை ஜல்லிக்கட்டு சங்கம் இணைந்து மாபெரும் ஜல்லிக்கட்டு விளையாட்டு போட்டியை நேற்று நடத்தியது. இப்போட்டியை கழக அமைப்பு செயலாளரும், கோவை புறநகர் மாவட்டக் கழகச் செயலாளரும், நகராட்சி நிர்வாகம், ஊரக வளர்ச்சி மற்றும் சிறப்புத்திட்டங்கள் செயலாக்கத் துறை அமைச்சருமான எஸ்.பி.வேலுமணி கொடியசைத்து தொடங்கி வைத்தார். முன்னதாக மாடுபிடி வீரர்கள், பார்வையாளர்கள் உள்பட அனைவரும் அமைச்சர் எஸ்.பி.வேலுமணி தலைமையில் ஜல்லிக்கட்டு உறுதிமொழி ஏற்றனர்.

போட்டியை தொடங்கி வைத்து அமைச்சர் எஸ்.பி.வேலுமணி பேசியதாவது:-

கோயம்புத்தூர் மாவட்டத்தில் ஜல்லிக்கட்டு விளையாட்டு விழா 1979-க்கு பிறகு கடந்த 2018,2019 ஆண்டுகளில் கோவையில் நடைபெற்றது. அதனைத் தொடர்ந்து இந்த ஆண்டும் ஜல்லிக்கடடு விழா நடைபெறுவதில் கோவை மக்களில் ஒருவனாக மிகவும் மகிழ்ச்சியடைகிறேன். ஜல்லிக்கடடு விளையாட்டு என்பது தமிழர்களின் உணர்வில் கலந்த நீண்ட பழமை வாய்ந்த பாரம்பரியம் கொண்ட வீர விளையாட்டாகும். இன்று நமது மாவட்டத்தில் நடைபெற்ற ஜல்லிக்கட்டு விழாவில் 900 மாடுகளும் 600 மாடுபிடிவீரர்களும் பங்கேற்றனர்.

மேலும் ஜல்லிக்கட்டினை பொதுமக்கள் அமர்ந்து கண்டு களிக்கும் வகையில் அனைத்து ஏற்பாடுகளும் மாவட்ட நிர்வாகம் மற்றும் கோவை ஜல்லிக்கட்டு சங்கம் சார்பில் செய்யப்பட்டிருந்தது. நமது மாவட்டத்தில் தொடர்ந்து 3 வது முறையாக இவ்விழா சிறப்புற நடைபெற உறுதுணையாக இருந்த அனைவருக்கும் வாழ்த்துக்களை தெரிவித்துக் கொள்கிறேன்.

இவ்வாறு அமைச்சர் எஸ்.பி.வேலுமணி பேசினார்.

தெலுங்கானா ஆளுநர் தமிழிசை சவுந்தராஜன், ஈஷா யோக மைய நிறுவனர் ஜக்கி வாசுதேவ் ஆகியோர் சிறப்பு விருந்தினர்களாக கலந்து கொண்டு ஜல்லிக்கட்டு போட்டியை கண்டு களித்தனர். பின்னர் ஜல்லிக்கட்டில் சீறிப்பாய்ந்து வந்த காளைகளை அடக்கி சிறந்த மாடுபிடி வீரர்கள் போட்டி போட்டுக்கொண்டு அடக்கினர். சில காளைகள் வீரர்களிடம் பிடிபடாமல் மிரட்டியபடி சென்றன. இப்போட்டியை கோவை மாவட்டத்தில் இருந்து 2 லட்சத்துக்கும் மேற்பட்டோர் வந்திருந்து கண்டு களித்தனர்.

முடிவில் ஜல்லிக்கட்டு போட்டியில் வெற்றி வீரர்களுக்கும், சிறந்த காளைகளுக்கும் பாராட்டுச் சான்றிதழ் மற்றும் பரிசு பொருட்களை பரிசுப் பொருட்களையும், அமைச்சர் எஸ்.பி.வேலுமணி வழங்கினார்.