திருவண்ணாமலை

குழந்தைகள் இறப்பு விகிதம்,மற்ற மாநிலங்களுக்கு தமிழகம் முன்னோடி : வி.பன்னீர்செல்வம் எம்.எல்.ஏ. பெருமிதம்…

திருவண்ணாமலை:-

மருத்துவத்துறையில் தமிழகம் மற்ற மாநிலங்களுக்கு முன்னோடியாக திகழ்கிறது என்று வி.பன்னீர்செல்வம் எம்.எல்.ஏ. பெருமிதத்துடன் கூறினார்.

திருவண்ணாமலை மாவட்டம், கலசபாக்கம் சட்டமன்ற தொகுதிக்குட்பட்ட புதுப்பாளையம் ஒன்றியம், அம்மாபாளையம் கிராமத்தில் தமிழக அரசின் பொது சுகாதாரத்துறை சார்பில் சிறப்பு பொது மருத்துவ முகாம் மற்றும் கர்ப்பிணி பெண்களுக்கான ஊட்டச்சத்து பெட்டகம் வழங்கும் விழா நடைபெற்றது. விழாவிற்கு வட்டார மருத்துவ அலுவலர் விக்னேஷ் தலைமை தாங்கினார். கலசபாக்கம் சட்டமன்ற உறுப்பினர் வி.பன்னீர்செல்வம் முகாமினை துவக்கி வைத்து கர்ப்பிணி தாய்மார்களுக்கு தேவையான சத்துணவுகள் அடங்கிய பெட்டகத்தை வழங்கினார்.

பின்னர் வி.பன்னீர்செல்வம் எம்.எல்.ஏ பேசியதாவது:-

நோயற்ற வாழ்வே, குறைவற்ற செல்வம் என்றார்கள் நம் முன்னோர்கள். சுவர் இருந்ததால் தான் சித்திரம் வரைய முடியும் என்று பெரியோர்கள் கூறுவார்கள். எனவே நோயில்லாத வாழ்வை பெறுபவனே மிகப்பெரிய செல்வந்தன் என்பதில் சந்தேகமில்லை. இன்றைக்கு தமிழ்நாடு மருத்துவத்தில் மற்ற மாநிலங்களுக்கு முன்னோடியாகவும், முன்மாதிரியாகவும் விளங்குகிறது என்றால் அதற்கு காரணம் புரட்சித்தலைவி அம்மா அவர்கள் தீட்டிய திட்டங்கள் தான் காரணம் என்பதை உலகம் அறியும்.

அரசு மருத்துவ நிலையங்களுக்கு வரும் ஏழை, எளிய மக்களுக்கு தங்கு தடையின்றி உயர்தர மருத்துவ சேவை கிடைக்க வேண்டும் என்பதற்காக புரட்சித்தலைவி அம்மாவின் வழியில் அரசு புதிய ஆரம்ப சுகாதார நிலையங்கள் தோற்றுவித்தல், அரசு மருத்துவமனைகளின் கட்டமைப்புகளை வலுப்படுத்துதல், எம்.ஆர்.ஐ. ஸ்கேன், கேத் ஆய்வகங்கள், சி..டி. ஸ்கேன் போன்ற நவீன மருத்துவ கருவிகளை வழங்குதல் போன்றவற்றை அம்மாவின் அரசு இன்றைக்கு செயல்படுத்தி வருகிறது.

அதே போன்று திருமண நிதி உதவி, முதலமைச்சரின் விரிவாக மருத்துவ காப்பீட்டு திட்டம், குழந்தைகள் நல பரிசு பெட்டகம், அம்மா மகப்பேறு சஞ்சீவி திட்டம், அம்மா முழுஉடல் பரிசோதனை திட்டம் மற்றும் மகளிரிருக்காக மகளிர் முழுஉடல் பரிசோதனை திட்டம், விலையில்லா சேனட்டரி நாப்கின் வழங்கும் திட்டம், நடமாடும் மருத்துவமனை திட்டம், தொற்றா நோய் தடுப்பு, கட்டுப்படுத்துதல் மற்றும் சிகிச்சை அளித்தல் மற்றும் உயர்நிலை மருத்துவமனை கட்டமைப்பு வசதிகள் விரிவுப்படுத்துதல் தமிழ்நாடு அரசு பன்னோக்கு உயர் சிறப்பு மருத்துவமனை, விபத்து சேவை மையங்களுடன் கூடிய உயர்சிறப்பு மருத்துவமனைகள் நிறுவுதல், 108 அவசர ஊர்தி சேவை பல்வேறு சிறப்பு திட்டங்கள் அம்மாவின் அரசு செயல்படுத்தி வருகிறது.

மேலும் மாவட்ட தலைமை மருத்துவமனைகளில் தாய் சேய் நலம், விபத்து கால சிகிச்சை, தொற்றா நோய்களுக்கான சிகிச்சை. அறுவை சிகிச்சை போன்ற உயர் மருத்துவ சிகிச்சைக்காக நவீன மருத்துவ கருவிகள் வழங்க ரூ.122 கோடியே 19 லட்சம் நடப்பாண்டிற்கு நிதி ஒதுக்கீடு செய்யப்பட்டுள்ளது.

குழந்தைகளின் இறப்பு விகிதத்தை குறைப்பதில் தமிழ்நாடு சாதனை படைத்துள்ளது. இறப்பு விகிதம் குறைவாக உள்ள பெரிய மாநிலங்களில் தமிழகம் 2-வது இடத்தில் உள்ளது. எனவே பொதுமக்கள் அரசு மருத்துவமனைக்கு சென்று பயனடையுமாறு கேட்டுக்கொள்கிறேன்.

இவ்வாறு வி.பன்னீர்செல்வம் எம்.எல்.ஏ. பேசினார்.

இந்நிகழ்ச்சியில் வட்டார வளர்ச்சி அலுவலர் லட்சுமி, மாவட்ட கழக பொருளாளர் எம்.எஸ்.நைனாகண்ணு, ஒன்றிய செயலாளர் புருஷோத்தமன், செங்கம் நிலவள வங்கி தலைவர் வேலு, மேல்முடியனூர் கூட்டுறவு சங்கத் தலைவர் துரைசாமி, சித்த மருத்துவர் மோகன், ஊராட்சி மன்ற செயலாளர் சங்கர், சுகாதார ஆய்வாளர்கள், செவிலியர்கள், கழக நிர்வாகிகள் உள்பட பலர் கலந்து கொண்டனர்.