தற்போதைய செய்திகள்

தி.மு.க.வுக்கு மரண அடி கொடுக்க மக்கள் தயாராகி விட்டனர் – ப.ரவீந்திரநாத்குமார் எம்.பி. பேச்சு

தேனி

ஓட்டுக்காக பொய் பிரச்சாரம் செய்யும் தி.மு.க.வுக்கு மரண அடி கொடுக்க மக்கள் தயாராகி விட்டனர் என்று ப.ரவீந்திரநாத்குமார் எம்.பி. கூறினார்.

தேனி மாவட்டம், தேனி ஒன்றியத்திற்குட்பட்ட பழனிசெட்டிபட்டியில் புரட்சித்தலைவி அம்மா அவர்களின் 72-வது பிறந்த தின விழா பொதுக்கூட்டம் ஒன்றிய செயலாளர் ஆர்.டி.கணேசன் தலைமையில் நடைபெற்றது. பழனிசெட்டிபட்டி பேரூராட்சி செயலாளர் தீபன்சக்கரவர்த்தி வரவேற்றார்.

இக்கூட்டத்தில் தேனி தொகுதி நாடாளுமன்ற உறுப்பினரும், மாவட்ட அம்மா பேரவை செயலாளருமான ப.ரவீந்திரநாத் குமார், மதுரை மாவட்ட மத்திய கூட்டுறவு வங்கி தலைவரும், அனைத்துலக எம்.ஜி.ஆர் மன்ற துணை செயலாளருமான எம்.எஸ்.பாண்டியன் ஆகியோர் சிறப்புரையாற்றினர்.

இக்கூட்டத்தில் ப.ரவீந்திரநாத்குமார் எம்.பி. பேசியதாவது:- 

புரட்சித்தலைவி அம்மா 91-96ல் பெண்சிசு கொலையை தடுத்திட தொட்டில் குழந்தை திட்டத்தை கொண்டு வந்தார். தொட்டில் குழந்தையாக இருந்தவர்கள் இன்று மருத்துவராக, பொறியாளராக, பல்வேறு பணிகளில் உள்ளனர். மேலும் பெண் கல்வியை ஊக்குவித்து மகளிர் காவல் நிலையத்தை கொண்டு வந்து பெண்களுக்கு பெருமை சேர்த்தார்.

இலவச மிக்சி, கிரைண்டர், பேன் திட்டம், மாணவ, மாணவிகளுக்கு கல்வி உபகரணங்கள் வழங்கும் திட்டம் என எண்ணற்ற திட்டங்களை கொண்டு வந்தார். ஏழை பெண்களின் திருமணம் தடைபட்டு விடக்கூடாது என திருமண நிதி மற்றும் தாலிக்கு தங்கம் வழங்கும் திட்டத்தை கொண்டு வந்தார். இத்திட்டத்தில் இதுவரை சுமார் 12 லட்சம் பெண்கள் பயனடைந்துள்ளனர்.

நிதிநிலை சரியில்லை என எதிர்கட்சிகள் கூறினாலும் தமிழக மக்களின் வாழ்க்கைதரத்தை முன்னேற்றி பார்க்க வேண்டும் என திட்டவட்டமாக கூறி திட்டங்களை தொடர்ந்து செயல்படுத்தினார். முல்லை பெரியாறு அணை பிரச்சினையில் 136 அடியிலிருந்து 142 அடி வரை நீரை தேக்கிட திமுக காங்கிரஸ் அரசு எந்த முயற்சியும் செய்யவில்லை. காவேரி பிரச்சினையில் தமிழகத்தின் உரிமையை விட்டு கொடுத்தனர்.

ஆனால் புரட்சித்தலைவி அம்மா அவர்கள் உச்சநீதிமன்றம் சென்று வாதாடி போராடி தமிழகத்தின் உரிமையை நிலைநாட்டி தென்மாவட்டங்களை சோலைவனமாக்கியுள்ளார். ஆனால் சுமார் 10 ஆண்டுகாலம் மாநிலத்திலும், மத்தியிலும் ஆட்சியில் இருந்த திமுக-காங்கிரஸ் அரசு எந்த ஒரு நல்ல திட்டத்தையும் கொண்டு வந்ததில்லை. அதே நேரத்தில் அவர்கள் ஆட்சியில் இருந்தபோது தான் இலங்கையில் ஈழத்தமிழர்கள் கொத்து கொத்தாக சாகடிக்கப்பட்டனர். அப்பொழுது தமிழக மக்களை முட்டாளாக்க கருணாநிதி உண்ணாவிரதம் நாடாகமாடினார்.

காவேரி டெல்டா பகுதியில் விவசாயிகள் கால் வைத்தால் தான் நாம் சோற்றில் கை வைக்க முடியும் என புரட்சித்தலைவி அம்மாவின் தொண்டர்களாகிய முதல்வரும், துணை முதல்வரும் இன்று காவேரி டெல்டா பகுதியை பாதுகாக்கப்பட்ட சிறப்பு வேளாண் மண்டலமாக அறிவித்து மசோதா தாக்கல் செய்து நிறைவேற்றியுள்ளனர். இதை எதிர்த்து திமுகவினர் வெளிநடப்பு செய்கின்றனர். புரட்சித்தலைவர் மட்டும் அன்று கழகத்தை ஆரம்பித்திருக்காவிட்டால் திமுகவினர் தமிழகத்தை சுடுகாடாக்கியிருப்பார்கள்.

தேர்தலில் வெற்றி பெற திமுகவினர் தமிழக மக்களை நம்பாமல், பிரசாந்த் கிஷோரை நம்புகின்றனர். வரும் சட்டமன்ற தேர்தலில் திமுகவிற்கு மரண அடி கொடுக்க மக்கள் தயாராகி விட்டனர். கடந்த நாடாளுமன்ற தேர்தலில் திமுக செய்தது பொய் பிரச்சாரம் என தற்போது மக்கள் உணர்ந்துள்ளனர். இன்று மத்திய அரசால் கொண்டு வரப்பட்ட குடியுரிமை சட்டத்தால் இந்திய குடிமகன் யாருக்காவது பாதிப்பு இருக்கிறதா என்று முதல்வர் கேட்ட கேள்விக்கு மு.க.ஸ்டாலினிடம் இருந்து எந்த பதிலும் இல்லை.

இவ்வாறு ப.ரவீந்திரநாத்குமார் எம்.பி. பேசினார்.

முடிவில் தேனி மாவட்ட எம்.ஜி.ஆர் மன்ற துணை செயலாளர் ஜெயப்பிரகாஷ் நாராயணன் நன்றி கூறினார். இக்கூட்டத்தில் மாவட்ட அவைத்தலைவர் பொன்னுப்பிள்ளை, மாவட்ட துணை செயலாளர் வசந்தாநாகராஜ் மற்றும் ஒன்றிய, பேரூர் கழக நிர்வாகிகள், தொண்டர்கள், பொதுமக்கள் கலந்து கொண்டனர்.