தற்போதைய செய்திகள்

கரூர் மாவட்டத்தில் ரூ.164.60 லட்சம் மதிப்பில் புதிய திட்டப் பணிகள் – அமைச்சர் எம்.ஆர்.விஜயபாஸ்கர் அடிக்கல்

கரூர்

பல்வேறு மக்கள் நலத்திட்டங்களின் மூலம் ரூ.164.60 லட்சம் மதிப்பிலான புதிய பணிகள் தொடக்க விழா மற்றும் முடிவுற்ற பணிகளை மக்களின் பயன்பாட்டிற்காக தொடங்கி வைக்கும் நிகழ்ச்சி கரூர் மாவட்டத்தின் பல்வேறு பகுதிகளில் நடைபெற்றது. இந்நிகழ்ச்சிகளில் கரூர் மாவட்ட கழக செயலாளரும், கழக அண்ணா தொழிற்சங்க பேரவை செயலாளரும், போக்குவரத்துத்துறை அமைச்சருமான எம்.ஆர்.விஜயபாஸ்கர், மாவட்ட வருவாய் அலுவலர் சி.ராஜேந்திரன் தலைமையில், மாவட்ட ஊரக வளர்ச்சி முகமை திட்ட இயக்குநர் எஸ்.கவிதா முன்னிலையில் புதிய பணிகளுக்கு பூமிபூஜையிட்டு, முடிவுற்ற பணிகளை துவக்கி வைத்தார்.

தாந்தோணி ஊராட்சி ஒன்றியத்திற்குட்பட்ட ஆண்டாங்கோவில் மேற்கு ஊராட்சி மொச்சக்கொட்டாம்பாளையம் கிராமத்தில் சட்டமன்ற உறுப்பினரின் தொகுதி மேம்பாட்டு திட்டத்தின்கீழ் ரூ.13 லட்சம் மதிப்பில் கட்டப்பட்டுள்ள புதிய நூலக கட்டிடத்தையும், வேப்பம்பாளையம் கிராமத்தில் ரூ.8 லட்சம் மதிப்பில் கட்டப்பட்டுள்ள பல்நோக்கு மையத்தையும் அமைச்சர் எம்.ஆர்.விஜயபாஸ்கர் திறந்து வைத்தார்.

வெஞ்சமாங்கூடலூர் ஊராட்சியில் ரூ.72 லட்சம் மதிப்பில் சமுதாயக்கூடம் கட்டுவதற்கான பூமிபூஜை நிகழ்வில் கலந்துகொண்டு கட்டுமானப்பணிகளை துவக்கி வைத்த அமைச்சர், வெஞ்சமாங்கூடலூர் மற்றும் செம்பகிணம் ஆகிய ஊராட்சிகளில் தலா ரூ.30 லட்சம் மதிப்பில் கட்டப்பட்டுள்ள பொதுமக்களுக்கும், இளைஞர்களுக்கும், குழந்தைகளுக்கும் பொழுதுபோக்கு அம்சங்களுடனும், உடற்பயிற்சி கூடத்துடனும் அமைந்துள்ள அம்மா பூங்காவையும்,

ஈசநத்தம் ஊராட்சி நல்லமநாயக்கன்பட்டியில் ரூ.5.20 லட்சம் மதிப்பில் கட்டப்பட்டுள்ள நாடகமேடையினையும், ஈசநத்தத்தில் ரூ.6 லட்சம் மதிப்பில் கட்டப்பட்டுள்ள புதிய பயணியர் நிழற்குடையினையும் திறந்து வைத்தார். பின்னர் புகளூர் வட்டத்திற்குட்பட்ட வேலாயுதம்பாளையம் பாலத்துறையில் உள்ள சுமார் 12 மைல் நீளத்திலான புகளூர் வாய்க்காலில் நீரின் வேகத்தை தடுக்கும் வகையில் பரவியுள்ள செடிகொடிகளை அகற்றும் பணியினை அமைச்சர் துவக்கி வைத்தார்.

பின்னர் அமைச்சர் எம்.ஆர்.விஜயபாஸ்கர் செய்தியாளர்களிடம் கூறியதாவது:-

புரட்சித்தலைவி அம்மா அவர்கள் நாட்டு மக்களின் நலன்கருதி எண்ணிலடங்கா மக்கள் நலத்திட்டங்களை அறிவித்து செயல்படுத்தி தமிழ்நாட்டு மக்களின் வாழ்வாதாரத்தை மேம்படுத்தினார். அம்மா அவர்களின் நல்லாசியுடன், தமிழகத்தில் நல்லாட்சி நடத்திவரும் முதலமைச்சர் மற்றும் துணை முதலமைச்சர் ஆகியோரின் வழிகாட்டுதலின்படி பொதுமக்களுக்கு தேவையான அனைத்து திட்டங்களும் தொடர்ந்து செயல்படுத்தப்பட்டு வருகின்றது. இன்று பல்வேறு திட்டங்களின் கீழ் ரூ.164.60 லட்சம் மதிப்பிலான திட்டங்கள் பொதுமக்களின் பயன்பாட்டிற்காக வழங்கப்பட்டுள்ளது, பல புதிய திட்டப்பணிகளுக்கு அடிக்கல் நாட்டப்பட்டுள்ளது.

இவ்வாறு அமைச்சர் எம்.ஆர்.விஜயபாஸ்கர் கூறினார்.

இந்நிகழ்ச்சியில் மாவட்ட கழக அவைத்தலைவரும், திருச்சிராப்பள்ளி மத்திய கூட்டுறவு வங்கி தலைவருமான ஏ.ஆர்.காளியப்பன், மாவட்ட ஊராட்சி தலைவர் எம்.எஸ்.கண்ணதாசன், துணைத்தலைவர் என்.முத்துக்குமார், ஊராட்சிகளுக்கான உதவி இயக்குநர் உமாசங்கர், ஊராட்சி உள்ளிட்ட அலுவலர்கள் பலர் கலந்து கொண்டனர்.