தற்போதைய செய்திகள்

முஸ்லிம்கள் போராட்ட பின்னணியில் திமுக – அமைச்சர் கே.டி.ராஜேந்திர பாலாஜி குற்றச்சாட்டு

விருதுநகர்

முஸ்லிம்களின் போராட்ட பின்னணியில் திமுக உள்ளது என்று அமைச்சர் கே.டி.ராஜேந்திர பாலாஜி குற்றம் சாட்டினார்.

புரட்சித்தலைவி அம்மா அவர்களின் 72-வது பிறந்தநாள் விழா பொதுக்கூட்டம் மற்றும் நலத்திட்ட உதவிகள் வழங்கும் விழா ராஜபாளையம் அருகே செட்டியார்பட்டியில் நடைபெற்றது. கழக பிரமுகர் ஆறுமுகச்சாமி தலைமை வகித்தார். செட்டியார்பட்டி பேரூர் கழக செயலாளர் அங்குதுரை முன்னிலை வைத்தார். பால்வளத்துறை அமைச்சர் கே.டி.ராஜேந்திர பாலாஜி கலந்து கொண்டு சிறப்புரையாற்றினார். அவர் பேசியதாவது:-

புரட்சித்தலைவர், புரட்சித்தலைவி வழியில் தமிழகத்தில் முதலமைச்சர் எடப்பாடியார், துணை முதலமைச்சர் ஓ.பன்னீர்செல்வம் சிறப்பான ஆட்சியை நடத்தி வருகின்றனர். நாங்கள் செய்த சாதனைகளை சொல்லி ஓட்டு கேட்கிறோம். ஆனால் திமுகவினர் குறை சொல்லிக்கொண்டே ஓட்டு கேட்கின்றனர். நாங்கள் இதைச் செய்தோம், நாங்கள் இதை செய்யப் போகிறோம் என்று சொல்லி ஓட்டு கேட்கவே மாட்டார்கள்.

ஆனால் நாங்கள் செய்த திட்டங்களையும், சாதனைகளையும் சொல்லி ஓட்டு கேட்கிறோம். அம்மா அவர்கள் மறைந்து மூன்று ஆண்டுகளாகி விட்டது. புரட்சித்தலைவி அம்மாவின் பிறந்தநாள் விழா கடந்த ஆண்டை விட இந்த ஆண்டு மிக சிறப்பாக தமிழகமெங்கும் தமிழர்கள் வாழும் பகுதியில் கொண்டாடப்பட்டு வருகிறது. எப்பொழுதெல்லாம் அதிமுகவிற்கு வீழ்ச்சி ஏற்படுகிறதோ அப்போதெல்லாம் அண்ணா திமுக தொண்டர் வீறுகொண்டு எழுந்து வருவான். வேலூரில் இஸ்லாமிய மக்களை தூண்டிவிட்டு குறைந்த வாக்கு வித்தியாசத்தில் திமுக வெற்றிபெற்றது. விக்கிரவாண்டி சட்டமன்ற தேர்தலில் 50 ஆயிரம் வாக்கு வித்தியாசத்தில் கழக வேட்பாளர் வெற்றிபெற்றார். உள்ளாட்சித் தேர்தலில் பாதிக்குப் பாதி கழகம் வெற்றி பெற்றுள்ளது. பல்வேறு பகுதிகளில் அதிகமாக வாக்குகளை கழகம் பெற்றது.

நடைபெற்று முடிந்த எம்பி தேர்தலில் வெற்றிபெற்ற திமுக எம்பிக்களால் ஒன்றுமே செய்ய முடியவில்லை. தேனி தொகுதியில் வெற்றிபெற்ற எங்களது எம்பி மற்றும் ராஜ்யசபா எம்பிக்கள் தமிழக பிரச்சினைகளுக்காக தொடர்ந்து குரல் கொடுத்து வருகின்றனர். இஸ்லாமியர்கள் கழகத்திற்கு ஓட்டு போட மாட்டார்கள் என்று திமுகவினர் விஷம பிரச்சாரம் செய்து வருகின்றனர். குடியுரிமை சட்டம் குறித்து சட்டமன்றத்தில் தீர்மானம் நிறைவேற்ற வேண்டும் என்று திமுக தலைவர் ஸ்டாலின் கேள்வி எழுப்பினார்.

இதற்கு பதில் அளித்த முதலமைச்சர் எடப்பாடியார் குடியுரிமை சட்டத்தினால் தமிழகத்தில் ஏதாவது ஒரு முஸ்லிம் எங்கேயாவது பாதிக்கப்பட்டால் உடனே கூறுங்கள் என்று கூறினார். உங்களுக்கு தெரிந்தால் என்னிடம் உடனே கூறுங்கள். சொன்னால் தானே நடவடிக்கை எடுக்க முடியும் என்று கூறினார். முதல்வருக்கு பதில் கூற முடியாமல் ஸ்டாலின் சட்டசபையில் இருந்து வெளியே சென்றுவிட்டார். உண்மையை பேசினால் ஸ்டாலின் வெளிநடப்பு செய்கிறார். முஸ்லிம்களின் போராட்ட பின்னணியில் தி.மு.க. உள்ளது.

டெல்டா பகுதிகளை பாதுகாக்கும் வகையில் பாதுகாக்கப்பட்ட சிறப்பு வேளாண்மை மண்டலத்தை முதலமைச்சர் உருவாக்கியுள்ளார். தென் மாவட்டங்களில் புதிய தொழிற்சாலையை கொண்டுவர முதலமைச்சர் பல்வேறு முயற்சிகளை எடுத்து வருகிறார். விருதுநகர் மாவட்ட மக்கள் பயன்பெறும் வகையில் 300 கோடி ரூபாய் மதிப்பீட்டில் புதிய மருத்துவ கல்லூரியை தமிழக முதல்வர் கொண்டு வந்துள்ளார். வரும் ஞாயிற்றுக்கிழமை மருத்துவ கல்லூரிக்கு அடிக்கல் நாட்டி பணிகளை தமிழக முதல்வர் தொடங்கி வைக்க உள்ளார்.

எடப்பாடியார் ஆட்சியில்தான் எல்லா திட்டங்களும் செயல்படுத்தப்பட்டு வருகின்றன. திமுக ஆட்சியில் எதுவுமே நடக்கவில்லை. திமுக ஆட்சிக்கு வந்தால் ரவுடியிசம் நடக்கும், சண்டை நடக்கும், கலவரம் நடக்கும், சாதி பிரச்சினையை தூண்டி விடுவார்கள், மத பிரச்சினையை தூண்டி விடுவார்கள். இப்போது இஸ்லாமியர்களை தூண்டிவிட்டு திமுக அரசியல் நடத்தி வருகிறது. தெருவில் உட்கார்ந்து எதற்கு போராடுகிறோம் என்று தெரியாமல் இஸ்லாமியர்கள் போராட்டத்தில் ஈடுபட்டு வருகின்றனர். அவர்களை சில அரசியல் கட்சிகள் தொடர்ந்து தூண்டிவிட்டு வருகின்றன.

அப்பு, மகன் உறவோடு பழகி வரும் இஸ்லாமியர்களுக்கு அதிமுக அரசு என்றும் உறுதுணையாக இருக்கும். இந்துக்களை திமுகவினர் தொடர்ந்து கேவலப்படுத்தி வருகின்றனர். இந்து மக்களையும் இந்துக்களையும் இந்து கடவுள்களையும் திமுகவினர் தொடர்ந்து அவமரியாதை செய்து வருகின்றனர். இந்து கடவுளை கேவலப்படுத்துவதை திமுக தனது கொள்கையாக வைத்துள்ளது. இந்து கடவுள்களை கேவலப்படுத்தி பேசினால் இஸ்லாமியர்கள் ஓட்டு போடுவார்கள் என்று திமுகவினர் இந்துக்களை தொடர்ந்து வசைபாடி வருகின்றனர்.

காதலித்து ஏமாற்றி கர்ப்பமாக்கி விட்டு ஓடிச் செல்லும் அரசியல்தான் இன்று திமுகவில் உள்ளது. திமுகவின் ஏமாற்று அரசியல் நீண்ட காலம் நீடிக்காது. இலவச மின்சாரம் தருகிறேன் கடனை தள்ளுபடி செய்கிறேன், விவசாய கடன் தள்ளுபடி பண்ணுகிறேன், நகை அடமானம் வைத்தால் தள்ளுபடி செய்கிறேன். வீட்டு கடன் தள்ளுபடி செய்கிறேன், எல்லாம் தள்ளுபடி செய்கிறேன் என்று சொல்லி எதுவுமே செய்யாமல் பொய் சொல்லி வாக்காளர்களை திமுக ஏமாற்றி வருகின்றது. நாடக அரசியலில் கதாநாயகனாக திமுக தலைவர் ஸ்டாலின் உள்ளார்.

தற்போது திமுக பிரசாந்த் கிஷோர் என்பவரை நியமித்துள்ளது. அவரின் பணி என்னவென்றால் யார் பணம் அதிகம் கொடுக்கின்றார்களோ அவருக்கு வேலை செய்வார். யார் பணம் கொடுத்தாலும் அங்கு வேலை செய்தால் அதற்கு என்ன அர்த்தம் என்று பொதுமக்களாகிய நீங்கள் சிந்திக்க வேண்டும்.

சமூக வலைதளங்களில் பொய்யான தகவலை பரப்பி விடுவதுதான். இதற்காகவே பீகாரில் இருந்து 1,500 பேரை பிரசாந்த் கிஷோர் தமிழகத்தில் களமிறக்கியுள்ளார் பார்ப்பன ஆதிக்கம் ஒழிக என்று சொல்லும் திமுக இன்று அதே சமூகத்தைச் சேர்ந்த பிரசாந்த்கிஷோரை அரசியலுக்காக பயன்படுத்தியுள்ளது. பிரசாந்த்கிஷோரை வைத்து அரசியல் செய்யும் திமுகவிற்கு சுய உணர்வு என்பதே கிடையாது. சுயமாக சிந்திக்காமல் உண்மையை சொல்லி ஓட்டு கேட்க முடியாமல் திமுகவின் நிலை உள்ளது.

தேர்தலுக்காக மட்டுமே திமுகவினர் வருகின்றனர் என்று பொதுமக்களுக்கு தற்போது புரிந்து விட்டது. தமிழகத்தில் அதிமுகவை 32 ஆண்டுகள் ஆட்சிக் கட்டிலில் அமர்த்திய பெருமை தமிழக மக்களுக்கு உண்டு. ஊரக உள்ளாட்சித் தேர்தலில் ஜாதிவாரியாக, மதவாரியாக திமுக மக்களை தூண்டி விட்டது. திமுகவின் மதவெறியை தூண்டி விடும் அரசியலை மக்கள் இப்போது புரிந்து கொண்டார்கள். எப்போது தேர்தல் வந்தாலும் வாக்காளர்கள் அதிமுகவிற்கு ஆதரவாக இருக்க வேண்டும்.

இவ்வாறு அமைச்சர் கே.டி.ராஜேந்திர பாலாஜி பேசினார்.