தற்போதைய செய்திகள்

எந்த காலத்திலும் திமுக ஆட்சிக்கு வர முடியாது – ஸ்டாலினுக்கு அமைச்சர் செல்லூர் கே.ராஜூ பதிலடி

மதுரை

கடல் வத்தி மீன் சாப்பிட கொக்கு நினைத்தால் முடியுமா? அது போல திமுக ஆட்சிக்கு வர முடியாது என்று ஸ்டாலினுக்கு அமைச்சர் செல்லூர் கே.ராஜூ பதிலடி கொடுத்துள்ளார்.

மதுரை மாநகர் வடக்கு 1-ம் பகுதி கழகம் சார்பில் அம்மாவின் 72 வது பிறந்த நாளையொட்டி மதுரை கே.புதூரில் மாபெரும் பொதுக்கூட்டம் நடைபெற்றது. இக்கூட்டத்தில் மதுரை மாநகர் மாவட்டக் கழகச் செயலாளரும், கூட்டுறவுத்துறை அமைச்சருமான செல்லூர் கே.ராஜூ, கழக தொழில்நுட்ப பிரிவு இணை செயலாளர் வி.வி.ஆர் ராஜ்சத்யன் ஆகியோர் கலந்து கொண்டு நலத்திட்ட உதவிகளை வழங்கி னர்.

இந்நிகழ்ச்சியில் அமைச்சர் செல்லூர் கே.ராஜூ பேசியதாவது:- 

நல்லவர்களை வாழ வைக்காத கட்சி திமுக. திமுகவின் பொய் வழக்கால் தான் அம்மாவிற்கு உடல்பஙநல குறைவு ஏற்பட்டு இறந்தார். திமுக சுயநல கட்சி. அதற்கு நாம் இடம் அளிக்கக்கூடாது, திமுக ஆட்சிக்காலத்தில் அப்பாவி மக்களிடம் நிலத்தை அபகரித்தது மட்டுமல்லாது சுடுகாட்டை கூட அபகரித்துக் கொண்டனர். இந்த சம்பவம் மதுரையில் உள்ள சம்பகுளத்தில் நடைபெற்றது. திமுக, ஆட்சியை பிடிக்கும் என கனவு கண்டு வருகிறது, அதிமுகவுக்கு முடிவு கட்ட யாரும் பிறக்கவில்லை. ஸ்டாலினால் அதிமுக ஆட்சிக்கு முடிவு கட்ட முடியாது.

மக்களுக்காக புரட்சித்தலைவர் மற்றும் புரட்சித்தலைவி அம்மா ஆகியோர் பல்வேறு திட்டங்களை கொண்டு வந்தனர். கிராமம் தோறும் ரேசன் கடை கொண்டு வந்தவர் எம்.ஜி.ஆர். அம்மா கொண்டு வந்த மகளிர் சுய உதவிக்குழுக்கள் தற்போது 93 லட்சமாக உயர்ந்துள்ளது, திமுக சொல்கிற மாதிரி ஏதாவது திட்டங்களை செய்தது உண்டா? ஆனால் அதிமுக மக்கள் சொல்கிற எண்ணிலடங்கா திட்டங்களை செய்துள்ளது.

அம்மா கொண்டு வந்த மழைநீர் சேகரிப்பு திட்டத்தை தற்போது பிரதமர் மோடி நாடெங்கும் செயல்படுத்தி வருகிறார். 69 சதவீத இடஒதுக்கீட்டை பெற்றுத் தந்தவர் அம்மா. திமுக ஆட்சிக்காலத்தில் ரேசன் கடையில் போட்ட அரிசியை சோறு ஆக்கி நாய்க்கு போட்டால் அது ஒரு வாரத்திற்கு வீட்டுக்கு வராது, கோழி வீட்டை விட்டு கோபித்து கொண்டு செல்லும். திராவிட இயக்க வாரிசு என ஸ்டாலினை சொல்கின்றனர் திமுகவினர். ஆனால் மத்திய ஆட்சியில் திமுகவினர் அமைச்சராக இருந்த போது என்ன செய்தீர்கள்.

ரூ.7000 கோடியை விவசாயிகளுக்காக தள்ளுபடி செய்தோம் என ஸ்டாலின் மேடையில் கூறுவார். ஆனால் உண்மையில் ரூ.4000 கோடி மட்டுமே தள்ளுபடி செய்தார்கள். நாங்கள் ஆதாரத்துடன் தான் பேசுவோம். ரூ.4350 கோடியை முதியோர் உதவித்தொகைக்காக ஒதுக்கியுள்ளோம். 34லட்சத்து 50,000 பேருக்கு தமிழகத்தில் முதியோர் உதவித்தொகை வழங்கப்பட உள்ளது. முதல்வர் எடப்பாடியாரின் திட்டங்களை பார்த்தால் சும்மா அதிருது. சட்டமன்றத்தில் எடப்படியாரின் பேச்சை திட்டங்களை பார்க்கும் திமுகவினருக்கு முகத்தில் ஈ ஆடுகிறது. பேச்சு கூட இல்லாமல் இருக்கின்றனர்.

அதிமுகவை கண்டு திமுக அதிர்ந்து நிற்கிறது, ஆட்டுக்கல்லில் மாவு ஆட்டுவதால் மாமியார், மருமகளுக்கு அடிக்கடி சண்டை வருவது இயல்பு, அம்மா கொடுத்த இலவச கிரைண்டரால் மாமியார், மருமகள் சண்டை நின்று உள்ளது.அம்மா பெண்களுக்கு ஒய்வு அளிக்க வேண்டி மிக்சி, கிரைண்டர், பேன் வழங்கினார், மதுரையில் ரூ.1000 கோடி அளவிற்கு ஸ்மார்ட் சிட்டி திட்டம் நடைபெறுகிறது, தமிழகத்திற்கு ஒரே ஆண்டில் 11 மருத்துவக் கல்லூரிகள் கொண்டு வந்து முதல்வர் எடப்பாடியார் சாதனை புரிந்து உள்ளார்.

லோயர் கேம்பில் இருந்து 125 எம்.எல்.டி. குடிநீர் கொண்டு வரும் திட்டத்திற்கு விரைவில் பூமி பூஜை நடைபெற இருக்கிறது. இந்த திட்டத்தால் மதுரைக்கு 24 மணி நேரமும் குடிநீர் விநியோகம் செய்யப்படும். இந்தியாவில் மிகச்சிறந்த ஆளுமை பெற்ற மாநிலம் தமிழகம், கொரோனா தமிழ்நாட்டுக்கு மட்டுமல்ல. இந்தியாவுக்கே வராது. கொரோனா நோய் வந்தாலும் உடனே போய்விடும் என சொல்லுகின்றனர். தமிழகத்தில் எல்லா துறையும் சிறந்த துறையாக உள்ளன. எ

ஆட்சிக்கு வருகிற வரைக்கும் தான் திமுகவினர் நன்றாக பேசுவார்கள். ஆட்சிக்கு வந்த பிறகு மக்களை மறந்து விடுவார்கள். திமுக ஆட்சிக் காலத்தில் வக்பு வாரிய சொத்துக்கள் பறிமுதல் செய்யப்பட்டதை இஸ்லாமியர்கள் எண்ணிக் பார்க்க வேண்டும், அதிமுக ஆட்சிக்காலத்தில் நோன்பு காலத்தில் 5350 மெட்ரிக் டன் அரிசி வழங்கப்பட்டது, உலமாக்களுக்கு உதவித்தொகை, சென்னையில் தங்கும் விடுதி என எண்ணற்ற திட்டங்களை செய்துள்ளது. ஆறுமுறை தொழும் இஸ்லாமியர்கள் நினைத்துப் பார்க்க வேண்டும்.

இஸ்லாமியர்களை பகடை காயாக மாற்ற திமுக நினைக்கின்றனர். ஆனால் முதல்வர் குடியுரிமை சட்டத்தால் இஸ்லாமியர்களுக்கு எந்த பாதிப்பும் வராது என தெளிவாக கூறிவிட்டார். சட்டமன்றத்தில் குடியுரிமை சட்டம் குறித்த முதல்வரின் கேள்விகளுக்கு பதில் அளிக்க முடியாமல் மதுரை ஒத்தக்கடை பொதுக்கூட்டத்தில் நான் தான் சிங்கம் என பேசி விட்டு சென்றுள்ளார் ஸ்டாலின். உங்கள் தந்தை கலைஞரையே சந்தித்தவர்கள் அதிமுகவினர். கருணாநிதியாலே அதிமுக ஆட்சியை வீழ்த்த முடியவில்லை. ஸ்டாலின் வீழ்த்தி விட முடியுமா?

சேலை கடையில் 4 மணி நேரம் காத்திருந்து சேலையை தேர்ந்தெடுக்கும் நீங்கள் சிந்தித்து வாக்களிக்க வேண்டும். நாடாளுமன்ற தேர்தல் என்பது வேறு, சட்டமன்ற தேர்தல் என்பது வேறு. திமுகவால் சட்டமன்ற தேர்தலில் வெற்றி பெற முடியாது. திமுக பணத்தை கொடுத்து வாக்குகளை வாங்க முடியாது, மக்கள் ஏமாற மாட்டார்கள்.

கடல் வத்தி மீன் சாப்பிட கொக்கு நினைத்தால் முடியுமா? அது போல திமுக ஆட்சிக்கு வர முடியாது. கருவாடை மீன் ஆக்கலாம். கிழவியை கூட குமரி ஆக்கலாம். ஆனால் திமுக ஒரு போதும் ஆட்சிக்கு வர முடியாது. மக்களை பிளவுபடுத்தி ஆட்சிக்கு வர நினைக்கும் திமுக தலைவர் ஸ்டாலினின் எண்ணம் நிறைவேறாது. கடைசிவரை ஸ்டாலின் எதிர்க்கட்சி தலைவராக இருப்பது தான் தமிழ்நாட்டிற்கு நல்லது.

இவ்வாறு அமைச்சர் செல்லூர் கே.ராஜூ பேசினார்.

இந்நிகழ்ச்சியில் வடக்கு 1ம் பகுதி செயலாளர் அண்ணாநகர் முருகன், முன்னாள் சட்டமன்ற உறுப்பினர் அண்ணாதுரை, மாவட்டக் கழக துணைச் செயலாளர் சி.தங்கம், மாவட்ட கழக பொருளாளர் ஜெ.ராஜா, கழக இலக்கிய அணி துணை செயலாளர் வில்லாபுரம் ரமேஷ், முன்னாள் துணை மேயர் திரவியம், மற்றும் பரவை ராஜா, வட்டக் கழக செயலாளர் கண்ணன் உள்பட பலர் கலந்து கொண்டனர்.