தற்போதைய செய்திகள்

வீராணம் ஏரி- கீழணையிலிருந்து பாசனத்திற்கு தண்ணீர் திறப்பு – அமைச்சர் எம்.சி.சம்பத் தண்ணீர் திறந்து விட்டார்…

கடலூர்:-

வீராணம் ஏரி மற்றும் கீழணையிலிருந்து பாசனத்திற்காக அமைச்சர் எம்.சி.சம்பத் தண்ணீர் திறந்து விட்டார்.

மேட்டூர் அணையிலிருந்து பாசனத்திற்காக திறந்து விடப்பட்ட தண்ணீர் தஞ்சை மாவட்டம் கல்லணைக்கு வந்தடைந்தது. கல்லணையிலிருந்து திறக்கப்பட்ட தண்ணீர் அணைக்கரை பகுதியில் உள்ள கீழணையை வந்தடைந்தது. அங்கிருந்து வடவாறு மூலம் வீராணம் ஏரிக்கு திறந்து விடப்பட்ட தண்ணீரை படிப்படியாக தேக்கி வைத்து முதலமைச்சரின் ஆணைக்கிணங்க பாசனத்திற்காக திறந்து விடும் நிகழ்ச்சி நடைபெற்றது.

வீராணம் ஏரிக்கரையின் கந்தகுமரன் என்ற மதகு பகுதியில் நடைபெற்ற இந்நிகழ்ச்சிக்கு கடலூர் மாவட்ட ஆட்சித்தலைவர் வெ.அன்புச்செல்வன் தலைமை தாங்கினார். தமிழக தொழில்துறை அமைச்சர் எம்.சி.சம்பத் வீராணம் ஏரி தண்ணீரை ராதா மதகு வாய்க்கால் மற்றும் வீராணம் புதிய மதகு வழியாக திறந்து விட்டார்.

முன்னதாக கீழணையில் தேக்கப்பட்டுள்ள தண்ணீரை பாசனத்திற்காக திறந்து விடும் நிகழ்ச்சி நடைபெற்றது. கடலூர், தஞ்சாவூர் மற்றும் நாகப்பட்டினம் மாவட்டங்களுக்கு வடவாறு வாய்க்கால் (விநாடிக்கு 1800 கன அடி), வடக்குராஜன் வாய்க்கால் (400 கன அடி விநாடிக்கு), தெற்குராஜன் வாய்க்காலில் இருந்து ( வினாடிக்கு 400 கன அடி) மாவட்ட ஆட்சித்தலைவர்கள் கடலூர் வெ. அன்புச்செல்வன், நாகப்பட்டினம் சி.சுரேஷ்குமார், தஞ்சாவூர் அண்ணாதுரை ஆகியோர் முன்னிலையில் தொழில்துறை அமைச்சர் எம்.சி.சம்பத் அணைக்கரை என்ற இடத்தில் இருந்து தண்ணீர் திறந்து விட்டார்.

பின்பு அமைச்சர் எம்.சி.சம்பத் செய்தியாளர்களிடம் கூறியதாவது:-

வீராணம் ஏரியில் ராதா வாய்க்கால் மதகு மூலமாக 10 கன அடி நீர், வீராணம் புதிய மதகு மூலமாக 74 கன அடி நீர் பாசனத்திற்கு திறந்து விடப்படுள்ளது. இதன் தொடர்ச்சியாக வீராணம் ஏரியில் உள்ள 34 மதகுகளிலும் இருந்தும் மொத்தம் 400 கன அடி நீர் திறந்து விடப்படும். இதன் மூலம் கடலூர் மாவட்டம், காட்டுமன்னார்கோயில், ஸ்ரீமுஷ்ணம், சிதம்பரம், புவனகிரி தாலுக்காக்களில் சேர்ந்த 102 கிராமம் மொத்தம் 44,856 ஏக்கர் பாசன பரப்புகள் பயனடையும், மேலும் அவ்வாறு பாசனதேவைக்கேற்ப தண்ணீரின் அளவு மாற்றி அமைக்கப்பட்டு அனைத்து வாய்க்கால்களிலும் தண்ணீர் தொடர்ந்து திறந்து விடப்படும்.

கீழணையிலிருந்து கடலூர் மாவட்டத்திற்கு நேரடி பாசனமாக கொள்ளிடம் வடக்கு ராஜன் வாய்க்கால், கான்சாகிப் வாய்க்கால், கவரப்பட்டு வாய்க்கால், கஞ்சன்கொல்லை வாய்க்கால் மற்றும் வடவாறு வாய்க்கால் பாசனத்திற்குட்பட்ட மொத்தம் 47,997 ஏக்கர் பாசன பரப்புக்கும் மற்றும் நாகை, தஞ்சாவூர் மாவட்டங்களில் உள்ள கொள்ளிடம் தெற்குராஜன் வாய்க்கால்,

குமுக்கிமன்னியார் வாய்க்கால், மேலராமன் வாய்க்கால் மற்றும் வினாயகன்தெரு வாய்க்கால் வாயிலாக நேரடி பாசனமாக மொத்தம் 39,050 ஏக்கர் பரப்பிற்கும் ஆக மொத்தம் 87,047 ஏக்கர் விளைநிலங்களுக்கு பாசன வசதி கிடைக்கும். மேலும், அவ்வப்போது பாசனதேவைக்கேற்ப தண்ணீர் அளவு மாற்றியமைக்கப்பட்டு வாய்க்கால்களில் தொடர்ந்து தண்ணீர் திறந்து விடப்படும். இதன் தொடர்ச்சியாக அனைத்து பாசன வாய்க்கால்களுக்கும் தொடர்ந்து தண்ணீர் வழங்கப்படும், விவசாயிகள் தண்ணீரை சிக்கனமாக உபயோகித்து பயனடையுமாறு கேட்டுக் கொள்கின்றேன்.

இவ்வாறு அமைச்சர் எம்.சி.சம்பத் பேசினார்.

இந்நிகழ்ச்சிகளில் ஜெயங்கொண்டம் சட்டமன்ற உறுப்பினர் இராமஜெயலிங்கம், அரசு தலைமை கொறடா தாமரை எஸ்.இராஜேந்திரன், சார் ஆட்சியர் விசுமகாஜன், கடலூர் மேற்கு மாவட்ட முன்னாள் செயலாளர் மாரிமுத்து, விருத்தாசலம் நகர செயலாளர் பி.ஆர்.சந்திரகுமார், ஒன்றிய செயலாளர் அண்ணாகிராமம் என்.டி.கந்தன், விருத்தாசலம் வடக்கு பாலதண்டாயுதம், குறிஞ்சிப்பாடி தெற்கு பாஷ்யம், மாவட்ட மாணவரணி செயலாளர் எஸ்.கலையரசன், முன்னாள் மாவட்ட கவுன்சிலர் காடாம்புலியூர் தேவநாதன், பொதுக்குழு உறுப்பினர் வடலூர் எஸ்.காமராஜ், கடலூர் நகர துணை செயலாளர் கந்தன் மற்றும் கண்காணிப்பு பொறியாளர்கள், செயற்பொறியாளர்கள், அலுவலர்கள், விவசாயிகள் கலந்து கொண்டனர்.