தற்போதைய செய்திகள்

முதலமைச்சருக்கு நன்றி தெரிவித்து மதுரையில் பிரம்மாண்ட பேரணி – அமைச்சர் ஆர்.பி.உதயகுமார் தலைமையில் கழக அம்மா பேரவையினர் அணிவகுப்பு

மதுரை

அம்மா பிறந்த நாளான 24-ம் தேதியை மாநில பெண் குழந்தைகள் பாதுகாப்பு தினமாக அறிவித்த முதலமைச்சருக்கு நன்றி தெரிவித்து கழக அம்மா பேரவை சார்பில் மதுரையில் பிரம்மாண்ட பேரணி நடைபெற்றது. இதில் அமைச்சர் ஆர்.பி.உதயகுமார் தலைமையில் 5 ஆயிரத்துக்கும் மேற்பட்டோர் அணிவகுத்து சென்றனர்.

சட்டமன்றத்தில் கடந்த 19-ந்தேதி முதலமைச்சர் எடப்பாடி கே.பழனிசாமி அம்மா பிறந்த பிப்ரவரி நாளான 24-ந் தேதியை மாநில பெண் குழந்தைகள் பாதுகாப்பு நாளாகக் கொண்டாடப்படும் என்று 110 விதியின் கீழ் அறிவித்தார். இதற்காக தமிழகம் முழுவதும் உள்ள தாய்மார்கள் முதலமைச்சருக்கு நன்றி தெரிவித்து பாராட்டி வருகின்றனர்.

இந்நிலையில் கழக அம்மா பேரவை சார்பில் கழக அம்மா பேரவைச் செயலாளரும், மதுரை புறநகர் மேற்கு மாவட்ட கழக செயலாளரும், வருவாய், பேரிடர் மேலாண்மை மற்றும் தகவல் தொழில்நுட்பவியல்துறை அமைச்சருமான ஆர்.பி.உதயகுமார் தலைமையில் மதுரை திருமங்கலத்தில் முதலமைச்சரை பாராட்டி தீர்மானம் நிறைவேற்றப்பட்டு அந்த தீர்மான நகலுடன் பேரணி நடைபெற்றது. சந்தைப்பேட்டையில் தொடங்கிய இப்பேரணி ராஜாஜி சிலை வரை நடைபெற்றது.

இந்த நிகழ்ச்சியில் கழக அம்மா பேரவை துணைச் செயலாளர் வெற்றிவேல் ,மதுரை புறநகர் மாவட்ட அம்மா பேரவை செயலாளர் தமிழரசன், மதுரை மாநகர் மாவட்ட அம்மா பேரவை செயலாளர் சரவணன் எம்.எல்.ஏ., மாவட்ட கழக துணை செயலாளர் ஐயப்பன், மாவட்ட இலக்கிய அணி செயலாளர் திருப்பதி, மாவட்ட வழக்கறிஞர் பிரிவு செயலாளர் தமிழ்ச்செல்வம், ஒன்றிய கழகச் செயலாளர்கள் அன்பழகன், ராமசாமி, மகாலிங்கம், முன்னாள் சேர்மன் தமிழழகன் உள்பட பலர் கலந்து கொண்டனர்.

நிகழ்ச்சியில் அமைச்சர் ஆர்.பி.உதயகுமார் தலைமையில் நிறைவேற்றப்பட்ட தீர்மானம் வருமாறு:-

நமக்கான வெயிலை தான் சுமந்து தனக்கான நிழலை தமிழ் மக்களுக்கு தந்தவர் புரட்சித்தலைவி அம்மா அவர்கள். உலகமெங்கும் வாழும் 10 கோடி தமிழ் நெஞ்சங்களில் இதய தெய்வமாக வாழ்ந்து வருபவர் தான் அம்மா அவர்கள். குழந்தைகள் மீது மிகுந்த பற்றும், மாறாத அன்பும் கொண்டு குழந்தைகளை காணும் போதெல்லாம் அவர்களை உச்சி முகர்ந்து வாழ்த்தி மகிழும் தாயுள்ளம் கொண்டவர் நமது புரட்சித்தலைவி அம்மா அவர்கள். குறிப்பாக பெண் குழந்தைகளின் நலனில் மிகுந்த அக்கறை கொண்டு அவர்களின் முன்னேற்றத்திற்காக. பாடுபட்டவர் அம்மா அவர்கள்.

அன்னை தெரசாவாலேயே பாராட்டப்பட்ட தொட்டில் குழந்தைகள் திட்டம், பெண் குழந்தைகள் பாதுகாப்புத் திட்டம், அங்கன்வாடி குழந்தைகளுக்கு வண்ண சீருடைகள், பெண் கல்வியை ஊக்குவிக்க படித்த பெண்களுக்கு ஊக்கத் தொகையுடன் கூடிய தாலிக்கு தங்கம் திட்டம், அன்பும் அரவணைப்பும் கிடைக்கும் வண்ணம் ஆதரவற்ற குழந்தைகள் மற்றும் முதியோர் உள்ளடங்கிய ஒருங்கிணைந்து வளாகங்கள் அமைத்தல் போன்ற புதுமையான திட்டங்கள் புரட்சித்தலைவி அம்மா அவர்களால் அறிமுகம் செய்யப்பட்டு தற்போது முதலமைச்சரால் தொடர்ந்து சிறப்பாக செயல்படுத்தப்பட்டு வருகிறது என்பது நாட்டு மக்களுக்கு நன்றாக தெரியும்.

குழந்தைகளுக்கான குறிப்பாக பெண் குழந்தைகளுக்காக அம்மா அவர்கள் ஆற்றிய உயர்ந்த சேவையினை நினைவு கூரத்தக்க வகையில் அம்மா அவதரித்த திருநாளாம் பிப்ரவரி 24-ந்தேதியை மாநில பெண் குழந்தைகள் பாதுகாப்பு நாளாக கொண்டாடப்படும் என்று சட்டமன்றத்தில் 110 விதியின் கீழ் அறிவித்து அம்மாவிற்கு அழியாப் புகழ் பெற்றுத் தந்தது.

அம்மாவின் நினைவுகளை சிறப்பிக்கும் வகையில் ஆதரவற்ற பெண் குழந்தைகளின் நல்வாழ்விற்காக 5 புதிய திட்டங்களையும் அறிவித்து இதன் மூலம் அம்மாவின் வழியில் செயல்பட்டு ஒட்டுமொத்த பெண் சமுதாய மக்களின் மனதை குளிர செய்த ,இரும்பு தேசத்தின் கரும்பு மனிதர், விவசாயிகளின் நல பாதுகாவலர், முதலமைச்சர் எடப்பாடி கே.பழனிசாமிக்கு கழக அம்மா பேரவையின் சார்பில் பொற்பாதம் பணிந்து, வணங்கி, கோடான கோடி நன்றிகளை காணிக்கையாய் செலுத்துகிறோம்.

மேலும் ஒட்டுமொத்த தமிழ் மக்களின் இதயத்துடிப்பாய் இருக்கும் முதலமைச்சர் அறிவித்த பெண் குழந்தைகள் பாதுகாப்பு நாள் என்பதை ஜீரணிக்க முடியாமல் அரசியல் நாகரீகம் இல்லாமல் விமர்சனம் செய்து வரும் திமுக தலைவர் மு.க.ஸ்டாலினுக்கு கழக அம்மா பேரவை கடும் கண்டனத்தை தெரிவித்துக் கொள்கிறது. இதன் மூலம் மக்களிடத்தில் உங்கள் தகுதியை நீங்கள் இழந்து விட்டீர்கள் இதற்கெல்லாம் வரும் காலங்களில் மக்கள் சரியான பாடத்தை கொடுப்பார்கள்.இனிமேல் இதுபோன்ற கோயபல்ஸ் பிரச்சாரத்தை ஸ்டாலின் நிறுத்திக்கொள்ள வேண்டும் என்று மீண்டும் ஒருமுறை ஸ்டாலினுக்கு கடும் கண்டனத்தை கழக அம்மா பேரவை தெரிவித்து கொள்கிறது.

இவ்வாறு தீர்மானங்கள் நிறைவேற்றப்பட்டன.

பேரணியின்போது வழிநெடுக அமைச்சர் ஆர்.பி.உதயகுமார் கழக கொடியை ஏற்றி பொதுமக்களுக்கு இனிப்பு வழங்கினார்.